ທ່ານ ຊີກ ແຫ່ງກາຕ້າ ປະກາດສະເໜີໂຕ ເຂົ້າຊື້ສະໂມສອນ ແມນເຊັສເຕີ ຢູໄນເຕັດ
ປະກາດຕົວຮຽບຮ້ອຍສຳລັບ ຊີກ ຢາສຊິມ ບິນ ຮາໝັດ ອັລ ທານີ ປະທານທະນາຄານໃຫຍ່ແຫ່ງກາຕ້າ. ຫລັງສະແດງຄວາມສົນໃຈຂໍຊື້ສະໂມສອນ ແມນເຊັສເຕີ ຢູໄນເຕັດ ທີມດັງຂອງ ພຣີເມຍລີກ ອັງກິດ ຢ່າງເປັນທາງການ.
ຫລັງຈາກຄະນະບໍລິຫານງານຂອງ ແມນເຊັສເຕີ ຢູໄນເຕັດ ເປີດໂອກາດໃຫ້ກຸ່ມລົງທຶນຈາກທົ່ວໂລກສະເໜີເຈລະຈາຊື້ “ແມນເຊັສເຕີ ຢູໄນເຕັດ” ເຊິ່ງມີກຳນົດເວລາ 22:00 ໂມງ ຂອງວັນທີ 17 ກຸມພາ ຕາມເວລາທ້ອງຖິ່ນຂອງອັງກິດ ທ່ານ ຊີກ ຂອງ ກາຕ້າ ກໍ່ໄດ້ສະເຫນີຕົວສໍາລັບການເຈລະຈາຄັ້ງນີ້.
ຊີກ ຢາສຊິມ ເປີດເຜີຍຄວາມຕັ້ງໃຈຂອງລາວຜ່ານຖະແຫລງການຕໍ່ນັກຂ່າວວ່າ “ຈຸດປະສົງຂອງການສະເໜີນີ້ແມ່ນເພື່ອຟື້ນຟູສະໂມສອນໃຫ້ປະສົບຜົນສໍາເລັດ ທັງຢູ່ໃນ ແລະ ນອກສະໜາມ, ແລະ ມີຄວາມຕັ້ງໃຈທີ່ຈະໃຫ້ແຟນບານຂອງທີມກັບມາເປັນຫົວໃຈສຳຄັນຂອງສະໂມສອນ ແມນເຊັສເຕີ ຢູໄນເຕັດ”
“ມູນນິທິ Nine Two Foundation ຂອງ ຊີກ ຢາສຊິມ ຈະຊ່ວຍເບິ່ງແຍງເລື່ອງຂໍ້ສະເໜີການປົດໜີ້ສິນຢ່າງສົມບູນສໍາລັບສະໂມສອນ. ລວມທັງການລົງທຶນພາຍໃນສະໂມສອນ ສະຖານທີ່ຝຶກຊ້ອມ, ສະຫນາມກິລາ, ປັບປຸງພື້ນຖານໂຄງລ່າງ ແລະ ກຸ່ມຊຸມຊົນຂອງແຟນບານເຕະທີ່ໃຫ້ການສະໜັບສະໜູນທີມງານ.
