ປກສ ໄຊທານີກວດກາພົບວ່າ ທົ່ວເມືອງມີຮ້ານອາຫານ, ຮ້ານບັນເທີງ 97 ຮ້ານ ມີໃບອະນຸຍາດຖືກຕ້ອງພຽງ 28 ຮ້ານ ພ້ອມບັນທຶກສັນຍາປ້ອງກັນຄວາມສະຫງົບ
ວັນທີ 16 ກຸມພາ 2023 ພະແນກສັນຕິບານ ປກສ ເມືອງໄຊທານີ ນວ, ໄດ້ຈັດກອງປະຊຸມເພື່ອເຮັດບົດບັນທຶກສັນຍາປ້ອງກັນຄວາມສະຫງົບກັບບັນດາຮ້ານອາຫານ, ຮ້ານກິິິນດື່ມ ແລະ ຮ້ານບັນເທີງທົ່ວເມືອງໄຊທານີ ຢູ່ທີ່ຫ້ອງປະຊຸມ ປກສ ເມືອງ ໂດຍການເຂົ້າຮ່ວມເປັນປະທານຂອງທ່ານ ບົວລີ ມະນີວັນ ຮອງເຈົ້າເມືອງໄຊທານີ, ມີ ພັທ ຈັນເພັງ ແກ້ວປະເສີດ ຫົວໜ້າກອງບັນຊາການ ປກສ ເມືອງໄຊທານີ ແລະ ພາກສ່ວນກ່ຽວຂ້ອງເຂົ້າຮ່ວມ.
ພັທ ວິນິດສັກ ຄໍາຟອງວົງພາ ຮອງຫົວໜ້າພະແນກສັນຕິບານ ປກສ ເມືອງໄຊທານີ ລາຍງານວ່າ: ໃນໄລຍະປີ 2022 ພະແນກສັນຕິບານ ປກສ ເມືອງໄຊທານີ ໄດ້ສົມທົບກັບຫ້ອງການຖະແຫຼ່ງຂ່າວ-ວັດທະນະທໍາ ແລະ ທ່ອງທ່ຽວ, ຄະນະສະເພາະກິດຂັ້ນເມືອງ, ປກສ ກຸ່ມ ແລະການຈັດຕັ້ງບ້ານລົງເຄື່ອນໄຫວໂຄສະນາ ໂດຍນໍາເອົາກົດໝາຍ, ນິຕິກຳ, ແຈ້ງການ, ຂໍ້ຕົກລົງຂັ້ນຕ່າງໆຂອງຂັ້ນເທີງລົງເຜີຍແຜ່ໃຫ້ບັນດາຮ້ານອາຫານ, ຮ້ານກິນດື່ມ ແລະຮ້ານບັນເທີງທົ່ວເມືອງໄຊທານີໃຫ້ໄດ້ຮັບຮູ້ ແລະ ເຂົ້າໃຈໂດຍສະເພາະຂໍ້ຕົກລົງວ່າດ້ວຍການຄວບຄຸມສຽງເນື່ອງນັນ ຂອງເຈົ້າຄອງນະຄອນຫຼວງວຽງຈັນ ສະບັບເລກທີ 620/ຈນວ, ລົງວັນທີ 29 ມັງກອນ 2022; ພ້ອມທັງໄດ້ເກັບກຳສະຖິຕິຫົວໜ່ວຍທຸລະກິດຮ້ານອາຫານ, ຮ້ານກິນດື່ມ ແລະ ຮ້ານບັນເທີງ ທົ່ວເມືອງໄຊທານີ ມີທັງໝົດ 97 ຮ້ານ ໃນນີ້ມີໃບທະບຽນ ແລະ ໃບອະນຸຍາດດຳເນີນທຸລະກິດຖືກຕ້ອງ 28 ຮ້ານ, ບໍ່ມີໃບທະບຽນ, ບໍ່ມີໃບອະນຸຍາດດໍາເນີນທຸລະກິດ 43 ຮ້ານ ແລະ ໃບອະນຸຍາດດໍາເນີນທຸລະກິດໝົດອາຍຸ 26 ຮ້ານ.
ທ່ານ ບົວລີ ແກ້ວມະນີວັນ ຮອງເຈົ້າເມືອງໄຊທານີ ໄດ້ກ່າວເນັ້ນໜັກໃຫ້ເຈົ້າຂອງກິດຈະການຮ້ານອາຫານ, ຮ້ານກິນດື່ມ ແລະຮ້ານບັນເທີງທົ່ວເມືອງໄຊທານີເອົາໃຈໃສ່ຄື: ກ່ອນເປິດກິດຈະການຮ້ານອາຫານ, ຮ້ານກິນດື່ມ ແລະຮ້ານບັນເທີງ ຕ້ອງໄດ້ຮັບອະນຸຍາດກ່ອນທຸກໆຄັ້ງ ແລະທຸກໆຮ້ານຕ້ອງປະກອບທຸລະກິດໃຫ້ຖືກຕ້ອງຕາມໃບອະນຸຍາດຂອງຕົນທີ່ກຳນົດໄວ້; ບໍ່ຄວນເປີດເຄື່ອງສຽງດັງເກີນທີ່ກົດໝາຍກຳນົດ, ເວລາເປີດ-ປິດຮ້ານ ຕ້ອງໃຫ້ຖືກຕ້ອງຕາມໂມງເວລາທີ່ໄດ້ກຳນົດໃຫ້ ແລະ ເດັດຂາດບໍ່ໃຫ້ຜູ້ປະກອບກິດຈະການນຳໃຊ້ຮ້ານອາຫານ, ຮ້ານກິນດື່ມ ແລະຮ້ານບັນເທີງເປັນບ່ອນມົ້ວສຸມ ແລະຈຳໜ່າຍສິ່ງເສບຕິດທຸກປະເພດ; ບໍ່ຄວນຂຶ້ນລາຄາອາຫານເກີນຄວາມເປັນຈິງ ແລະ ຈິງໃຈມອບພັນທະເສຍອາກອນເຂົ້າລັດໃຫ້ທັນຕາມເວລາທີ່ຂັ້ນເທິງກຳນົດ.
