ສະເຫລີມສະຫລອງວັນສ້າງຕັ້ງສະຫະພັນນັກຮົບເກົ່າແຫ່ງຊາດຄົບຮອບ 15 ປີ
ພິທີສະເຫລີມສະຫລອງວັນສ້າງຕັ້ງສະຫະພັນນັກຮົບເກົ່າແຫ່ງຊາດລາວ ຄົບຮອບ 15 ປີ (9 ກັນຍາ 2002-9 ກັນຍາ 2017) ໄດ້ຈັດຂຶ້ນໃນວັນທີ 5 ກັນຍານີ້, ຢູ່ຫໍວັດທະນະທໍາແຫ່ງຊາດ, ໂດຍການເຂົ້າຮ່ວມຂອງທ່ານ ພັນຄໍາ ວິພາວັນ ຮອງປະທານປະເທດ, ມີບັນດາທ່ານລັດຖະມົນຕີ, ຮອງລັດຖະມົນຕີ ແລະ ພາກສ່ວນກ່ຽວຂ້ອງຕ່າງໆເຂົ້າຮ່ວມຢ່າງຫລວງຫລາຍ.
ໃນໂອກາດດັ່ງກ່າວ, ທ່ານພົນຈັດຕະວາ ສົມພອນ ແກ້ວມີໄຊ ປະທານສະ ຫະພັນນັກຮົບເກົ່າແຫ່ງຊາດລາວ ໄດ້ຍົກໃຫ້ເຫັນເຖິງການກໍາເນີດ ແລະ ການເຕີບໃຫຍ່ຂະຫຍາຍຕົວຂອງສະຫະພັນນັກຮົບເກົ່າແຫ່ງຊາດລາວຕະຫລອດໄລຍະ 15 ປີຜ່ານມາ, ພາຍໃຕ້ການຊີ້ນໍາ-ນໍາພາຢ່າງໃກ້ຊິດຂອງກົມການເມືອງສູນກາງພັກ, ຄວາມເອົາໃຈໃສ່ຊີ້ນໍາຂອງຄະນະພັກ, ອົງການປົກຄອງທ້ອງຖີ່ນແຕ່ລະຂັ້ນ, ການສະໜັບສະໜູນອຸ້ມຊູຊ່ວຍເຫລືອຂອງບັນດາກະຊວງ-ອົງການ ແລະ ຊັ້ນຄົນຕ່າງໆໃນສັງຄົມ.
ສະຫະພັນນັກຮົບເກົ່າແຫ່ງຊາດໄດ້ຮັບການປັບປຸງ ແລະ ເຕີບໃຫຍ່ຂະຫຍາຍຕົວ, ໂດຍໄດ້ຖືສໍາຄັນ ແລະ ເອົາໃຈໃສ່ຫັນລົງຮາກຖານເກັບກໍາຄວາມຄິດຄວາມເຫັນ ກໍຄືສະພາບການເມືອງແນວຄິດຂອງຖັນແຖວສະມາຊີກ ແລະ ຈັດຕັ້ງສຶກສາອົບຮົມນໍາພາແນວຄິດ, ແກ້ໄຂຄວາມຂັດຂ້ອງໝອງໃຈດວ້ຍຫລາຍຮູບຫລາຍວິທີ, ໄດ້ສົມທົບຮັດແໜ້ນກັບບັນດາກະຊວງ, ອົງການ ແລະ ຄະນະພັກ-ອົງການປົກຄອງແຕ່ລະຂັ້ນ, ພ້ອມເອົາໃຈໃສ່ປັບປຸງນັກຮົບເກົ່າແຕ່ຂັ້ນສູນກາງຮອດທ້ອງຖີ່ນ ຕິດພັນກັບການຈັດຕັ້ງດໍາເນີນກອງປະຊຸມໃຫຍ່ຜູ້ແທນຂອງຕົນ ຢ່າງເປັນປະຈໍາ.
ປັດຈຸບັນ, ທົ່ວປະເທດມີນັກຮົບເກົ່າທັງໜົດ 75.382 ສະຫາຍ ແລະ ເຂົ້າເປັນສະມາຊີກແລ້ວ 57.746 ສະຫາຍ (ທຽບໃສ່ໄລຍະຕົ້ນການສ້າງຕັ້ງເພີ່ມຂຶ້ນ 26%), ມີນັກຮົບເກົ່າຂັ້ນເມືອງ 148 ເມືອງ, ຂັ້ນແຂວງ 17 ແຂວງ ແລະ 1 ນະຄອນຫລວງ.
