ຮອງນາຍົກລັດຖະມົນຕີ ຕ້ອນຮັບຄະນະຜູ້ແທນກຸ່ມທະນາຄານໃນຕ່າງປະເທດ ເພື່ອສືບຕໍ່ພົວພັນຮ່ວມມືດ້ານການເງິນ-ທະນາຄານ

ວັນທີ 1 ມີນາ 2023, ທ່ານ ສະເຫລີມໄຊ ກົມມະສິດ ຮອງນາຍົກລັດ ຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ຄະນະຜູ້ແທນ ກຸ່ມທະນາຄານໃນຕ່າງປະເທດ ແລະ ສປປ ລາວ (BRED Group) ຈາກສາທາລະນະລັດ ຝຣັ່ງ ນໍາໂດຍ ທ່ານ ໂອລີວີເອ ແຄລນ (Olivier KLEIN), ຜູ້ບໍລິຫານໃຫຍ່ຂອງກຸ່ມທະນາຄານ ດັ່ງກ່າວ.

ໂອກາດນີ້, ທ່ານ ຮອງນາຍົກລັດຖະມົນຕີ ໄດ້ສະແດງຄວາມຍິນດີຕ້ອນຮັບຄະນະຜູ້ແທນ ເຊິ່ງການຢ້ຽມຢາມ ສປປ ລາວ ຄັ້ງນີ້, ຖືເປັນການປະສ່ວນເຂົ້າໃນການສົ່ງເສີມການພົວພັນຮ່ວມມື ລະຫວ່າງ ສປປ ລາວ ແລະ ສ ຝຣັ່ງ ໂດຍສະເພາະການພົວພັນຮ່ວມມືດ້ານການເງິນ-ທະນາຄານ ແລະ ການຄ້າ-ການລົງທຶນ. ພ້ອມນີ້, ກໍໄດ້ແຈ້ງໃຫ້ຊາບກ່ຽວກັບ ສະພາບພົ້ນເດັ່ນໃນການພັດທະນາເສດຖະກິດ-ສັງຄົມ ຂອງ ສປປ ລາວ ໂດຍສະເພາະການພັດທະນາເສດຖະກິດສີຂຽວ ແລະ ສະອາດ ແນໃສ່ການພັດທະນາແບບຍືນຍົງ ຢູ່ ສປປ ລາວ ແລະ ແຜນນະໂຍບາຍສົ່ງເສີມການຄ້າ-ການລົງທຶນ ຢູ່ ສປປ ລາວ, ພ້ອມທັງໄດ້ສະເໜີຝ່າຍຝຣັ່ງ ສືບຕໍ່ຊຸກຍູ້ ແລະ ດຶງດູດເອົາການຄ້າ-ການລົງທຶນຈາກ ຝຣັ່ງ ເຂົ້າມາ ສປປ ລາວ ໃຫ້ນັບມື້ນັບຫລາຍຂຶ້ນ ໂດຍສະເພາະຢູ່ໃນຂົງເຂດການສົ່ງເສີມທຸລະກິດຂະໜາດກາງ ແລະ ຂະໜາດນ້ອຍ, ການທ່ອງທ່ຽວວັດ ທະນະທໍາ ແລະ ການທ່ອງທ່ຽວທໍາມະຊາດ. ນອກນັ້ນ, ກໍໄດ້ແຈ້ງໃຫ້ຊາບ ກ່ຽວກັບການກະກຽມເປັນປະທານອາຊຽນ ຂອງ ສປປ ລາວ ໃນປີ 2024.

ທ່ານ ໂອລີວີເອ ແຄລນ ຕາງໜ້າໃຫ້ຄະນະ ກໍໄດ້ສະແດງຄວາມຂອບໃຈ ຕໍ່ການຕ້ອນຮັບໃນຄັ້ງນີ້, ພ້ອມທັງສະແດງຄວາມຊົມເຊີຍ ຕໍ່ຜົນສໍາເລັດໃນການພັດທະນາປະເທດຊາດ ຂອງ ສປປ ລາວ ໃນໄລຍະຜ່ານມາ ແລະ ຊົມເຊີຍ ທີ່ ສປປ ລາວ ມີແຜນຈະນໍາພາປະເທດຊາດຫລຸດພົ້ນອອກຈາກສະຖານະພາບດ້ອຍພັດທະນາ ໃນປີ 2026. ພ້ອມທັງກ່າວຕື່ມວ່າ: ກຸ່ມທະນາຄານ ຈະສືບຕໍ່ເຄື່ອນໄຫວ ປະກອບສ່ວນເຂົ້າໃນການສົ່ງເສີມ ການພົວພັນຮ່ວມມືດ້ານການຄ້າ-ການລົງທຶນລະຫວ່າງ ສອງຝ່າຍ ໂດຍສະເພາະບັນຫາທີ່ໄດ້ຫາລືກັນໃນການສົ່ງເສີມທຸລະກິດຂະໜາດກາງ ແລະ ຂະໜາດນ້ອຍ, ການຮ່ວມມືລະຫວ່າງທະນາຄານ, ລວມທັງຂະແໜງການທ່ອງທ່ຽວຢູ່ ສປປ ລາວ ໃຫ້ເພີ່ມຂຶ້ນໃນອະນາຄົດ.