ອິຕາລີປະເຊີນໄພແຫ້ງແລ້ງຮອບໃໝ່ ເຮັດໃຫ້ຄອງນ້ຳເມືອງເວນິສແຫ້ງ ເຮືອບໍ່ສາມາດໄປ-ມາໄດ້

ລາຍງານຂອງກຸ່ມນັກວິທະຍາສາດ ແລະ ສິ່ງແວດລ້ອມລະບຸວ່າ: ສະພາບອາກາດໃນລະດູໜາວທີ່ແຫ້ງແລ້ງມາເປັນເວລາຫລາຍອາທິດ ເຮັດໃຫ້ເກີດຄວາມກັງວົນວ່າ: ອິຕາລີອາດຕ້ອງປະເຊີນໄພແຫ້ງແລ້ງອີກໃນປີນີ້ ຫລັງໃນປີ 2022 ອິຕາລີເຄີຍປະເຊີນໄພແຫ້ງແລ້ງຮຸນແຮງທີ່ສຸດໃນຮອບ 70 ປີ ຈົນເຖິງຂັ້ນຕ້ອງປະກາດສະຖານະການສຸກເສີນເພື່ອຮັບມືຕໍ່ສະຖານະການດັ່ງກ່າວ.

ເມືອງເວນິສ ໂດຍປົກກະຕິແລ້ວຜະເຊີນສະພາບນໍ້າຖ້ວມເປັນປະຈໍາ ພັດກໍາລັງປະເຊີນລະດັບນໍ້າທີ່ຫລຸດລົງຢ່າງຜິດປົກກະຕິ ສົ່ງຜົນໃຫ້ບັນດາເຮືອກອນໂດລາ, ເຮືອຕັກຊີ ແລະ ເຮືອພະຍາບານ ບໍ່ສາມາດຂີ່ໄປຕາມຄອງນໍ້າບາງເສັ້ນໄດ້ ໂດຍບັນຫາລະດັບນໍ້າໃນເວນິສຫລຸດລົງມາຈາກຫລາຍປັດໄຈເຊັ່ນ: ຝົນຖິ້ມຊ່ວງ, ລະບົບຄວາມກົດດັນອາກາດສູງ, ພະຈັນເຕັມດວງ ແລະ ກະແສນໍ້າໃນທະເລ.

ນອກຈາກນີ້, ແມ່ນໍ້າ ແລະ ທະເລສາບຫລາຍແຫ່ງໃນອິຕາລີຕ່າງກໍາລັງປະສົບບັນຫາຂາດເຂີນນໍ້າຢ່າງໜັກເຊັ່ນດຽວກັນ ໂດຍສະເພາະທາງຕອນເໜືຂອງປະເທດເຊັ່ນ: ແມ່ນໍ້າໂປ ເຊິ່ງເປັນແມ່ນໍ້າຍາວທີ່ສຸດໃນອິຕາລີ ປັດຈຸບັນມີປະລິມານນໍ້າໜ້ອຍກວ່າປົກກະຕິ 61%.

ໃນເດືອນກໍລະກົດ 2022 ລັດຖະບານອິຕາລີໄດ້ປະກາດສະຖານະການສຸກເສີນສໍາລັບພື້ນທີ່ບໍລິເວນອ້ອມຮອບແມ່ນໍ້າໂປ ເຊິ່ງເປັນ 1 ໃນ 3 ຂອງບໍລິເວນທີ່ມີຜົນຜະລິດທາງກະສິກໍາຂອງປະເທດ ແລະ ຍັງເປັນບໍລິເວນທີ່ປະສົບໄພແຫ້ງແລ້ງສາຫັດຫລາຍທີ່ສຸດໃນຮອບ 70 ປີ.

ອ້າງອີງ:

https://www.reuters.com/…/italy-faces-new-drought…/