ເວັບແປງ YouTube ເປັນ MP3 ຖືກສານສັ່ງປິດໃຫ້ບໍລິການແລ້ວ
ໃນທີ່ສຸດເວັບໄຊ YouTube-MP3 ເວັບທີ່ໃຫ້ບໍລິການ “YouTube-ripping” (ເບິ່ງໄຟລ໌ຈາກ YouTube) ປ່ຽນວີດີໂອໃນ YouTube ໃຫ້ກາຍເປັນໄຟລ໌ເພງ MP3 ໄດ້ຖືກປິດບໍລິການແລ້ວ ຫຼັງຈາກທີ່ມີຄ້າຍເພງຫຼາຍຄ້າຍໄດ້ຍື່ນຮ້ອງຟ້ອງໄປຫາສານນັບແຕ່ປີ 2016 ໂດຍຫຼັງຈາກບັນລຸຂໍ້ຕົກລົງທາງ Recording Industry Association of America (RIAA) ສະມາຄົມອຸດສາຫະກໍາດົນຕີແຫ່ງອາເມລິກາ.
ການເບິ່ງວີດີໂອຈາກ YouTube ເປັນບັນຫາທີ່ຂ້ອນຂ້າງໃຫຍ່ສໍາລັບວົງການທຸລະກິດ ເຖິງວ່າ YouTube ຈະບໍ່ອະນຸຍາດໃຫ້ດາວໂຫຼດ ຫຼື ແປງວີດີໂອໃນ YouTube ແຕ່ກໍເປັນການຍາກທີ່ຈະປ້ອງກັນ. ມີເວັບຫຼວງຫຼາຍທີ່ໃຫ້ບໍລິການແປງ YouTube ເປັນ MP3 ຖືເປັນໜຶ່ງໃນເວັບຍອດນິຍົມອັນດັບຕົ້ນໆ ທີ່ມີຄົນເຂົ້າຊົມຫຼາຍລ້ານຄັ້ງຕໍ່ວັນ.
ແນ່ນອນວ່າການແປງວີດີໂອໃນ YouTube ເປັນໄຟລ໌ເພງເພື່ອເກັບໄວ້ຟັງ ເປັນການເຮັດໃຫ້ຄ້າຍເພງສູນເສຍລາຍໄດ້ຈາກການໂຄສະນາ ລວມທັງເງິນສ່ວນແບ່ງທີ່ສິລະປິນຈະໄດ້ຮັບ. ຄ້າຍເພງໃຫຍ່ Capitol Records, Warner Bros. Records ແລະ Sony Music ເຊິ່ງເປັນຕົວແທນຂອງ RIAA ຈຶ່ງໄດ້ຍື່ນຟ້ອງໄປຫາສານ ເຖິງວ່າຈະຍັງບໍ່ມີການປະກາດຜົນຢ່າງເປັນທາງການອອກມາ ແຕ່ເບິ່ງຄືວ່າຄ້າຍເພງຈະຊະນະການຮ້ອງຟ້ອງ. ອ້າງອີງຈາກເວັບໄຊ TorrenFreak ໄດ້ລະບຸວ່າ: ທັງສອງຝ່າຍໄດ້ບັນລຸຂໍ້ຕົກລົງເປັນຮຽບຮ້ອຍແລ້ວ.
ສ່ວນໜຶ່ງໃນຂໍ້ຕົກລົງ ຄືການປິດເວັບໄຊ ແລະ ໂອນສິດການເປັນເຈົ້າຂອງເວັບໄປຫາໜຶ່ງໃນຄ້າຍເພງ. ນອກຈາກນີ້ Philip Matesanz ເຈົ້າຂອງເວັບໄຊ YouTube-MP3 ຍັງຖືກສັ່ງຫ້າມຮຽນຮູ້, ອອກແບບ, ນໍາສະເໜີ, ໃຫ້ບໍລິການ ຫຼື ມີສ່ວນຮ່ວມໃນເຕັກໂນໂລຊີໃດໆກໍຕາມທີ່ກ່ຽວຂ້ອງອີກ.
