ນໍ້າໃສໄຟສະຫວ່າງທາງດີ ເປັນບໍ່ເກີດຂອງຄວາມຈະເລີນ

ໂດຍ: ທິດກໍ່າ

ໃນຍຸກປັດຈຸບັນ ເວົ້າໄດ້ວ່າ ສປປ ລາວຂອງພວກເຮົາ ແມ່ນໄດ້ຮັບການສ້າງສາພັດທະນາຢ່າງຮອບດ້ານ. ສິ່ງທີ່ຢັ້ງຢືນໃຫ້ເຫັນຢ່າງຈະແຈ້ງປະຈັກຕາກໍມີຫລາຍໆດ້ານ ນັບແຕ່ການສ້າງຖະໜົນຫົນທາງ, ໄຟຟ້າ, ນໍ້າປະປາ, ໂຮງຈັກ, ໂຮງງານ, ໂຮງໝໍ, ໂຮງຮຽນ, ສະຖາບັນການສຶກສາ ນັບທັງພາກລັດ ແລະ ເອກະຊົນ, ຕຶກອາຄານຫ້າງຮ້ານ, ສໍານັກງານອົງການພວມເກີດຂຶ້ນປານດອກເຫັດໃນແຕ່ລະເຂດແຂວງຂອງ ສປປ ລາວ.

ນອກຈາກທີ່ກ່າວມານີ້ແລ້ວ ສະເພາະໃນຂົງເຂດເສດຖະກິດກໍນັບມື້ກໍ່ຕົວ ແລະ ຂະຫຍາຍຕົວຢ່າງມາກມາຍຫລວງຫລາຍເຊັ່ນ: ເຂດເສດຖະກິດພິເສດ, ເຂດເສດຖະກິດສະເພາະ, ນິຄົມອຸດສາຫະກຳ, ນິຄົມປູກຝັງ, ລ້ຽງສັດນ້ອຍສັດໃຫຍ່ງົວ, ຄວາຍ, ລ້ຽງໝູ, ລ້ຽງເປັດ, ລ້ຽງໄກ່ ແລະ ອື່ນໆ. ສ່ວນການປູກນັ້ນກໍມີສວນກ້ວຍ, ສວນກາເຟ, ສວນມັນຕົ້ນ, ໝາກກ້ຽງ ແລະ ປະເພດອື່ນໆທີ່ເປັນທ່າແຮງເສດຖະກິດໃນປັດຈຸບັນ ແລະ ອະນາຄົດ. ນີ້ເປັນພຽງພາບລວມທີ່ໄດ້ຍົກຂຶ້ນໃຫ້ເຫັນເພື່ອເປັນການຢັ້ງຢືນເຖິງການພັດທະນາສ້າງສາໃນຍຸກປັດຈຸບັນຂອງ ສປປ ລາວ.

ສິ່ງທີ່ຢາກເວົ້າສະເພາະເຈາະຈົງໃນບົດນີ້ກໍແມ່ນເລື່ອງ “ນໍ້າໃສ ໄຟສະຫວ່າງ ທາງດີ" ອັນເປັນສັນຍະລັກທີ່ບົ່ງບອກຄວາມຈະເລີນຂອງຊາດບ້ານເມືອງຕາມສຸພາສິດບູຮານໄດ້ກ່າວມາແຕ່ປະຖົມບູຮານ. ຄໍາວ່າ: ນໍ້າໃສນັ້ນກໍໝາຍເຖິງ ໃນປັດຈຸບັນ ປະຊາຊົນບັນດາເຜົ່າເຮົາໃນທົ່ວປະເທດສາມາດບໍລິໂພກນໍ້າສະອາດຕາມຫລັກອະນາໄມໂດຍທົ່ວເຖິງກັນໝົດແລ້ວ, ສ່ວນໄຟສະຫວ່າງ ໝາຍເຖິງ ປະຊາຊົນເຮົາກໍສາມາດຊົມໃຊ້ໄຟຟ້າໃນທຸກບ້ານ, ທຸກເມືອງ, ທຸກແຂວງໃນທົ່ວປະເທດກັນໝົດແລ້ວ ແລະ ອັນສຸດທ້າຍຄືການເດີນທາງໄປມາກໍນັບມື້ສະດວກສະບາຍ ເພາະມີເສັ້ນທາງຄົມມະນາຄົມຂົນສົ່ງໄປຮອດຈອດເຖິງແຕ່ເໜືອຮອດໃຕ້, ແຕ່ຕົວເມືອງເຖິງຊົນນະບົດ, ບ້ານຕໍ່ບ້ານ, ເມືອງຕໍ່ເມືອງ, ແຂວງຕໍ່ແຂວງໃນທົ່ວປະເທດ. ອັນທີ່ສະດວກສະບາຍກວ່ານັ້ນກໍແມ່ນມີຮອດສາຍທາງດ່ວນ ນັບທັງເສັ້ນທາງລົດໄຟຄວາມໄວສູງ ອັນເປັນທາງເລືອກຂອງຜູ້ຕ້ອງການເດີນທາງທ່ອງທ່ຽວໄປມາ ແລະ ຂົນສົ່ງສິນຄ້າ.

ຢ່າງໃດກໍດີ, ສະພາບການພັດທະນາໂດຍລວມ ຖືວ່າເປັນໄປຕາມໄລຍະຕາມຂັ້ນຕອນ ແຕ່ອາດຍັງບາງສິ່ງບາງຢ່າງທີ່ຍັງຕ້ອງໄດ້ປັບປຸງແກ້ໄຂ ແລະ ພັດທະນາ ຂຶ້ນໄປຕື່ມ ເປັນຕົ້ນແມ່ນເສັ້ນທາງທີ່ເປ່ເພແລ້ວ ຕ້ອງປັບປຸງແກ້ໄຂໃຫ້ທ່ວງທັນ, ການຈັດສັນງົບປະມານໃນການພັດທະນາ ຕ້ອງໃຫ້ພໍເໝາະພໍດີ, ລະບົບນໍ້າປະປາ ຍາມແລ້ງຂາດເຂີນ ຍາມຝົນຂຸ່ນ, ໄຟຟ້າ ຕົກຢູ່ເປັນປະຈຳໃນບາງເຂດ, ໄຟເຍືອງທາງບາງບ່ອນມີແຕ່ເສົາ ແຕ່ບໍ່ສາມາດໃຊ້ການໄດ້ ເຊິ່ງອັນນີ້ ຄືຍັງເປັນບັນຫາຄົງຄ້າງ ແລະ ຊຳເຮື້ອຍາວນານ ທຸກໆຂອງປະຊຸມແຕ່ລະຂັ້ນກໍມັກຈັບຂຶ້ນມາເວົ້າຢູ່ເປັນປະຈຳ ແຕ່ຂອດການປະຕິບັດອາດຍັງບໍ່ໄດ້ເທົ່າທີ່ຄວນ ເຊິ່ງພາກສ່ວນກ່ຽວຂ້ອງຕ້ອງເອົາໃຈໃສ່ ແລະ ກວດກາຄືນ.

ສະຫລຸບແລ້ວ, ນັບແຕ່ປະເທດຊາດບ້ານເມືອງຂອງພວກເຮົາໄດ້ສະຖາປະນາເປັນ ສປປ ລາວ ມາໄດ້ 47 ປີ ປະເທດຊາດໄດ້ມີການສ້າງສາພັດທະນາຢ່າງບໍ່ຢຸດຢັ້ງ ປະກອບໄປດ້ວຍປັດໄຈຫລັກມາດຕະຖານຄື ນໍ້າໃສ ໄຟສະຫວ່າງ ທາງດີ ເປັນບໍ່ເກີດຂອງຄວາມຈະເລີນ. ການທີ່ປະເທດຊາດບ້ານເມືອງຂອງພວກເຮົາມີປັດໄຈທີ່ກ່າວມານີ້ ມັນສະແດງໃຫ້ເຫັນເຖິງຄວາມເອົາໃຈໃສ່ໃນການສ້າງສາພັດທະນາປະເທດຊາດຕາມແນວທາງນະໂຍບາຍຂອງພັກ ແລະ ລັດຖະບານໃນຍຸກປ່ຽນແປງໃໝ່ ເພື່ອນໍາພາປະເທດຊາດຫລຸດພົ້ນອອກຈາກຄວາມທຸກຍາກ ແລະ ດ້ອຍພັດທະນາໃນອະນາຄົດ.