ອາກາດຈະສືບຕໍ່ໜາວຕື່ມ ແລະ ມີລົມພັດແຮງຢູ່ບາງທ້ອງຖິ່ນ ໃນວັນທີ 27 ກຸມພາ ຫາ 5 ມີນາ 2023

ກົມອຸຕຸນິຍົມ ແລະ ອຸທົກກະສາດ ລາຍງານວ່າ: ໃນໄລຍະວັນທີ 27 ຫາ 28 ກຸມພາ 2023 ມວນອາກາດໜາວເຢັນທີ່ປະເທດຈີນທີ່ມີກໍາລັງປານກາງ ຫາ ແຮງ ຍັງຈະແຜ່ລົງມາປົກຄຸມຢູ່ທຸກພາກຂອງປະເທດລາວ, ພ້ອມດຽວກັນກະແສລົມຕາເວັນອອກ-ຕາເວັນອອກສ່ຽງເໜືອພັດປົກຄຸມ, ເຊິ່ງຈະເຮັດໃຫ້ອາກາດຈະໜາວເຢັນ ຢູ່ແຂວງພາກເໜືອ, ແຂວງໄຊສົມບູນ ແລະ ເຂດພູພຽງບໍລະເວນ ພ້ອມຈະມີລົມພັດແຮງເປັນບາງໂອກາດ. ສໍາລັບພາກກາງ ແລະ ພາກໃຕ້ ອາກາດເຢັນໃນຕອນກາງຄືນ ຫາ ຕອນເຊົ້າ ແລະ ຈະມີຝົນຕົກຟ້າຮ້ອງ ພ້ອມມີລົມພັດແຮງຢູ່ບາງທ້ອງຖິ່ນ. ຈາກນັ້ນ ວັນທີ 1-5 ມີນາ 2023 ຄວາມກົດດັນສູງຂອງອາກາດ ເຢັນຈະອ່ອນກໍາລັງລົງປົກຄຸມຢູ່ທຸກພາກຂອງປະເທດລາວ, ສົມທົບກັບກະແສລົມຕາເວັນອອກ-ຕາເວັນອອກສ່ຽງໃຕ້ ພັດປົກຄຸມ, ເຊິ່ງຈະເຮັດໃຫ້ອຸນຫະພູມອາກາດຮ້ອນໃນຕອນບ່າຍ ແລະ ຈະມີໝອກແຫ້ງປົກຫຸ້ມໃນຕອນກາງເວັນ ແລະ ມີຝົນຕົກໃນລະດັບຄ່ອຍຢູ່ບາງທ້ອງຖິ່ນແຂວງພາກເໜືອ,

ພາກເໜືອດ້ານຕາເວັນອອກ: ໃນໄລຍະວັນທີ 27-28 ກຸມພາ 2023 ອາກາດເຢັນ ຫາ ໜາວເຢັນ ໃນຕອນເຊົ້າ ອຸນຫະພູມຕໍ່າສຸດ 10–13 ອົງສາ ແລະ ສູງສຸດ 19–23 ອົງສາ. ຈາກນັ້ນວັນທີ 1-5 ມີນາ 2023 ອຸນຫະພູມ ອາກາດຈະເພີ່ມຂຶ້ນ 1-3 ອົງສາ ແລະ ຈະມີຝົນຕົກ ພ້ອມມີລົມພັດແຮງຢູ່ບາງທ້ອງຖິ່ນ ແຂວງຫົວພັນ ອຸນຫະພູມຕໍ່າ ສຸດ 12–15 ອົງສາ ແລະ ສູງສຸດ 25–28 ອົງສາ.

ພາກເໜືອດ້ານຕາເວັນຕົກ: ໃນໄລຍະວັນທີ 27-28 ກຸມພາ 2023 ອາກາດເຢັນ ຫາ ໜາວເຢັນໃນຕອນເຊົ້າ ແລະ ພ້ອມມີລົມພັດແຮງເປັນບາງໂອກາດ ອຸນຫະພູມຕໍ່າສຸດ 11–15 ອົງສາ ແລະ ສູງສຸດ 27–29 ອົງສາ. ຈາກນັ້ນວັນທີ 1-5 ມີນາ 2023 ອຸນຫະພູມອາກາດຈະຮ້ອນໃນຕອນບ່າຍ ພ້ອມມີໝອກແຫ້ງປົກຫຸ້ມຢູ່ທົ່ວໄປໃນຕອນກາງເວັນ ແລະ ຈະມີ ຝົນຕົກໃນລະດັບຄ່ອຍຢູ່ບາງທ້ອງຖິ່ນ ອຸນຫະພູມຕໍ່າສຸດ 14–17 ອົງສາ ແລະ ສູງສຸດ 31–33 ອົງສາ.

ພາກກາງ: ໃນໄລຍະວັນທີ 27-28 ກຸມພາ 2023 ອາກາດເຢັນ ຫາ ໜາວເຢັນໃນຕອນເຊົ້າຢູ່ທົ່ວໄປ. ຈາກນັ້ນ ວັນທີ 1-5 ມີນາ 2023 ອຸນຫະພູມອາກາດໂດຍທົ່ວໄປຈະຮ້ອນຂຶ້ນ ພ້ອມມີລົມພັດແຮງຢູ່ບາງທ້ອງຖິ່ນ ແຂວງຄໍາມ່ວນ ແລະ ສະຫວັນນະເຂດ ອຸນຫະພູມຕໍ່າສຸດ 15–21 ອົງສາ ແລະ ສູງສຸດ 31–32 ອົງສາ.

ສໍາລັບແຂວງ ໄຊສົມບູນ: ໃນໄລຍະວັນທີ 27 ກຸມພາ ຫາ 5 ມີນາ 2023 ອາກາດໜາວເຢັນ ພ້ອມມີຫມອກບາງປົກຫຸ້ມໃນ ຕອນເຊົ້າ ແລະ ຈະມີຝົນຕົກຄ່ອຍ ພ້ອມມີລົມພັດແຮງຢູ່ບາງບໍລິເວນ ອຸນຫະພູມຕໍ່າສຸດ 0–13 ອົງສາ ແລະ ສູງສຸດ 20-22 ອົງສາ.

ພາກໃຕ້: ໃນໄລຍະວັນທີ 27-28 ກຸມພາ 2023 ອາກາດເຢັນໃນຕອນເຊົ້າ ແລະ ອາກາດຮ້ອນ ພ້ອມມີຫມອກແຫ້ງປົກຫຸ້ມໃນຕອນກາງເວັນ ອຸນຫະພູມຕ່ຳສຸດ 19–21 ອົງສາ ແລະ ສູງສຸດ 30–32 ອົງສາ. ຈາກນັ້ນວັນທີ 1-5 ມີນາ 2023 ອາກາດຮ້ອນພ້ອມມີຫມອກແຫ້ງປົກຫຸ້ມໃນຕອນກາງເວັນ ອຸນຫະພູມຕໍ່າສຸດ 21–23 ອົງສາ ແລະ ສູງສຸດ 32-34 ອົງສາ.

ສໍາລັບເຂດພູພຽງບໍລະເວນ: ໃນໄລຍະວັນທີ 27 ກຸມພາ ຫາ 5 ມີນາ 2023 ອາກາດໜາວເຢັນ ພ້ອມມີຫມອກບາງປົກຫຸ້ມ ໃນຕອນເຊົ້າ ແລະ ຈະມີຝົນຕົກໃນລະດັບຄ່ອຍ ພ້ອມມີລົມພັດແຮງ ຢູ່ບາງບໍລິເວນ ອຸນຫະພູມຕ່ຳສຸດ 10-15 ອົງສາ ແລະ ສູງສຸດ 24-27 ອົງສາ.

ນະຄອນຫລວງວຽງຈັນ: ໃນໄລຍະວັນທີ 27 ກຸມພາ ຫາ 5 ມີນາ 2023 ອາກາດເຢັນໃນຕອນເຊົ້າ ແລະ ໃນຕອນບ່າຍ ອາກາດຈະຮ້ອນ ພ້ອມມີໝອກແຫ້ງປົກຫຸ້ມຢູ່ທົ່ວໄປ ແລະ ມີລົມພັດແຮງເປັນບາງໂອກາດຢູ່ບາງບໍລິເວນ ອຸນຫະພູມຕໍ່າສຸດ 16–20 ອົງສາ ແລະ ສູງສຸດ 31–33 ອົງສາ.