ອາເມລິກາຂີດເສັ້ນຕາຍ 30 ວັນ ສັ່ງໜ່ວຍງານລັດລົບ TikTok ຈາກອຸປະກອນທັງໝົດ
ວັນທີ 27 ກຸມພາ, ທໍານຽບຂາວປະກາດໃຫ້ເວລາໜ່ວຍງານໃນສັງກັດລັດຖະບານກາງ 30 ວັນ ໃນການລົບແອັບພລິເຄຊັນ TikTok ອອກຈາກໂທລະສັບ ແລະ ລະບົບຂອງໜ່ວຍງານລັດທັງໝົດ ແລະ ຫ້າມໃຫ້ມີການຮັບສົ່ງຂໍ້ມູນຜ່ານທາງອິນເຕີເນັດໃນແອັບພລິເຄຊັນດັ່ງກ່າວ ເພື່ອຮັກສາຂໍ້ມູນຂອງລັດຖະບານໃຫ້ປອດໄພ.
ໂດຍໃນເດືອນທັນວາຜ່ານມາ, ສະພາຄອງເກຣດໄດ້ມີການລົງມະຕິຫ້າມພະນັກງານຂອງລັດຖະບານກາງໃຊ້ແອັບພລິເຄຊັນ TikTok ໃນອຸປະກອນຂອງລັດ ແລະ ໃຫ້ເວລາ 60 ວັນ ຕໍ່ຝ່າຍບໍລິຫານຂອງປະທານາທິບໍດີ ໂຈ ໄບເດນ ໃນການອອກຄໍາສັ່ງຕໍ່ໜ່ວຍງານຕ່າງໆ ໂດຍການລົງມະຕິຄັ້ງນີ້ເປັນການດໍາເນີນງານຂອງຝ່າຍນິຕິບັນຍັດຂອງອາເມລິກາໃນການປາບປາມບໍລິສັດຈີນ ທ່າມກາງຄວາມກັງວົນບັນຫາດ້ານຄວາມໝັ້ນຄົງວ່າແອັບພລິເຄຊັນດັ່ງກ່າວອາດຖືກໃຊ້ເປັນເຄື່ອງມືສອດແນມ.
ເຖິງຢ່າງໃດກໍຕາມ, ເຖິງວ່າການຫ້າມໃຊ້ແອັບພລິເຄຊັນດັ່ງກ່າວຈະບໍ່ໄດ້ສົ່ງຜົນກະທົບຕໍ່ຊາວອາເມລິກາທີ່ເປັນປະຊາຊົນຄົນທົ່ວໄປ 100 ກວ່າລ້ານຄົນທີ່ນໍາໃຊ້ TikTok, ແຕ່ພັດກາຍເປັນການເພີ່ມກະແສໃຫ້ແກ່ການຮຽກຮ້ອງໃຫ້ຫ້າມໃຊ້ແອັບພລິເຄຊັນໂດຍສິ້ນເຊີງ ຫລັງກ່ອນໜ້ານີ້ເກີດເຫດບອນລູນຈີນລອຍຢູ່ເໜືອນ່ານຟ້າອາເມລິກາ ເຊິ່ງເຮັດໃຫ້ເກີດກະແສຄວາມກັງວົນດ້ານຄວາມໝັ້ນຄົງຂອງປະເທດເພີ່ມສູງຂຶ້ນ.
ການເຄື່ອນໄຫວຂອງອາເມລິກາສອດຄ່ອງຕໍ່ການດໍາເນີນງານຂອງລັດຖະບານການາດາ ເຊິ່ງໄດ້ປະກາດຫ້າມໃຊ້ TikTok ໃນອຸປະກອນທີ່ອອກໂດຍລັດຖະບານ ໃນວັນທີ 27 ກຸມພາເຊັ່ນດຽວກັນ ໂດຍລະບຸເຫດຜົນວ່າ: ເພື່ອປ້ອງກັນຄວາມສ່ຽງຕໍ່ການເປັນສ່ວນຕົວ ແລະ ຄວາມປອດໄພ ຫລັງຈາກຄວາມຂັດແຍ່ງລະຫວ່າງການາດາ ແລະ ຈີນມີຄວາມເຄັ່ງຕຶງຂຶ້ນກວ່າເກົ່າ. ອີກທັງສະຫະພາບເອີຣົບຍັງມີຄໍາສັ່ງຈາກສະຖາບັນທີ່ກໍານົດນະໂຍບາຍໃຫຍ່ທີ່ສຸດເຖິງສອງແຫ່ງໃຫ້ຫ້າມໃຊ້ TikTok ໃນໂທລະສັບຂອງພະນັກງານ ດ້ວຍເຫດຜົນດ້ານຄວາມປອດໄພທາງໄຊເບີໃນອາທິດຜ່ານມາເຊັ່ນດຽວກັນ.
ອ້າງອີງ:
https://www.reuters.com/…/white-house-gives-agencies…/
