ອັດຕາການເກີດຂອງຍີ່ປຸ່ນຫຼຸດລົງ

ຂ່າວຕ່າງປະເທດລາຍງານ ເມື່ອວັນທີ 2 ມີນາ ຜ່ານມາ, ກະຊວງສາທາລະນະສຸກຂອງຍີ່ປຸ່ນໄດ້ເປີດເຜີຍບົດລາຍງານໂດຍລະບຸວ່າ ຈຳນວນເດັກນ້ອຍເກີດໃໝ່ຂອງປະເທດໃນປີ 2022 ຢູ່ທີ່ 799.728 ຄົນ ຫຼຸດລົງຈາກປີ 2021 ເຖິງ 5,1% ຊຶ່ງຖືວ່າຕໍ່າທີ່ສຸດ ນັບຕັ້ງແຕ່ມີການເລີ່ມບັນທຶກຂໍ້ມູນເມື່ອປີ 1899 ສ່ວນໂຕເລກຜູ້ເສຍຊີວິດເພີ່ມຂຶ້ນ 8,9% ເປັນ 1,58 ລ້ານຄົນໃນໄລຍະເວລາດຽວກັນ.

ການຫລຸດລົງນັ້ນໝາຍຄວາມວ່າ ຍີ່ປຸ່ນຈະມີແຮງງານ ແລະ ຜູ້ເສຍພາສີຫລຸດລົງ ສຳລັບການປະຄັບປະຄອງເສດຖະກິດໃນອີກຫລາຍປີຂ້າງໜ້າ ລວມທັງຄ່າໃຊ້ຈ່າຍທີ່ເພີ່ມຂຶ້ນໃນການເບິ່ງແຍງຜູ້ສູງອາຍຸ ຊຶ່ງເປັນອັດຕາສ່ວນຂອງປະຊາກອນທີ່ສູງກວ່າໃນປະເທດ ກຳລັງເຮັດໃຫ້ເງິນກອງທຶນຂອງປະເທດໝົດໄປ ແລະ ອາດຈະສົ່ງຜົນໃຫ້ຍີ່ປຸ່ນເປັນປະເທດທີ່ມີໜີ້ສິນຫລາຍທີ່ສຸດໃນໂລກໄດ້. ທ່ານ ໂຢຊິຮິໂກະ ອິໂຊຊາກິ ຮອງເລຂາທິການຄະນະລັດຖະມົນຕີກ່າວວ່າ: ພວກເຮົາຕ້ອງຍອມຮັບວ່າ ອັດຕາການເກີດທີ່ຫລຸດລົງເປັນສະຖານະການວິກິດ ທ່ານມີຄວາມເຂົ້າວ່າ ປັດໄຈຕ່າງໆເຊື່ອມໂຍງກັນ ເຮັດໃຫ້ບຸກຄົນບໍ່ຄິດເຖິງການແຕ່ງງານ, ການມີລູກ ແລະ ການເບິ່ງແຍງລູກຂອງພວກເຂົາ.

ທັງນີ້, ລັດຖະບານໂຕກຽວພະຍາຍາມເພີ່ມກຳລັງແຮງງານໂດຍສະໜັບສະໜູນໃຫ້ແມ່ຍິງເຮັດວຽກຫລາຍຂຶ້ນ ແລະ ຮັບເອົາຜູ້ອົບພະຍົບບາງສ່ວນເຂົ້າມາ ຊຶ່ງທ່ານ ກິຊິດະ ຟຸມິໂອະ ນາຍົກລັດຖະມົນຕີຍີ່ປຸ່ນໄດ້ໃຫ້ຄວາມສຳຄັນກ່ຽວກັບການສະໜັບສະໜູນເດັກນ້ອຍ ແລະ ຄອບຄົວຂອງພວກເຂົາ. ທ່ານ ອິໂຊຊາກິກ ກ່າວຕື່ມວ່າ: ລັດຖະບານຈະອອກນະໂຍບາຍກ່ຽວກັບການມີລູກ ແລະ ການລ້ຽງລູກ ໂດຍຈະນຳສະເໜີໃນເດືອນມິຖຸນານີ້ ເພື່ອເພີ່ມງົບປະມານໃຫ້ກັບເຂົາເຈົ້າເປັນ 2 ເທົ່າ.