ກໍາປູເຈຍພົບຜູ້ຕິດເຊື້ອພະຍາດໄຂ້ຫວັດສັດປີກ ສາຍພັນ H5N1 ຄົນທີ 2
ກະຊວງສາທາລະນະສຸກກໍາປູເຈຍເປີດເຜີຍວ່າ: ພົບຜູ້ຕິດເຊື້ອພະຍາດໄຂ້ຫວັດສັດປີກສາຍພັນ N5N1 ຄົນທີ 2 ໃນກໍາປູເຈຍ ໂດຍຜູ້ຕິດເຊື້ອຄົນນີ້ເປັນພໍ່ຂອງເດັກຍິງອາຍຸ 11 ປີທີ່ເສຍຊີວິດຈາກພະຍາດໄຂ້ຫວັດສັດປີກ H5N1 ເມື່ອບໍ່ດົນມານີ້.
ທ່ານ ດຣ. ເລັງ ປານຫຶດ ຜູ້ອໍານວຍການສາທາລະນະສຸກແຂວງໄພຣແວງຂອງກໍາປູເຈຍ ໃຫ້ສໍາພາດຕໍ່ສະຖານີວິທະຍຸວາໂຍ ໂດຍລະບຸວ່າ: ພໍ່ຂອງເດັກຍິງທີ່ເສຍຊີວິດຈາກພະຍາດໄຂ້ຫວັດສັດປີກມີຜົນກວດເປັນບວກ ຫລັງຈາກຖືກນໍາສົ່ງໂຮງໝໍ ແຕ່ຮອດຕອນນີ້ອາການຂອງລາວຍັງບໍ່ຮ້າຍແຮງ.
ສ່ວນຜູ້ຕິດເຊື້ອຄົນອື່ນໆອີກ 11 ຄົນໄດ້ຮັບການກວດຫາເຊື້ອເຊັ່ນກັນ ແຕ່ຍັງບໍ່ຮູ້ຜົນ.
ໃນວັນທີ 22 ກຸມພາຜ່ານມາ, ລູກສາວອາຍຸ 11 ປີຂອງຜູ້ຕິດເຊື້ອພະຍາດໄຂ້ຫວັດສັດປີກຄົນທີ 2 ເສຍຊີວິດຈາກພະຍາດໄຂ້ຫວັດສັດປີກ H5N1. ເຖິງຢ່າງໃດກໍດີ, ຍັງບໍ່ຮູ້ວ່າຊາຍຄົນນີ້ຕິດເຊື້ອຈາກແຫລ່ງດຽວກັບລູກສາວ ຫລື ຕິດເຊື້ອຈາກລູກສາວ.
ນອກຈາກນີ້, ຍັງບໍ່ຮູ້ວ່າເດັກຍິງທີ່ເສຍຊີວິດຄົນດັ່ງກ່າວຕິດເຊື້ອໄດ້ແນວໃດ, ແຕ່ພົບສັດປີກທັງໝົດຢູ່ເຮືອນຫາກໍຕາຍ ເຊິ່ງໄດ້ແກ່ ໄກ່ 22 ໂຕ ແລະ ເປັດ 3 ໂຕ ລວມທັງມີນົກປ່າຕາຍເປັນຈໍານວນຫລາຍຢ່າງຜິດປົກກະຕິ.
ທັງນີ້, ເຊື້ອໄຂ້ຫວັດສັດປີກສາຍພັນ N5N1 ສາຍພັນປັດຈຸບັນແພ່ລະບາດທົ່ວໂລກນັບແຕ່ທ້າຍປີ 2021 ນັບແຕ່ນັ້ນມາ ມີນົກຕາຍຫລາຍກວ່າ 200 ລ້ານໂຕ ເນື່ອງຈາກການຕິດເຊື້ອເອງ ຫລື ຖືກສັ່ງກໍາຈັດເປັນຈໍານວນຫລາຍ ໂດຍສ່ວນຫລາຍຢູ່ເອີຣົບ ແລະ ອາເມລິກາ.
