ອົງການອະນາໄມໂລກກ່າວວ່າ ສະຖານະການໄຂ້ຫວັດສັດປີກໜ້າເປັນຫ່ວງ ຮຽກຮ້ອງທຸກປະເທດເພີ່ມຄວາມລະມັດລະວັງ
ອົງການອະນາໄມໂລກ (WHO) ກໍາລັງຮ່ວມງານກັບເຈົ້າໜ້າທີ່ກໍາປູເຈຍ ຫລັງຈາກມີຄົນໃນຄອບຄົວດຽວກັນຕິດເຊື້ອໄຂ້ຫວັດສັດປີກສາຍພັນ H5N1 ທີ່ໄດ້ຮັບການຢືນຢັນແລ້ວ 2 ຄົນ.
ທ່ານ ດຣ. ຊິວວີ່ ໄບຣອັນ ຜູ້ອໍານວຍການຝ່າຍກຽມຄວາມພ້ອມ ແລະ ປ້ອງກັນການແພ່ລະບາດຂອງພະຍາດ ກ່າວວ່າ: WHO ກໍາລັງທົບທວນການປະເມີນຄວາມສ່ຽງທົ່ວໂລກ ໂດຍພິຈາລະນາຈາກສະຖານະການຫລ້າສຸດ ໂດຍອະທິບາຍເຖິງສະຖານະການດັ່ງກ່າວວ່າ: “ໜ້າກັງວົນ” ເນື່ອງຈາກມີຜູ້ຕິດເຊື້ອທີ່ເປັນນົກ ແລະ ສັດລ້ຽງລູກດ້ວຍນົມເພີ່ມຂຶ້ນເມື່ອບໍ່ດົນມານີ້ ຫລັງຈາກໃນຕົ້ນເດືອນກຸມພາ WHO ໄດ້ປະເມີນວ່າຄວາມສ່ຽງຕໍ່ມະນຸດຈາກພະຍາດໄຂ້ຫວັດສັດປີກຢູ່ໃນລະດັບຕໍ່າ.
ໃນວັນທີ 23 ກຸມພາ, ເຈົ້າໜ້າທີ່ກໍາປູເຈຍເປີດເຜີຍວ່າ: ເຈົ້າໜ້າທີ່ກໍາປູເຈຍເປີດເຜີຍວ່າ: ເດັກຍິງອາຍຸ 11 ປີເສຍຊີວິດຈາກໄວຣັສ H5N1 ແລະ ໄດ້ເລີ່ມການກວດຫາເຊື້ອໄວຣັສຈາກຜູ້ຕິດຕໍ່ໃກ້ຊິດນໍາເດັກຍິງຄົນດັ່ງກ່າວຈໍານວນ 12 ຄົນ ແລະ ພົບວ່າພໍ່ຂອງເດັກຍິງດັ່ງກ່າວຕິດເຊື້ອໄວຣັສ H5N1.
ທ່ານ ດຣ. ໄບຣອັນ ລະບຸວ່າ: “ສະຖານະການ H5N1 ທົ່ວໂລກກໍາລັງໜ້າເປັນຫ່ວງ ເນື່ອງຈາກມີການແພ່ລະບາດຂອງໄວຣັສໃນນົກທົ່ວໂລກ ແລະ ມີການລາຍງານເພີ່ມຂຶ້ນກ່ຽວກັບການຕິດເຊື້ອໃນສັດລ້ຽງລູກດ້ວຍນົມ ລວມທັງມະນຸດ”.
