ດ່ານສາກົນຂົວມິດຕະພາບລາວ-ໄທ1 ປັບປຸງໃຫ້ສອດຄ່ອງກັບຄຳຂວັນ 6 ສ ຂອງນະຄອນຫລວງ ພ້ອມຈະເພີ່ມຕູ້ຈ້ຳແຈ້ງເອກະສານເຂົ້າ-ອອກເມືອງ
ທ່ານ ພັທ ກິດ່ອນ ກິວົງໄຊ ຮອງຫົວໜ້າຄະນະຄຸ້ມຄອງດ່ານ, ຫົວໜ້າດ່ານຕໍາຫລວດກວດກາຄົນເຂົ້າ-ອອກເມືອງ ດ່ານສາກົນຂົວມິດຕະພາບລາວ-ໄທແຫ່ງທີ 1 ໃຫ້ສໍາພາດໃນວັນທີ 1 ມີນາ 2023 ວ່າ: ປັດຈຸບັນການເຂົ້າ-ອອກ ຂອງຜູ້ໂດຍສານຢູ່ດ່ານສາກົນຂົວມິດຕະພາບ ລາວ-ໄທ ແຫ່ງທີ 1 ມີປະມານ 6000-7000 ກ່ວາຄົນຕໍ່ວັນ ແລະ ມີພາຫະນະເຂົ້າ-ອອກປະມານ 1000 ກ່ວາຄົນຕໍ່ວັນ ໂດຍສະເພາະວັນພັກລັດຖະການ ຫລື ເທສະການຕ່າງໆ. ສໍາລັບຂອດການບໍລິການຜູ້ໂດຍສານເຂົ້າ-ອອກ ຢູ່ໃນດ່ານໂດຍພື້ນຖານແລ້ວແມ່ນປະຕິບັດຕາມກົດຫມາຍວ່າດ້ວຍການເຂົ້າ-ອອກເມືອງ ແລະ ລະບຽບການຕ່າງໆຂອງຂະແໜງການກ່ຽວຂ້ອງວາງອອກ, ເຊິ່ງປັດຈຸບັນການເຂົ້າ-ອອກຂອງຜູ້ໂດຍສານ ແລະ ພາຫະນະແມ່ນກັບສູ່ສະພາບປົກກະຕິແລ້ວ ແລະ ການບໍລິການອໍານວຍຄວາມສະດວກແມ່ນມີຄວາມຄ່ອງຕົວຫລາຍກ່ວາເກົ່າ ແລະ ຫລຸດຜ່ອນການອັ່ງອໍແອອັດຂອງຄົນເຂົ້າອອກຫລາຍພໍສົມຄວນຖ້າ ທຽບໃສ່ເມື່ອກ່ອນ.
ໃນໄລຍະ 1 ປີ ຜ່ານມາໄດ້ປັບປຸງພື້ນຖານໂຄງລ່າງຂອງດ່ານຕາມມະຕິຕົກລົງຂອງອົງການປົກຄອງນະຄອນຫລວງ ຄັ້ງທີ 34 ແລະ ແຜນການປັບປຸງ ພື້ນຖານໂຄງລ່າງດ່ານຕາມແຜນແມ່ບົດການປັບປຸງດ່ານໃນແຕ່ລະໄລຍະມາຮອດປັດຈຸບັນໄດ້ເຮັດສໍາເລັດບາງໜ້າວຽກໂດຍພື້ນຖານເຊັ່ນ: ໄດ້ເລີກຮື້ບັນດາຫ້າງຮ້ານຢູ່ພາຍໃນຕຶກອາຄານໄດ້ 95%, ຕິດຕັ້ງຕູ້ຈ້ຳແຈ້ງເອກະສານຂອງຂະແໜງການປິ່ນອ້ອມຢູ່ພາຍໃນດ່ານສໍາເລັດປະມານ 85% ລວມມີທັງໝົດຖ້າສໍາເລັດການຕິດຕັ້ງຈະມີຜູ້ໃຫ້ບໍລິການຈໍ້າແຈ້ງເອກະສານທັງໝົດ 24 ຕູ້, ເພີ່ມຂຶ້ນ 12 ຕູ້ ຈະສາມາດອໍານວຍຄວາມສະດວກໃຫ້ແກ່ຜູ້ເຂົ້າອອກຫລາຍພໍສົມຄວນ ການຕິດຕັ້ງຕູ້ດັ່ງກ່າວຄາດວ່າຈະໃຫ້ສໍາເລັດກ່ອນບຸນປີໃໝ່ລາວ. ພ້ອມນັ້ນ, ກໍໄດ້ປັບປຸງຈັດສັນສະຖານທີ່ຈອດລົດພາຍໃນດ່ານຄືນໃໝ່ທັງໝົດ, ປັບປຸງທັດສະນີຍະພາບຂອງດ່ານໃຫ້ສອດຄ່ອງກັບ 6 ສ ຂອງນະຄອນຫລວງວາງອອກໂດຍສະເພາະ ສ ສີຂຽວ, ປັດຈຸບັນພວມເລັ່ງໃສ່ການແຕ້ມເສັ້ນຈາລາຈອນ ເພື່ອກໍານົດທິດທາງການ ເຂົ້າ-ອອກຂອງພາຫະນະໃຫ້ມີຄວາມຄ່ອງຕົວ.
ຂໍ້ມູນ: ວຽງຈັນໃໝ່
