ເຕືອນແລ້ວເຕືອນອີກ ! ຢ່າຕົກເປັນເຫຍື່ອຂອງມິດສາຊີບ ທີ່ແອບອ້າງຕົນເປັນພະນັກງານທະນາຄານ

ໄລຍະຜ່ານມາເຮົາຈະມັກ ປາກົດການອງພວກມິດສາຊີບ ພັດທະນາກົນອຸບາຍຕ່າງໆ ເພື່ອມາຫລອກລວງຊອກຫາເຫຍື້ອ ຕາມຊ່ອງທາງຕ່າງທີ່ມິດສາຊີບສາມາດເຂົ້າເຖິງເຫຍື່ອໄດ້ເຊັ່ນ: ຊ່ອງທາງອອນລາຍ, ທາງຂໍ້ຄວາມໂທລະສັບ ແລະ ອື່ນໆ.

ຜ່ານມາເຮົາມັກເຫັນການໂພສປະຈານມິດສາຊີບຕັ້ງເພຈຂາຍເຄື່ອງຕ່າງໆ ຫລອກໃຫ້ເຫຍື່ອໂອນເງິນໃຫ້ ແຕ່ບໍ່ສົ່ງສິນຄ້າໃຫ້, ຕັ້ງເພຈເປັນສະຖາບັນການເງິນປ່ອຍເງິນກູ້ເພື່ອຫລອກເຂົາເງິນຄ່າທຳນຽມໃນການອະນຸມັດປ່ອຍກູ້ ແຕ່ສຸດທ້າຍບໍ່ມີເງິນໃຫ້ກູ້ຕາມທີ່ລົງໂຄສະນາທາງເພຈ, ຕັ້ງກຸ່ມໂຄສະນາຊວນຊື້ຮຸ້ນຢູ່ຕ່າງປະເທດ ອ້າງວ່າມີຜົນຕອບແທນສູງ ທັ້ງໆທີ່ຮຸ້ນທີ່ຊວນຊື້ນັ້ນບໍ່ມີໂຕຕົນ ແລະ ອື່ນໆ.

ຫລ້າສຸດມີມິດສາຊີບໃຊ້ເບີໂທລະສັບໝາຍເລກ 020 57544072 ໄດ້ສົ່ງຂໍຄວາມຫາຄົນທົ່ວໄປຈຳນວນຫລາຍຄົນ. ເຊິ່ງເນື້ອໃນຂໍ້ຄວາມຂອງມິດສາຊີບຄົນນີ້ສົ່ງຫານັ້ນອ້າງວ່າບັນຊີທະນາຄານຂອງເຮົາໄດ້ມີການເຄື່ອນໄຫວເຮັດທຸລະກຳທີ່ໜ້າສົງໄສ ພ້ອມທັງອ້າງວ່າໂຕເອງເປັນພະນັກງານທະນາຄານດັ່ງກ່າວ ແລະ ແຈ້ງວ່າຈະລັອກບັນຊີເຮົາຊົ່ວຄາວ ລົບກວນສົ່ງເບີໂທລະສັບ ແລະ ລະຫັດຜ່ານ ໃຫ້ເພື່ອກວດສອບແກ້ໄຂ ຖ້າບໍ່ໃຫ້ຄວາມຮ່ວມມືຈະໄດ້ມີການລະງັບບັນຊີ ພ້ອມທັງມີການຂອບໃຈຕີນຽນຄວາມເປັນສຸພາບປິດທ້າຍຂອງຂໍຄວາມຫວັງໃຫ້ຜູ້ທີ່ໄດ້ຮັບຂໍ້ຄວາມຕາຍໃຈ.

ຕະຫລອດໄລຍະທີ່ຜ່ານມາເຮົາມັກຈະເຫັນປາກົດການຫລອກລວງແບບນີ້ເກີດຂຶ້ນຢູ່ປະເທດເພື່ອນບ້ານ ແລະ ມີຜູ້ຫລົງເຊື່ອແລະຕົກເປັນເຫຍື່ອຈຳນວນຫລາຍ ສ້າງຄວາມເສຍຫາຍເປັນເງິນຫລາຍຮ້ອຍລ້ານ.

ຫລ້າສຸດທະນາຄານຕ່າງໆໃນລາວກໍອອກມາແຈ້ງເຕືອນເຖິງລູກຄ້າຂອງຕົນວ່າຢ່າໃຫ້ຫລົງເຊື່ອກົນອຸບາຍດັ່ງກ່າວທີ່ມິດສາຊີບເອົາມານຳໃຊ້ ໃນການໂຄສະນາຊວນເຊື່ອການເງິນທາງອອນລາຍຜ່ານຊ່ອງທາງເບີວັອດແອບດັ່ງກ່າວໂດຍເດັດຂາດ.

ຈາກປາກົດໃນຮູບແບບຕ່າງໆຂອງມິດສາຊີດພັດທະນາມານຳໃຊ້ນັ້ນແມ່ນນັບມື້ນັບອັນຕະລາຍຂຶ້ນທຸກມື້ ສະນັ້ນກ່ອນຈະຕັດສິນໃຈເຮັດລະກຳໃດໜຶ່ງຄວນສຶກສາຂໍ້ມູນໃຫ້ລະອຽດກ່ອນຕັດສິນໃຈ ເພື່ອບໍ່ໃຫ້ຕົກເປັນເຫຍື່ອຂອງພວກມິດສາຊີບ.