ທ່ານ ປູຕິນ ປະກາດໂຈະຂໍ້ຕົກລົງນິວເຄຼຍ ຕອບໂຕ້ທ່ານ ໄບເດນ ເດີນທາງຢ້ຽມຢາມອູແກຣນ

ວັນທີ 21 ກຸມພາ, ປະທານາທິບໍດີ ວະລາດິເມຍ ປູຕິນ ຜູ້ນໍາຣັດເຊຍ ໄດ້ຖະແຫລງຕອບໂຕ້ຕໍ່ການເດີນທາງຢ້ຽມຢາມອູແກຣນຂອງປະທານາທິບໍດີ ໂຈ ໄບເດນ ຂອງອາເມລິກາ ໂດຍໄດ້ສົ່ງຄໍາເຕືອນໄປຫາໂລກຕາເວັນຕົກ ດ້ວຍການສັ່ງໂຈະສົນທິສັນຍາຄວບຄຸມອາວຸດນິວເຄຼຍສະບັບສໍາຄັນນໍາອາເມລິກາ. ຂະນະທີ່ທ່ານ ໄບເດນ ທີ່ຢູ່ລະຫວ່າງການເດີນທາງຢ້ຽມຢາມນະຄອນຫລວງວໍຊໍຂອງໂປໂລຍ ຍັງຢືນຢັນຈະສະໜັບສະໜູນອູແກຣນຢ່າງໜັກແໜ້ນຄືເກົ່າ.

ທັງນີ້, ອາເມລິກາ ແລະ ຣັດເຊຍ ໄດ້ລົງນາມໃນສົນທິສັນຍາ New START ໃນປີ 2010 ໂດຍອະດີດປະທານາທິບໍດີ ບາຣັກ ໂອບາມາ ຂອງອາເມລິກາ ແລະ ອະດີດປະທານາທິບໍດີ ດິມິທຣີ ເມດເວເດບ ຂອງຣັດເຊຍ ເຊິ່ງກໍານົດໃຫ້ແຕ່ລະປະເທດມີຫົວຮົບນິວເຄຼຍປະຈໍາການບໍ່ເກີນ 1.550 ຫົວຮົບ ໂດຍສົນທິສັນຍານີ້ຈະໝົດອາຍຸໃນປີ 2026.

ເຖິງຢ່າງໃດກໍຕາມ, ທ່ານ ປູຕິນ ເນັ້ນວ່າ: ຣັດເຊຍໄດ້ໂຈະການເຂົ້າຮ່ວມໃນຂໍ້ຕົກລົງດັ່ງກ່າວ, ແຕ່ຍັງບໍ່ໄດ້ຖອນຕົວອອກຈາກຂໍ້ຕົກລົງຢ່າງເຕັມຮູບແບບໃນຕອນນີ້.

ອ້າງອີງ:

https://www.reuters.com/…/putin-suspends-nuclear-pact…/

https://www.cbsnews.com/…/russia-putin-us-nuclear…/