ທີມຊາດ ສ.ເກົາຫລີ ປະກາດຕັ້ງ ເຈີເກນ ຄລິນມັນ ຄຸມທີມຈົນຈົບບານໂລກ 2026
ສະມາຄົມບານເຕະ ສ.ເກົາຫລີ (KFA) ປະກາດແຕ່ງຕັ້ງ ເຈີເກັນ ຄລິນມັນ ອະດີດຜູ້ຈັດການທີມຊາດເຢຍລະມັນ ເປັນຜູ້ຈັດການທີມຊາດຄົນຢ່າງເປັນທາງການ ຕໍ່ຈາກ ເປົາໂລ ເບນໂຕ ຜູ້ຈັດການທີມຊາວໂປຣຕຸເກສ.
ເບນໂຕ ພາທີມຊາດ ສ.ເກົາຫລີ ໄປເຖິງຮອບ 16 ທີມສຸດທ້າຍກ່ອນຈະເສຍໃຫ້ ບຣາຊິລ ໃນບານເຕະໂລກ 2022 ທີ່ປະເທດກາຕ້າ ຫລ້າສຸດ ຫລັງໃຊ້ເວລາຄົ້ນຫາຜູ້ຈັດການທີມຄົນໃຫມ່ ໂດຍ KFA ໄດ້ປະກາດວ່າ ຄລິນມັນ ອະດີດຈັດການທີມຊາດເຢຍລະມັນຈະເຊັນສັນຍາຄຸມທີມ ສ.ເກົາຫລີ ຈົນເຖິງບານໂລກ 2026 ທີ່ສະຫະລັດອາເມລິກາ, ແຄນາດາ ແລະ ເມັກຊີໂກ ເປັນເຈົ້າພາບ.
“ ຂ້ອຍຮູ້ດີວ່າທີມຊາດ ສ.ເກົາຫລີ ພວມພັດທະນາ ແລະ ມີຜົນງານທີ່ດີມາຕະຫລອດ ຂ້ອຍຮູ້ສຶກເປັນກຽດທີ່ໄດ້ເດີນຕາມຮອຍຍອດຜູ້ຈັດການທີມທີ່ເຄີຍຄຸມທີມຊາດ ສ.ເກົາຫລີ ຕັ້ງແຕ່ ກຸສ ຮິດດິງ ຈົນເຖິງຄົນກ່ອນໜ້າຂ້ອຍ ເປົາໂລ ເບນໂຕ ຂ້ອຍຕັ້ງຕາຄອຍຖ້າທີ່ຈະເຮັດໜ້າທີ່ທີ່ສຸດຄວາມສາມາດເພື່ອຊ່ວຍທີມປະສົບຄວາມສຳເລັດໃນບານເຕະເອຊຽນຄັບ ແລະ ບານໂລກ 2026 ” ຄລິນມັນ ກ່າວ.
ສຳລັບ ຄລິນມັນ ຫວ່າງງານມາໄດ້ສອງປີ ຫລັງຈາກແຍກທາງກັບ ແຮທ່າ ເບີລີນ ໂດຍກ່ອນໜ້ານີ້ເຄີຍຄຸມທີມຊາດເຢຍລະມັນ ແລະ ທີມຊາດສະຫະລັດ ອາເມລິກາ ລວມທັງສະໂມສອນ ບາເຢິນ ມິວນິກ ນຳອີກ.
