ບໍລິຄຳໄຊ-ບຶງການ ເອກະພາບຮ່ວມກັນລາດຕະເວນທາງນ້ຳຕາມລຳແມ່ນ້ຳຂອງ ເພື່ອແກ້ໄຂບັນຫາຕ່າງໆຕາມຊາຍແດນ

ກອງປະຊຸມເອກະພາບການລາດຕະເວນທາງນ້ຳຕາມລຳແມ່ນ້ຳຂອງຮ່ວມ ລາວ-ໄທ ແຂວງບໍລິຄຳໄຊ ສປປ ລາວ ກັບ ແຂວງບຶງການ ລາຊາອານາຈັກໄທ ໄດ້ຈັດຂຶ້ນວັນທີ 24 ກຸມພາ 2023 ຢູ່ທີ່ຫ້ອງປະຊຸມ ສາລາກາງ ແຂວງບຶງການ, ໂດຍການເປັນປະທານຂອງ ທ່ານ ພັນເອກ ມົງຄົນ ຫໍທອງ ຮອງຜູ້ບັນຊາການກອງກຳລັງສຸລະສັກມົນຕີ ຫົວໜ້າໜ່ວຍປະສານງານປະຈຳພື້ນທີ່ ແຂວງບຶງການ ແລະ ທ່ານ ພັນໂທ ວິສັນ ທິບວົງສາ ຮອງຫົວໜ້າຫ້ອງເສນາທິການ ທະຫານແຂວງບໍລິຄຳໄຊ ຫົວໜ້າຄະນະໜ່ວຍປະສານງານປະຈຳພື້ນທີ່ ແຂວງບໍລິຄຳໄຊ.

ກອງປະຊຸມດັ່ງກ່າວ, ແມ່ນໄດ້ແລກປ່ຽນບົດຮຽນເຊິ່ງກັນ ແລະ ກັນ ໂດຍສະເພາະໃນການເອກະພາບບັນດາເນື້ອໃນຂັ້ນຕອນການປະສານງານ ກໍຄືຂັ້ນຕອນແຕ່ລະບາດກ້າວໃນການລາດຕະເວນທາງນ້ຳຕາມລຳແມ່ນ້ຳຂອງຮ່ວມ ລາວ-ໄທ ບໍລິຄຳໄຊ-ບຶງການ, ເພື່ອແນໃສ່ຮັບປະກັນໃຫ້ການລາດຕະເວນທາງນ້ຳຕາມລຳແມ່ນ້ຳຂອງຮ່ວມ ລາວ-ໄທ ບໍລິຄຳໄຊ-ບຶງການ ໃຫ້ໄດ້ຮັບຜົນສຳເລັດຢ່າງຈົບງາມ ແລະ ຮັບປະກັນໄດ້ຄວາມປອດໄພ, ລວມເຖິງການພົວພັນຮ່ວມມືທີ່ດີຂອງທັງ 2 ປະເທດ ກໍຄື ແຂວງບໍລິຄຳໄຊ ກັບ ແຂວງບຶງການ ໃນການແກ້ໄຂບັນຫາຕ່າງໆຕາມຊາຍແດນ ເປັນຕົ້ນກໍແມ່ນບັນຫາຢາເສບຕິດ, ການຄ້າຂາຍເຖື່ອນ, ການເຂົ້າອອກເມືອງຜິດກົດໝາຍ ຕະຫລອດຮອດບັນຫາອາຊະຍາກຳຕາມລຳແມ່ນ້ຳຂອງເຂດສອງແຂວງໃຫ້ນັບມື້ຫລຸດໜ້ອຍຖອຍລົງເທື່ອລະກ້າວ ແລະ ແນໃສ່ເຮັດໃຫ້ຊາຍແດນກາຍເປັນຊາຍແດນແຫ່ງສັນຕິພາບ, ມິດຕະພາບ ແລະ ມີການພັດທະນາຢ່າງຍືນຍົງ.