ສານກໍາປູເຈຍສັ່ງກັກຂັງຜູ້ນໍາຝ່າຍຄ້ານ 27 ປີ ພ້ອມຕັດສິນທາງການເມືອງຂໍ້ຫາເປັນກະບົດ
ສານກໍາປູເຈຍຕັດສິນໃນວັນທີ 3 ມີນາ ໃຫ້ກັກຂັງທ່ານ ເກິມ ສຸຂາ (Kem Sokha) ຜູ້ນໍາຝ່າຍຄ້ານຂອງກໍາປູເຈຍໃນເຮືອນພັກເປັນເວລາ 27 ປີ ຫລັງຈາກພິຈາລະນາແລ້ວເຫັນວ່າທ່ານ ເກິມ ມີຄວາມຜິດໃນຂໍ້ຫາເປັນກະບົດ ຂະນະທີ່ອາເມລິກາໄດ້ອອກມາປະນາມວ່າ ຄໍາພິພາກດັ່ງກ່າວນັ້ນຖືກຊຸກຍູ້ດ້ວຍແຮງໃຈທາງການເມືອງ.
ທ່ານ ຄອຍ ຊາວ ຜູ້ພິພາກສາ ຖະແຫລງວ່າ: ນອກຈາກການກັກຂັງທ່ານ ເກິມ ຢູ່ເຮືອນເປັນເວລາ 27 ປີແລ້ວ, ທ່ານຈະຖືກຫ້າມບໍ່ໃຫ້ລົງສະໝັກຕໍາແໜ່ງໃດໆທາງການເມືອງ ແລະ ບໍ່ມີສິດລົງຄະແນນສຽງເລືອກຕັ້ງ.
ສໍານັກຂ່າວຣອຍເຕີລາຍງານວ່າ: ທ່ານ ເກິມ ເຊິ່ງປັດຈຸບັນອາຍຸ 69 ປີໄດ້ຖືກຈັບກຸມໃນປີ 2016 ໃນຂໍ້ຫາສົມຮູ້ຮ່ວມຄິດກັບອາເມລິກາເພື່ອໂຄ່ນອໍານາດທ່ານ ຮຸນເຊນ ນາຍົກລັດຖະມົນຕີກໍາປູເຈຍ ເຊິ່ງຄອງອໍານາດມາເປັນເວລາກວ່າ 40 ປີ ໃນຂະນະທີ່ທ່ານ ເກິມ ປະຕິເສດຂໍ້ກ່າວຫາດັ່ງກ່າວ ແລະ ທາງການອາເມລິກາກໍປະຕິເສດຂໍ້ກ່າວຫານີ້ເຊັ່ນກັນ ໂດຍລະບຸວ່າ: “ນີ້ເປັນທິດສະດີສົມຄົບຄິດເຊິ່ງສ້າງຂຶ້ນບົນຂໍ້ມູນທີ່ບໍ່ມີຄວາມຈິງ”.
