ຫົວໜ້າກົມສິລະປະວັດທະນະທຳ ຖວທ ຕິດຕາມກວດກາ ແລະ ຫາລືແກ້ໄຂ ປາກົດການຫຍໍ້ທໍ້ຕ່າງໆຢູ່ແຂວງບໍ່ແກ້ວ

ວັນທີ 17 ກຸມພາ 2023 ນີ້, ທ່ານນາງ ບົວໄຂ ເພັງພະຈັນ ຫົວໜ້າກົມສິລະປະວັດທະນະທຳ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ພ້ອມຄະນະໄດ້ເຄື່ອນໄຫວ ຕິດຕາມກວດກາສະກັດກັ້ນສິ່ງຫຍໍ້ທໍ້ ຜົນກະທົບຕໍ່ວັດທະນະທຳ-ສັງຄົມຢູ່ແຂວງບໍ່ແກ້ວ. ໂດຍການເຂົ້າຮ່ວມຂອງທ່ານ ສົມສັກ ມະຫາຜົນ ຮອງຫົວໜ້າພະແນກ ຖວທ ແຂວງ.

ກອງປະຊຸມກສາຫາລືແກ້ໄຂປາກົດການຫຍໍ້ທໍ້ທີ່ເກີດຂຶ້ນໃນຮ້ານອາຫານ ແລະ ບັນເທີງ, ຮ້ານກິນດື່ມ ແລະ ອື່ນໆທີ່ກໍ່ໃຫ້ເກີດສຽງເນື່ອງນັນລົບກວນປະຊາຊົນທີ່ຢູ່ໃກ້ຄຽງ ແລະ ເວລາເປີດ-ປິດຂອງບັນດາຮ້ານບັນເທິງ ທີ່ຍັງມີຮ້ານບັນເທິງ, ຮ້ານອາ ຫານ ເປີດກາຍໂມງທີ່ໄດ້ຮັບອະນຸຍາດ ພ້ອມທັງປຶກສາຫາລືແກ້ໄຂບັນຫາການເກີດປະກົດການຫຍໍ້ທໍ້ທາງດ້ານຕ່າງໆ ໂດຍສະເພາະບັນຫາການນໍາໃຊ້ຢາເສບຕິດ ທີ່ເກີດຂຶ້ນຢູ່ບາງສະຖານບັນເທິງ, ເພື່ອໃຫ້ມີຄວາມເອກະພາບຮ່ວມກັນແກ້ໄຂ ເພື່ອໃຫ້ການປະສານງານລະຫວ່າງພະແນກ ຖວທ ແຂວງ ແລະ ເຈົ້າໜ້າທີ່ໃຫ້ມີຄວາມສອດຄ່ອງຂຶ້ນ.

ພ້ອມທັງຮ່ວມກັນພິຈາລະນາ ແລະ ປັບປຸງນິຕິກໍາທີ່ໄດ້ຈັດຕັ້ງປະຕິບັດຜ່ານມາ ໃຫ້ສອດຄ່ອງກັບສະພາບຕົວຈິງ ແລະ ຈະນໍາເອົາຄຳຄິດເຫັນຕ່າງໆ ທີ່ໄດ້ຈາກການປຶກສາຫາລືໃນຄັ້ງນີ້ ນໍາມາຂຽນເປັນນິຕິກຳລະອຽດສະເໜີຕໍ່ຂັ້ນເທິງພິຈາລະນາ ເພື່ອເພີ່ມປະສິດທິຜົນໃນການຄຸ້ມຄອງຫົວໜ່ວຍທຸລະກິດດັ່ງກ່າວໃຫ້ເຂົ້າສູ່ລະບຽບການ ແນໃສ່ເຮັດໃຫ້ແຂວງບໍ່ແກ້ວມີຄວາມສະຫງົບໂດຍພື້ນຖານ.