WHO ຊີ້ຄວາມສ່ຽງ “ໄຂ້ຫວັດສັດປີກ” ຢູ່ກໍາປູເຈຍຍັງຢູ່ໃນລະດັບຕໍ່າ

ວັນທີ 26 ກຸມພາ, ອົງການອະນາໄມໂລກ ເປີດເຜີຍວ່າ: ຄວາມສ່ຽງຈາກພະຍາດໄຂ້ຫວັດສັດປີກຊະນິດເອ ສາຍພັນ H5N1 ຕໍ່ສາທາລະນະໃນກໍາປູເຈຍຍັງຢູ່ໃນລະດັບຕໍ່າ ເຖິງວ່າມີການກວດພົບຜູ້ຕິດເຊື້ອ 2 ຄົນທໍາອິດນັບແຕ່ປີ 2014 ໃນອາທິດກ່ອນ.

ຖະແຫລງການຈາກອົງການອະນາໄມໂລກລະບຸວ່າ: ຜູ້ຕິດເຊື້ອຄົນທໍາອິດເປັນເດັກຍິງອາຍຸ 11 ປີຈາກແຂວງໄພຣແວງ ທາງຕາເວັນອອກສຽງໃຕ້ຂອງກໍາປູເຈຍ ເຊິ່ງເສຍຊີວິດຈາກເຊື້ອໄວຣັສ H5N1 ໃນວັນທີ 22 ກຸມພາ, ສ່ວນພໍ່ອາຍຸ 49 ປີຖືກພົບວ່າຕິດເຊື້ອໄວຣັສ H5N1 ໃນວັນຕໍ່ມາ ແລະ ປັດຈຸບັນກໍາລັງກັກຕົວຢູ່ໂຮງໝໍແຂວງໄພຣແວງ. ເຖິງຢ່າງໃດກໍດີ, ຜູ້ສໍາຜັດໃກ້ຊິດເດັກຍິງອີກ 11 ຄົນ ມີຜົນກວດເຊື້ອໄວຣັສ H5N1 ເປັນລົບ ໂດຍຜູ້ຕິດເຊື້ອໄວຣັສ H5N1 ເກືອບທັງໝົດກ່ຽວຂ້ອງກັບການສໍາຜັດໃກ້ຊິດກັບນົກຕິດເຊື້ອທີ່ມີຊີວິດ ຫລື ຕາຍແລ້ວ ຫລື ສະພາບແວດລ້ອມທີ່ປົນເປື້ອນເຊື້ອໄວຣັສ.

ອົງການອະນາໄມໂລກລະບຸວ່າ: ຫລັກຖານທີ່ມີໃນປັດຈຸບັນ ຊີ້ວ່າເຊື້ອໄວຣັສ H5N1 ບໍ່ໄດ້ຕິດຕໍ່ສູ່ມະນຸດໄດ້ງ່າຍ ແລະ ການລະບາດຈາກຄົນສູ່ຄົນບໍ່ແມ່ນສິ່ງປົກກະຕິ. ພ້ອມປະເມີນວ່າ: ຄວາມສ່ຽງຈາກເຊື້ອຈາກໄວຣັສ H5N1 ຕໍ່ປະຊາກອນທົ່ວໄປນັ້ນຢູ່ໃນລະດັບຕໍ່າ.

ທ່ານ ລີ ໄອແລນ ຜູ້ແທນອົງການອະນາໄມໂລກປະຈໍາກໍາປູເຈຍ ຍົກຍ່ອງກໍາປູເຈຍດ້ານການຮັບມືການລະບາດຂອງພະຍາດໄຂ້ຫວັດປີກ ສາຍພັນ H5N1 ຢ່າງວ່ອງໄວ.

ທ່ານ ລີ ໄອແລນ ລະບຸວ່າ: ຜູ້ຕິດເຊື້ອທີ່ກວດພົບເປັນຜູ້ຕິດເຊື້ອພະຍາດໄຂ້ຫວັດສັດປີກ ສາຍພັນ H5N1 ສອງຄົນທໍາອິດທີ່ໄດ້ຮັບລາຍງານຈາກກໍາປູເຈຍນັບແຕ່ປີ 2014 ພ້ອມກ່າວວ່າ: ການກວດພົບແຕ່ຫົວທີ່ ແລະ ການຕອບສະໜອງຢ່າງວ່ອງໄວຍັງມີຄວາມສໍາຄັນຕໍ່ການຮັກສາຄວາມປອດໄພໃນປະເທດ ແລະ ທົ່ວໂລກ.

ກະຊວງສາທາລະນະສຸກຂອງກໍາປູເຈຍ ລະບຸວ່າ: ກໍາປູເຈຍພົບຜູ້ຕິດເຊື້ອພະຍາດໄຂ້ຫວັດສັດປີກ 58 ຄົນ ແລະ ຜູ້ເສຍຊີວິດ 38 ຄົນ ນັບແຕ່ປີ 2005 ເຖິງປັດຈຸບັນ.