ກ້າວໜ້າທັນສະໄໝ ເປີດນໍາໃຊ້ແອັບພຸດທະສາສະໜາລາວ ເພື່ອໃຫ້ຄົນລາວເຂົ້າເຖິງສາສະໜາງ່າຍຂຶ້ນ

ວັນທີ 23 ກຸມພາ 2023 ຜ່ານມານີ ກົມພຸດທະສາສະໜາ ສູນກາງແນວລາວສ້າງຊາດ  ເປີດນໍາໃຊ້ແອັບພຸດທະສາດສະໜາລາວ ໂດຍການເຂົ້າ ຮ່ວມຂອງພະອາຈານໃຫຍ່ ບຸນມາ ສີມາພົມ ປະທານສູນກາງອົງການພຸດທະສາດສະໜາສໍາພັນແຫ່ງ ສປປ ລາວ ແລະ ທ່ານ ສິນລາວົງ ຄຸດໄພທູນ ປະທານສູນກາງແນວລາວສ້າງຊາດ.

ການສ້າງແອັບ ພຸດທະສາດສະໜາຄັ້ງນີ້ ເພື່ອເປັນການເຜີຍແຜ່ພຸດທະສາສະໜາລາວໃຫ້ມີລັກສະນະກວ້າງຂວາງ ທັງສ້າງເງື່ອນໄຂສະດວກໃນການເຂົ້າເຖິງແຫລ່ງຂໍ້ມູນຄວາມຮູ້ທັງດ້ານພຸດທະສາສະໜາ ເນື່ອງຈາກໄດ້ສັງລວມເອົາບົດໄຫວ້ ຮີດສິບສອງ ຄອງສິບສີ່, ການເທດສະໜາສັງສອນ ແລະ ນິຕິກໍາຕ່າງໆ ທີ່ກ່ຽວເຖິງວຽກງານພຸດທະສາດສະໜາຂອງລາວ ແລະ ໃນອະນາຄົດຍັງຈະສືບຕໍ່ນໍາເອົາພະໄຕຼປີດົກສະບັບພາສາປາລີ ແລະ ພາສາລາວທີ່ເປັນຫລັກທໍາຄໍາສອນຂອງພຸດທະສາດສະໜາເຂົ້າໃສ່ໃນແອັບດັ່ງກ່າວ ເຊິ່ງຈະເຮັດໃຫ້ຜູ້ທີ່ບໍ່ມີເວລາເຮັດບຸນສິນກິນທານການອຸປະຖໍາ ການປະຕິສັງຂອນວັດວາອາຮາມແມ່ນສາມາດເຂົ້າເບິ່ງແອັບນີ້ໄດ້ຢ່າງສະດວກສະບາຍ, ພ້ອມທັງປະກອບສ່ວນໂຄສະນາການທ່ອງທ່ຽວໂດຍສະເພາະແມ່ນການທ່ອງທ່ຽວທາງດ້ານວັດທະນະທຳ-ຮີດຄອງປະເພນີຂອງຊາດເຮົາອອກສູ່ສາກົນ ແລະ ພາກພື້ນ ເນື່ອງຈາກແອັບນີ້ໄດ້ສັງລວມເອົາບັນດາວັດແລະ ປູຊະນີຍະສານອັນເກົ່າແກ່ຂອງລາວເຮົາ;ຊ່ວຍຍົກສູງບົດບາດການເຄື່ອນໄຫວຂອງອົງການພຸດທະສາສະໜາສຳພັນ ແຫ່ງ ສປປ ລາວ, ເນື່ອງຈາກທຸກການເຄື່ອນໄຫວຂອງຄະນະບໍລິຫານງານສູນກາງອົງການພຸດທະສາດສະ ໜາສໍາພັນແຫ່ງ ສປປ ລາວກໍ່ຄືການຈັດງານບຸນປະເພນີຕ່າງໆ ສາມາດນຳລົງມາໃສ່ແອັບນີ້ລວມເຖິງການລະດົມທຶນ ເພື່ອປະຕິສັງຂອນວັດວາອາຮາມ, ສາສະນະສະຖານຕ່າງໆ ລວມທັງການຊ່ວຍເຫຼືອສັງຄົມສົງເຄາະອື່ນໆ.

ແອັບພຸດທະສາສະໜາລາວມີຊື່ເປັນພາສາອັງກິດວ່າ: Lao Bud, ເປັນແອັບທີ່ເປັນພາສາລາວແຕ່ສາມາດນຳເອົາຂໍ້ມູນທີ່ເປັນພາສາຕ່າງປະເທດມາລົງໃສ່ໄດ້, ປະກອບມີໜ້າສຳຄັນຕົ້ນຕໍຈຳນວນໜື່ງ ຄື: ໜ້າຫລັກ ຫລື ໜ້າທໍາອິດ,ໜ້າພຣະພຸດທະສາສະ ໜາ, ໜ້າຮີດຄອງປະເພນີ ແລະ ໜ້າຂໍ້ມູນຂອງຜູ້ນຳໃຊ້ແອັບ; ໃນໜ້າຫລັກ ແມ່ນໄດ້ນຳສະເໜີກ່ຽວກັບປະຕິທິນ, ບຸນປະເພນີໃນແຕ່ລະໄລຍະ, ການທ່ຽວຊົມວັດອອນລາຍ ແລະ ປະຫວັດການຄົ້ນຫາ. ສ່ວນໜ້າພຣະພຸດທະສາສະໜາ ແມ່ນຈະໄດ້ນໍາ ສະເໜີການໄຫວ້ພະ, ການສູດມົນ, ສະເພາະຫ້ອງອ່ານ ແມ່ນຈະນຳເອົາພຣະໄຕປິດົກ, ຄວາມໄຫວ້ພຣະລາວເດີມ, ຄວາມໄຫວພຣະສົງສໍາມະເນນລາວ.