ພຣີເມຍລີກ ປະກາດລົງໂທດ ລິເວີພູລ ກັບ ເອຟເວີຕັນ ຈາກເຫດກໍ່ຄວາມວຸ້ນວາຍ ໃນເມີຊີໄຊ້ ດາບີ້ແມັດ
ລິເວີພູລ ແລະ ເອຟເວີຕັນ ຖືກຕັ້ງຂໍ້ຫາຈາກເກມທີ່ ແອນຟິວ ເຊິ່ງເຈົ້າບ້ານ ລິເວີພູລ ຊະນະ 2-0 ປະຕູໃນກາງເດືອນທີ່ຜ່ານມາ, ໂດຍ ໂມ ຊາລາ ແລະ ໂຄດີ ກັກໂປ ແບ່ງກັນຄົນລະປະຕູກັນໃນເຄິ່ງເວລາທຳອິດ ແລະ ເຄິ່ງເວລາທີສອງຫົງແດງສາມາດເກັບສາມຄະແນນຈາກທີມເພື່ອນບ້ານໄດ້ຕາມເຄີຍ.
ຢ່າງໃດກໍ່ຕາມ, ກ່ອນຈະໝົດເວລາ 4 ນາທີ, ກອງຫລັງ ແອນດຣູ ໂຣເບີສັນ ໄດ້ມີເຫດປະທະອາລົມກັບຜູ້ຮັກສາປະຕູທີມຢາມ ຈໍແດນ ພິກຟອດ ແຕ່ແທນທີ່ຈະຈົບລົງພຽງເທົ່ານັ້ນ ປະກົດວ່າ ຄອນເນີ ໂຄດີ ກອງຫລັງຂອງ ທັອຟຟີ້ ເຂົ້າມາຈັບຄໍ ໂຣເບີສັນ ຈົນນັກເຕະທັງ 2 ຝ່າຍຫຸ້ມເຂົ້າໃສ່ກັນຢ່າງໜັກຈົນຖືກ ພີເມຍລີກ ຕັ້ງຂໍ້ຫາທັນທີ.ໃນຈັງຫວະນັ້ນ ກອງໜ້າທີມຊາດສະກັອດແລນ ແລະ ຜູ້ຮັກສາປະຕູທີມຊາດອັງກິດທັງສອງໄດ້ຮັບໃບເຫລືອງ, ແຕ່ ໂຄດີ ທີ່ໄດ້ໃບເຫລືອງກ່ອນຢູ່ແລ້ວ ກັບບໍ່ໄດ້ຖືກລົງໂທດຫຍັງເລີຍ.
ຢ່າງໃດກໍ່ຕາມ, ຫລັງຈາກທີ່ທັງສອງທີມຍອມຮັບຂໍ້ກ່າວຫາທີ່ບໍ່ສາມາດຄວບຄຸມພຶດຕິກຳຂອງນັກເຕະໄດ້, ຫລ້າສຸດໃນວັນທີ 22 ກຸມພາ ພຣີເມຍລີກ ໄດ້ປະກາດປັບໃໝທັງສອງທີມ ແຕ່ເປັນຈຳນວນບໍ່ເທົ່າກັນ.
ເອຟເວີຕັນ ແລະ ລິເວີພູລ ຖືກປັບໃໝ 40,000 ປອນ ແລະ 25,000 ປອນ ຕາມລຳດັບ ສຳລັບເຫດການປະທະກັນທີ່ເກີດຂຶ້ນໃນເກມພຣີເມຍລີກ ເມື່ອວັນຈັນ 13 ກຸມພາ ທີ່ຜ່ານມາ.
ຕໍ່ການປັບໃໝທີ່ບໍ່ເທົ່າທຽມກັນຢ່າງສັບສົນ ປະຈຸບັນຍັງບໍ່ທັນໄດ້ມີການແຈ້ງລາຍລະອຽດໃດໆອອກມາ. ແຕ່ຄາດວ່າຄະນະກຳມະການອິດສະລະຈະສົ່ງບົດລາຍງານອະທິບາຍເຫດຜົນໃນໄວໆນີ້.
