ເພີ່ມທະວີການສົ່ງເສີມການປະຢັດພະລັງງານ ແລະ ອະນຸລັກພະລັງງານ ເພື່ອເສດຖະກິດທີ່ດີຂຶ້ນ

ວັນທີ 23 ກຸມພາ 2023 ຜ່ານມາ, ກົມສົ່ງເສີມ ແລະ ປະຢັດພະລັງງານ ໄດ້ຈັດກອງປະຊຸມເຜີຍແຜ່ນະໂຍບາຍ, ດຳລັດ ແລະ ລະບຽບການກ່ຽວກັບ ການປະຢັດ ແລະ ອະນຸລັກພະລັງງານ ທີ່ແຂວງສະຫວັນນະເຂດ, ໂດຍການເປັນປະທານຂອງທ່ານ ຄຳໝັ້ນ ສໍປະເສີດ, ຮອງຫົວໜ້າກົມ ສົ່ງເສີມ ແລະ ປະຢັດພະລັງງານ ແລະ ທ່ານ ບຸນລ້ວນ ລີໄຊຍະລາດ, ຫົວໜ້າ ພະແນກພະລັງງານ ແລະ ບໍ່ແຮ່ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ທ່ານ ຮອງຫົວໜ້າກົມ ສົ່ງເສີມ ແລະ ປະຢັດພະລັງງານ ກ່າວວ່າ: ເພື່ອເປັນການສ້າງຈິດສໍານຶກ ແລະ ຄວາມເຂົ້າໃຈກ່ຽວກັບວຽກງານການປະຢັດ ແລະ ອະນຸລັກພະລັງງານຢູ່ໃນທຸກຂະແໜງການເສດຖະກິດ-ສັງຄົມ ໂດຍສະເພາະແມ່ນການເຜີຍແຜ່ຄວາມຮູ້ແນະນໍາວິທີກ່ຽວກັບການປະຢັດ ແລະ ອະນຸລັກພະລັງງານຢູ່ໃນໂຮງງານ, ອາຄານ ແລະ ຂະແໜງການສຶກສາ ໂດຍໄດ້ຮັບການສະໜັບສະໜູນທາງດ້ານເຕັກນິກວິຊາການ ຈາກກະຊວງການຕ່າງປະເທດ ແລະ ການຄ້າ, ລັດຖະບານ ນິວຊີແລນ, ເພື່ອຈັດຕັ້ງປະຕິບັດໂຄງການຊ່ວຍເຫລືອລ້າດ້ານເຕັກນິກວິຊາການ ດ້ານການປະຢັດ ແລະ ອະນຸລັກພະລັງງານ,ໂຄງການດັ່ງກ່າວນີ້ຍັງແມ່ນໜ້າວຽກໜຶ່ງໃນການຈັດຕັ້ງປະບັດວຽກງານທີ່ອໍານວຍຄວາມສະດວກທາງດ້ານພະລັງງານທົດແທນລະຫວ່າງ ສປປ ລາວ ແລະ ນິວຊີແລນ, ເຊິ່ງໄດ້ເຜີຍແຜ່ໃນຫລາຍຫົວຂໍ້ຄື:

1. ນຳສະເໜີນະໂຍບາຍ ແລະ ລັດຖະດຳລັດ ຂອງ ສປປ ລາວ ແລະ ໜ້າທີ່ຄວາມຮັບຜິດຊອບຂອງໂຮງງານ ແລະ ອາຄານຄວບຄຸມ;
2. ນຳສະເໜີກ່ຽວກັບບົດຮຽນ ແລະ ການແບ່ງປັນປະສົບປະການຄຸ້ມຄອງພະລັງງານໃນໂຮງງານ ຈາກປະເທດ ຣາຊາອານາຈັກໄທ, ສ.ສ ຫວຽດນາມ ແລະ ຈາກປະເທດ ອິນເດຍ;
3. ການສ້າງຕົວຊີ້ວັດຂອງການນຳໃຊ້ພະລັງງານ ໃນຂະແໜງການຜະລິດ ແລະ ການບໍລິການ;
4. ນຳສະເໜີ ການເກັບກຳຂໍ້ມູນ, ຂອບເຂດ, ການວິເຄາະ, ການສັງລວມ, ການກວດສອບ ແລະ ການນຳໃຊ້ຂໍ້ມູນພະລັງງານສຳລັບການຄຸ້ມຄອງການຜະລິດ ແລະ ການບໍລິການ.

ຂໍ້ມູນ-ພາບ: ສູນຂ່າວພະລັງງານ ແລະ ບໍ່ແຮ່