ອິດສະລາແອນ-ປາແລັສຕິນ ເຫັນພ້ອມແນວທາງຫລຸດຄວາມຂັດແຍ່ງ ຫລັງຮ່ວມປະຊຸມຫາລືຢູ່ຈໍເຈຍ

ຜູ້ແທນອິດສະລາແອນ ແລະ ປາແລັສຕິນ ເຫັນພ້ອມເຖິງແນວທາງຫລຸດຄວາມຂັດແຍ່ງ ຫລັງຮ່ວມປະຊຸມຫາລືຢູ່ຈໍເຈຍໃນວັນທີ 26 ກຸມພາ ໂດຍມີຜູ້ແທນຈາກອາເມລິກາ ແລະ ອີຢິບເຂົ້າຮ່ວມ ເຊິ່ງທັງໝົດຈະປະສານການຮ່ວມມືລະຫວ່າງກັນ ເພື່ອປ້ອງກັນເຫດຄວາມຮຸນແຮງທີ່ອາດຈະເກີດຂຶ້ນອີກໃນອະນາຄົດ.

ພາຍໃນຖະແຫລງການຮ່ວມ, ອິດສະລາແອນໃຫ້ຄໍາໝັ້ນວ່າຈະໂຈະການຫາລືກ່ຽວກັບການຕັ້ງຖິ່ນຖານໃໝ່ໃນດິນແດນປາແລັສຕິນທີ່ຖືກອິດສະລາແອນຢຶດຄອງເປັນໄລຍະເວລາ 4 ເດືອນ ແລະ ໂຈະການອະນຸມັດການຈັດຕັ້ງຖິ່ນຖານເພີ່ມອີກໃນພື້ນທີ່ດັ່ງກ່າວເປັນໄລຍະເວລາ 6 ເດືອນ.

ໂດຍກອງປະຊຸມຄັ້ງນີ້ມີຂຶ້ນພາຍຫລັງເຫດປະທະກັນຢ່າງຕໍ່ເນື່ອງຂອງອິດສະລາແອນ-ປາແລັສຕິນ ເຊິ່ງຫລາຍຝ່າຍກັງວົນວ່າການໃຊ້ຄວາມຮຸນແຮງອາດເພີ່ມສູງຂຶ້ນໃນໄລຍະສັກສິດຂອງຊາວມຸດສະລິມທີ່ຈະເລີ່ມຕົ້ນຂຶ້ນໃນທ້າຍເດືອນມີນານີ້.

ຂະນະທີ່ຈໍເຈຍ ປະເທດເຈົ້າພາບຈັດກອງປະຊຸມ ລວມທັງຜູ້ສັງເກດການຄືອາເມລິກາ ແລະ ອີຢິບ ຕ່າງເບິ່ງວ່າຂໍ້ຕົກລົງທີ່ເກີດຂຶ້ນຖືເປັນຄວາມກ້າວໜ້າຄັ້ງສໍາຄັນໃນການຟື້ນຟູ ແລະ ຮັດແໜ້ນການພົວພັນລະຫວ່າງອິດສະລາແອນ-ປາແລັສຕິນ ເຊິ່ງທັງສອງຝ່າຍຕົກລົງຈະຮ່ວມຫາລືກັນອີກຢູ່ເມືອງຊາມເອລຊີຂອງອີຢິບໃນເດືອນມີນານີ້.

ປະທານາທິບໍດີ ມາມຸດ ອັບບາສ ຂອງປາແລັສຕິນ ຊີ້ວ່າ: ການຕັດສິນໃຈເຂົ້າຮ່ວມກອງປະຊຸມຢູ່ອັລອະເກາະບະຂອງຈໍເຈຍໃນຄັ້ງນີ້ເກີດຂຶ້ນຈາກແຮງປາຖະໜາທີ່ຢາກຈະຢຸດເຫດນອງເລືອດທີ່ມີມາຢ່າງຍາວນານ.

ປັດຈຸບັນພື້ນທີ່ເຂດເວສແບງເປັນທີ່ຢູ່ອາໄສຂອງຊາວປາແລັສຕິນປະມານ 2,9 ລ້ານຄົນ ແລະ ມີຊາວອິດສະລາແອນເຂົ້າໄປຕັ້ງຖິ່ນຖານຢູ່ໃນພື້ນທີ່ດັ່ງກ່າວປະມານ 475.000 ຄົນ ເຊິ່ງຖືເປັນການກະທໍາທີ່ຂັດຕໍ່ກົດໝາຍສາກົນ ແລະ ຂັດຂວາງແນວທາງສັນຕິພາບທີ່ອາດຈະເກີດຂຶ້ນໃນອະນາຄົດ.

ອ້າງອີງ:

https://www.aljazeera.com/…/israel-and-palestinians…

https://www.timesofisrael.com/pa-agrees-to-yank-un…/

https://www.reuters.com/…/israel-palestinians-agree…/