ອິນເດຍບັນທຶກສະຖິຕິເດືອນກຸມພາ ເປັນເດືອນທີ່ຮ້ອນທີ່ສຸດນັບແຕ່ປີ 1901

ກົມອຸຕຸນິຍົມວິທະຍາອິນເດຍພະຍາກອນວ່າ: ໃນຊ່ວງລະດູຮ້ອນນີ້ເຊິ່ງມີເວລາໄປຈົນຮອດເດືອນພຶດສະພາ ອາດເປັນລະດູຮ້ອນທີ່ສາຫັດສໍາລັບອິນເດຍ ຫລັງເດືອນກຸມພາຜ່ານມາ ສ້າງສະຖິຕິເປັນເດືອນກຸມພາທີ່ມີອຸນຫະພູມສູງທີ່ສຸດນັບແຕ່ປີ 1901 ເຊິ່ງເປັນປີທີ່ເລີ່ມເກັບຂໍ້ມູນຢ່າງຖືກຕ້ອງ ດ້ວຍອຸນຫະພູມສະເລ່ຍສູງສຸດ 29,5 ອົງສາ.

ກົມອຸຕຸນິຍົມວິທະຍາອິນເດຍພະຍາກອນໄວ້ວ່າ: ໃນເດືອນມີນາຮອດເດືອນພຶດສະພານີ້ມີຄວາມເປັນໄປໄດ້ຈະມີຄື້ນຄວາມຮ້ອນຮຸນແຮງຂຶ້ນ ໂດຍສະເພາະບໍລິເວນສ່ວນຫລາຍຂອງພາກຕາເວັນອອກສຽງເໜືອ, ພາກຕາເວັນອອກ ແລະ ພາກກາງ ເຊິ່ງຜົນກະທົບທີ່ຕາມມາອາດເຮັດໃຫ້ຕ້ອງເພີ່ມກໍາລັງການຜະລິດໄຟຟ້າຂຶ້ນ ເນື່ອງຈາກຄວາມຕ້ອງການໃຊ້ໄຟຟ້າຂອງປະຊາຊົນຈະເພີ່ມສູງຂຶ້ນ.

ຖືເປັນການປັ່ນປ່ວນຂອງສະພາບອາກາດ, ເຖິງວ່າອິນເດຍຈະມີລະດູຮ້ອນໃນອຸນຫະພູມສູງ ແລະ ມີຄື້ນຄວາມຮ້ອນແຜ່ປົກຄຸມເປັນປົກກະຕິຢູ່ແລ້ວ ໂດຍສະເພາະໃນໄລຍະເດືອນພຶດສະພາຫາເດືອນມິຖຸນາ, ແຕ່ໃນປີຜ່ານມາ ລວມທັງປີນີ້ ລະດູຮ້ອນອາດເລີ່ມໄວຂຶ້ນ ໂດຍເດືອນມີນາປີຜ່ານມາມີການບັນທຶກວ່າເປັນເດືອນມີນາທີ່ຮ້ອນທີ່ສຸດນັບແຕ່ປີ 1901 ເຊັ່ນກັນ ເຮັດໃຫ້ບັນດາຜູ້ຊ່ຽວຊານຕ່າງເບິ່ງວ່າ: ເວລານີ້ອິນເດຍກໍາລັງຜະເຊີນຄື້ນຄວາມຮ້ອນຮຸນແຮງຂຶ້ນ, ເລື້ອຍຂຶ້ນ ແລະ ຍາວນານຂຶ້ນ.

ອຸນຫະພູມທີ່ສູງຂຶ້ນຢ່າງຜິດປົກກະຕິເຮັດໃຫ້ຄວາມຕ້ອງການໃຊ້ໄຟຟ້າຂອງປະຊາຊົນເພີ່ມສູງຂຶ້ນນໍາ ຈົນເຮັດໃຫ້ເກີດໄຟມອດໃນຫລາຍລັດໃນປີຜ່ານມາ ເຊິ່ງຈາກລາຍງານຂອງ Bloomberg ລະບຸວ່າ: ໃນປີນີ້ຄວາມຕ້ອງການໃຊ້ໄຟຟ້າຂອງປະຊາຊົນໄດ້ເພີ່ມຂຶ້ນເກືອບເຖິງລະດັບສູງສຸດເມື່ອບໍ່ດົນມານີ້ ເຮັດໃຫ້ຜູ້ຊ່ຽວຊານຈໍານວນຫລາຍສະແດງຄວາມກັງວົນກ່ຽວກັບຜົນກະທົບທີ່ຮຸນແຮງຕໍ່ຄົນທຸກຍາກ ເຊິ່ງຕ້ອງເຮັດວຽກກາງແຈ້ງ ແລະ ບໍ່ສາມາດເຂົ້າເຖິງຊັບພະຍາກອນທີ່ຊ່ວຍດັບຮ້ອນໄດ້.

ໃນປີ 2022 ດຣ. ຈານເດິນີ ຊິງ ນັກວິທະຍາສາດສິ່ງແວດລ້ອມ ເຄີຍເຕືອນຜ່ານການໃຫ້ສໍາພາດຕໍ່ BBC ວ່າ: ຄື້ນຄວາມຮ້ອນອາດສົ່ງຜົນກະທົບຕໍ່ສຸຂະພາບຢ່າງຮຸນແຮງໄດ້ ຖ້າອຸນຫະພູມສູງຕໍ່ເນື່ອງເຖິງວ່າໃນເວລາກາງຄືນ ໂດຍຮ່າງກາຍຈະບໍ່ມີໂອກາດພັກຟື້ນ ຫລື ຟື້ນຟູຕົນເອງໄດ້ ເຊິ່ງເຮັດໃຫ້ເກີດຄວາມສ່ຽງຈະເຈັບເປັນໄດ້ງ່າຍ ແລະ ກໍ່ໃຫ້ເກີດຄວາມສິ້ນເປືອງໃນການປິ່ນປົວ.

ທັງນີ້, ຈາກຂໍ້ມູນການວິໄຈທີ່ຕີພິມໃນວາລະສານການແພດ Lancet ໃນປີຜ່ານມາ ລະບຸວ່າ: ອິນເດຍມີຜູ້ເສຍຊີວິດຈາກຄວາມຮ້ອນຮຸນແຮງເພີ່ມຂຶ້ນ 55% ໃນໄລຍະປີ 2000-2004 ແລະ 2017-2021.

ອ້າງອີງ:

https://www.bbc.com/news/world-asia-india-64807205