ເດ ເຄອາ ທຸບສະຖິຕິ ຊະໄມເຄິລ ບໍ່ເສຍປະຕູກັບ ແມນຢູ ຫລັງຊະນະນິວຄາສເຊິລຄວ້າແຊ໊ມລີກຄັບ

ດາບິດ ເດ ເຄອາ ຂຶ້ນຕຳແໜ່ງຜູ້ຮັກສາປະຕູ ແມນເຊສເຕີ ຢູໄນເຕັດ ທີ່ບໍ່ເສຍປະຕູສູງທີ່ສຸດ ຫລັງຊະນະ ນິວຄາສເຊິລ ຄວ້າແຊ໊ມ ຄາຣາບາວ ຄັບ.

ສະຖິຕິທີ່ໜ້າສົນໃຈຫລັງເກມຄາຣາບາວ ຄັບ (ລີກຄັບ) ຮອບຊີງຊະນະເລີດ ເຊິ່ງ ແມນເຊສເຕີ ຢູໄນເຕັດ ເອົາຊະນະ ນິວຄາສເຊິລ ຢູໄນເຕັດ ຄູ່ແຂ່ງຮ່ວມພຣີເມຍລີກ ອັງກິດ ດ້ວຍປະຕູ 2-0 ຄວ້າແຊ໊ມລາຍການນີ້ເປັນສະໄຫມທີ 6 ແລະ ເປັນຂັນໃບທຳອິດໃນຮອບ 6 ປີ ຂອງສະໂມສອນ ນັບຕັ້ງແຕ່ໄດ້ແຊ໊ມລີກຄັບ ແລະ ແຊ໊ມຢູໂຣປາລີກ ລະດູການ 2016-17 ໃນຍຸກຂອງ ໂຈເຊ ມູຮິນໂຢ ນຳອີກ.

ຂະນະດຽວກັນ ດາບິດ ເດ ເຄອາ ຜູ້ຮັກສາປະຕູມືກາວຊາວສະເປນ ຍັງກາຍເປັນຜູ້ຮັກສາປະຕູຂອງແມນຢູ ທີ່ເຮັດສະຖິຕິເກັບຄລີນຊິສ (ບໍ່ເສຍປະຕູ) ຫລາຍທີ່ສຸດຕະຫລອດການເປັນທີ່ຮຽບຮ້ອຍແລ້ວ ດ້ວຍຜົນງານ 181 ຄັ້ງ ຈາກການລົງຫລິ້ນ 523 ນັດ ແຊງ ປີເຕີ ຊະໄມເຄິລ ຕຳນານມືກາວຊາວເດນມາກທີ່ເຄີຍເຮັດໄວ້ 180 ຄັ້ງຈາກ 386 ນັດ ໃນລະຫວ່າງປີ 1991-1999.

ນອກຈາກນີ້ ເດ ເຄອາ ຍັງເຂົ້າໃກ້ກັບການທຳລາຍສະຖິຕິລົງຫລິ້ນໃຫ້ ແມນຢູ ຫລາຍທີ່ສຸດເປັນອັນດັບ 9 ຂອງ ເດນິສ ເອີວິນ ທີ່ເຄີຍເຮັດໄວ້ 529 ນັດໃນປີ 1990-2002 ນຳອີກ.