ພົນເອກ ຈັນສະໝອນ ຈັນຍາລາດ ໄດ້ຮັບຫລຽນກາຊາວໜຸ່ມຕະລຸມບອນ ແລະ ຫລຽນກາລະນຶກ 65 ປີ
ວັນທີ 16 ກຸມພາ 2023 ນີ້ ຢູ່ທີ່ກະຊວງປ້ອງກັນປະເທດ, ໄດ້ມີພິທີມອບຫລຽນກາລະນຶກ 65 ປີ ແຫ່ງວັນສ້າງຕັ້ງຊາວໜຸ່ມປະຊາຊົນປະຕິວັດລາວ (14 ເມສາ 1955-14 ເມສາ 2020) ແລະ ຫລຽນກາຊາວໜຸ່ມຕະລຸມບອນໃຫ້ອະດີດການນຳຊາວໜຸ່ມຕະລຸມບອນ ໂດຍການເຂົ້າຮ່ວມຂອງ ສະຫາຍ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ.
ສະຫາຍ ພັນເອກ ສຸດໃຈ ມະຫາວົງ ເລຂາທິການສູນກາງຊາວໜຸ່ມປະຊາຊົນປະຕິວັດລາວ ຫົວໜ້າຫ້ອງການຊາວໜຸ່ມກອງທັບ ກ່າວວ່າ: ອີງໃສ່ຂໍ້ຕົກລົງຂອງຄະນະບໍລິຫານງານຊາວໜຸ່ມປະຊາຊົນປະຕິວັດລາວ ສະບັບເລກທີ 823/ລຂ ແລະ ເລກທີ 284/ລຂ, ລົງວັນທີ 5 ທັນວາ 2022 ວ່າດ້ວຍການມອບຫລຽນກາຊາວໜຸ່ມຕະລຸມບອນ ແລະ ຫລຽນກາລະນຶກ 65 ປີ ວັນສ້າງຕັ້ງຊາວໜຸ່ມປະຊາຊົນ ປະຕິວັດລາວ, ໂດຍປະຕິບັດຕາມທິດຊີ້ນຳຂອງຄະນະເລຂາທິການສູນກາງພັກກ່ຽວກັບການມອບຫລຽນກາຊາວໜຸ່ມຕະລຸມບອນ ແລະ ຫລຽນກາລະນຶກຄົບຮອບ 65 ປີ ໃຫ້ການນຳຂັ້ນສູງດ້ວຍຮູບການກະທັດຮັດ ແລະ ມີຄວາມໝາຍ, ອີງຕາມການມອບສິດຂອງຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ ແລະ ທິດຊີ້ນຳຂອງກົມໃຫຍ່ການເມືອງກອງທັບ.
ໃນນີ້, ໄດ້ຕົກລົງມອບຫລຽນກາຊາວໜຸ່ມຕະລຸມບອນ ແລະ ຫລຽນກາລະນຶກ ຄົບຮອບ 65 ປີ ໃຫ້ ສະຫາຍ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນປະເທດ, ໂດຍການປະດັບຂອງ ສະຫາຍ ພົນຕີ ວໍລະສານ ວິລັດດາວົງ ກຳມະການຄະນະປະຈຳພັກກະຊວງປ້ອງກັນປະເທດ ຮອງຫົວໜ້າກົມໃຫຍ່ການເມືອງກອງທັບຜູ້ຊີ້ນຳວຽກງານອົງການຈັດຕັ້ງມະຫາຊົນ.
ໂອກາດນີ້, ລັດຖະມົນຕີກະຊວງປ້ອງກັນປະເທດ ກໍໄດ້ສະແດງຄວາມຂອບໃຈມາຍັງສູນກາງຊາວໜຸ່ມປະຊາຊົນປະຕິວັດລາວ ໂດຍສະເພາະແມ່ນຫ້ອງການຊາວໜຸ່ມກອງທັບ ທີ່ໄດ້ນຳເອົາຫລຽນກາຊາວໜຸ່ມຕະລຸມບອນມາມອບໃຫ້ໃນຄັ້ງນີ້ ແລະ ຍົກໃຫ້ເຫັນການເຕີບໃຫຍ່ຂະຫາຍຕົວຂອງຊາວໜຸ່ມໃນເມື່ອກ່ອນຕື່ມອີກ.
