ຄີລຽນ ເອັມບັບເປ ຂຶ້ນແທ່ນດາວຍິງສູງສຸດຕະຫລອດການຂອງ ເປແອສເຊ ຄົນໃຫມ່

ຄີລຽນ ເອັມບັບເປ ກອງໜ້າທີມຊາດຝຣັ່ງ ສ້າງປະຫວັດສາດກາຍເປັນນັກເຕະດາວຍິງສູງສຸດຕະຫລອດການຂອງ ປາຣີສ ແຊັງ ແຊັກແມັງ ຄົນໃຫມ່ດ້ວຍການຍິງໄປ 201 ປະຕູ.

ກ່ອນໜ້ານີ້ ເອັມບັບເປ ຍິງໃຫ້ ເປແອສເຊ ໄປແລ້ວເຖິງ 200 ປະຕູ ຈາກການລົງສະໜາມ 246 ນັດ ລວມທຸກລາຍການ ເຊິ່ງເປັນສະຖິຕິສູງສຸດເປັນອັນດັບ 1 ຂອງສະໂມສອນ ທຽບເທົ່າກັບ ເອດີສັນ ຄາວານີ ກອງໜ້າທີມຊາດອຸຣຸໄກວ ເຊິ່ງຍິງເທົ່າກັນ ແຕ່ລົງສະໜາມໄປ 301 ນັດລວມທຸກລາຍການ ລະຫວ່າງປີ 2013-2020.

ຫລ້າສຸດໃນເກມທີ່ ເປແອສເຊ ເປີດສະໜາມ ປາກ ເດ ແພຣັງ ເອົາຊະນະ ນ໊ອງ 4-2 ບານເຕະລີກເອິງ ຝຣັ່ງ ເມື່ອວັນທີ 4 ມີນາ ດາວເຕະອາຍຸ 24 ປີ ເຮັດເພີ່ມໄດ້ອີກ 1 ປະຕູ.

ຈາກການຍິງປະຕູດັ່ງກ່າວ ເຮັດໃຫ້ ເອັມບັບເປ ສ້າງປະຫວັດສາດກາຍເປັນດາວຍິງສູງສຸດຕະຫລອດການຄົນໃຫມ່ຂອງທີມຢ່າງເປັນທາງການ ດ້ວຍຈຳນວນ 201 ປະຕູຈາກການລົງສະໜາມ 247 ນັດລວມທຸກລາຍການ.

ຫລັງເກມມີການມອບລາງວັນດາວຍິງສູງສຸດຕະຫລອດການຂອງສະໂມສອນໃຫ້ກັບ ເອັມບັບເປ ຕໍ່ໜ້າແຟນບານ ໃນສະໜາມ ເຊິ່ງລາວກ່າວເຖິງຄວາມຮູ້ສຶກວ່າ : “ ມັນພິເສດຫລາຍທີ່ມາຢູ່ນີ້ ຄັ້ງສຸດທ້າຍທີ່ຂ້ອຍຢູ່ນີ້ຄືການປະກາດວ່າຂ້ອຍຈະຢູ່ຕໍ່ (ການຂະຫຍາຍສັນຍາ) ເປັນກຽດທີ່ໄດ້ຢູ່ນີ້ໃນຖານະນັກເຕະຜູ້ຍິງປະຕູສູງສຸດຂອງສະໂມສອນ ”.

“ ມັນເປັນສິດທິພິເສດທີ່ໄດ້ເປັນນັກເຕະຂອງ ເປແອສເຊ ການໄດ້ຫລິ້ນໃນສີເສື້ອແຫ່ງປະຫວັດສາດນີ້ ໃຫ້ກັບສະໂມສອນທີ່ໃຫຍ່ທີ່ສຸດໃນຝຣັ່ງ ”.