ລັດສະໝີ ຍາດໄດ້ 2 ຫລຽນຄຳ ກິລາຍົກນໍ້າໜັກ ໃຫ້ທີມນັກກິລາ ນວ ໃນ “ຊຽງຂວາງ ພາຣາເກມ”

ນາງ ລັດສະໝີ ສີປະເສີດ ນັກກິລາຍົກນໍ້າໜັກຄົນພິການທີມຊາດລາວ ເຈົ້າຂອງ 2 ຫຼຽນເງິນ ຮຸ່ນນໍ້າໜັກບໍ່ເກີນ 41 ກິໂລ ງານກິລາອາຊຽນ ພາຣາເກມ ຄັ້ງທີ 11 ປີ 2022 ທີ່ເມືອງໂຊໂລ ປະເທດອິນໂດເນເຊຍ ແລະ ທັງເປັນເຈົ້າຂອງຫຼຽນທອງຍົກນໍ້າໜັກຊີງແຊັມໂລກ ສ້າງຜົນງານໄດ້ຢ່າງໂດດເດັ່ນຕໍ່ເນື່ອງ ຫຼ້າສຸດສາມາດຍາດມາໄດ້ອີກ 2 ຫຼຽນຄຳ ໃຫ້ທີມນັກກິລາຄົນພິການ ນະຄອນຫຼວງວຽງຈັນ ຫຼື ນວ ໃນງານມະຫະກຳກິລາຄົນພິການແຫ່ງຊາດ ຄັ້ງທີ 3 ຫຼື “ຊຽງຂວາງ ພາຣາເກມ” ທີ່ແຂວງຊຽງຂວາງ ເປັນເຈົ້າພາບ. ຂະນະທີ່ ທ້າວ ເອື້ອຍ ສີມາຍ ກໍຍັງເກັ່ງສົມດີກຣີທີມຊາດ ເຊັ່ນກັນ ຍາດໄດ້ 2 ຫຼຽນຄຳ ໃຫ້ທີມນັກກິລາຄົນພິການ ແຂວງບໍລິຄຳໄຊ.

ພິທີມອບ-ຮັບຫຼຽນກິລາຍົກນໍ້າໜັກ “ຊຽງຂວາງ ພາຣາເກມ” ໄດ້ມີຂຶ້ນວັນທີ 14 ກຸມພາ ຜ່ານມາ ທີ່ພະແນກແຜນການ ແລະ ການລົງທຶນແຂວງຊຽງຂວາງ, ໃຫ້ກຽດເຂົ້າຮ່ວມ ແລະ ມອບຫຼຽນໂດຍ ທ່ານ ກິແກ້ວ ໄຂຄຳພິທູນ ຮອງນາຍົກລັດຖະມົນຕີ ແຫ່ງ ສປປ ລາວ, ທ່ານ ພຸດ ສິມມາລາວົງ ລັດຖະມົນຕີກະຊວງສຶກສາທິການ ແລະ ກິລາ, ທ່ານ ບຸນຈັນ ສີວົງພັນ ເຈົ້າແຂວງຊຽງຂວາງ ແລະ ທ່ານ ນາງ ຂັນທະລີ ສີຣິພົງພັນ ຮອງລັດຖະມົນຕີ ກະຊວງສຶກສາທິການ ແລະ ກິລາ ທັງເປັນປະທານຄະນະກຳມະການພາຣາແລັມປິກແຫ່ງຊາດລາວ, ມີຄະນະນຳ, ຄູຝຶກ, ນັກກິລາ ແລະ ມວນຊົນຊາວແຂວງຊຽງຂວາງເຂົ້າຮ່ວມເປັນສັກຂີພິຍານ.

ການແຂ່ງຂັນກິລາ “ຊຽງຂວາງ ພາຣາເກມ” ມີການຊີງໄຊທັງໝົດ 7 ປະເພດກິລາ ທີ່ຄະນະກຳມະການພາຣາແລັມປິກແຫ່ງຊາດລາວ ກຳນົດໃຫ້ແຂ່ງຂັນ ເພື່ອເປັນການຄັດເລືອກນັກກິລາຜູ້ທີ່ມີພອນສະຫວັນດີເດັ່ນ ກຽມຕາງ ໜ້າຮັບໃຊ້ທີມຊາດ ຮ່ວມ ອາຊຽນ ພາຣາເກມ ຄັ້ງທີ 12 ທີ່ຈະຈັດຂຶ້ນໃນເດືອນມິຖຸນາ ປີ 2023 ທີ່ປະເທດກຳປູເຈຍ ຊຶ່ງໜຶ່ງໃນນັ້ນກໍມີການແຂ່ງຂັນກິລາຍົກນໍ້າໜັກ ໃນ “ຊຽງຂວາງ ພາຣາເກມ” ມີການຊີງໄຊກັນທັງໝົດ 24 ຫຼຽນຄຳ ມີນັກກິລາ ຈຳນວນ 44 ຄົນ ຍິງ 6 ຄົນ ທີ່ມາຈາກ 13 ແຂວງ ແລະ 1 ນະຄອນຫຼວງວຽງຈັນ.

ສຳລັບໃນມື້ທຳອິດ ມີການແຂ່ງຂັນ 5 ລາຍການ, ຍິງ 3 ລາຍການ ຄື: ຮຸ່ນນໍ້າໜັກ 41 ກິໂລ, 45 ກິໂລ ແລະ 50 ກິໂລ ສ່ວນປະເພດຊາຍ ມີຮຸ່ນນໍ້າໜັກ 49 ກິໂລ ແລະ 54 ກິໂລ. ຜ່ານການແຂ່ງຂັນປະກົດວ່າ: ຮຸ່ນນໍ້າໜັກ 45 ກິໂລຍິງ ນາງ ລັດສະໝີ ສີປະເສີດ ຈາກນະຄອນຫຼວງວຽງຈັນ ສາມາດຍາດມາໄດ້ 2 ຫຼຽນຄຳ ຫຼັງຍົກໄດ້ຈາກຄະແນນສູງສຸດ 70 ກິໂລ ແລະ ຄະແນນລວມ 135 ຄະແນນ ສ່ວນຫຼຽນເງິນ ເປັນຂອງ ນາງ ສຸກສະໝອນ ກິດຕິພັນ ຈາກນະຄອນຫຼວງວຽງຈັນ ແລະ ຫຼຽນທອງ ນາງ ຢື ໂຄດໂຍທາ ຈາກແຂວງອັດຕະປື; ຮຸ່ນນໍ້າໜັກ 41 ກິໂລຍິງ (ມີຄົນດຽວຮ່ວມແຂ່ງຂັນ) ຫຼຽນຄຳ ເປັນຂອງ ນາງ ແດງມະນີ ສີບຸນເຮືອງ ຈາກແຂວງເຊກອງ ແລະ ຮຸ່ນນໍ້າໜັກ 50 ກິໂລຍິງ (ມີຄົນດຽວຮ່ວມແຂ່ງຂັນ) ຫຼຽນຄຳ ເປັນຂອງ ນາງ ລັດດາວອນ ມະນີເພັດ ຈາກແຂວງວຽງຈັນ.

ຂະນະທີ່ ຮຸ່ນນໍ້າໜັກ 54 ກິໂລຊາຍ 2 ຫຼຽນຄຳ ເປັນຂອງທ້າວ ເອື້ອຍ ສີມາຍ ຈາກແຂວງບໍລິຄຳໄຊ ຍົກໄດ້ຄະແນນສູງສຸດ ແລະ ຄະນະລວມສູງສຸດ, 2 ຫຼຽນເງິນ ເປັນຂອງທ້າວ ວຽງຄຳ ໄຊຍະແສງ ຈາກນະຄອນຫຼວງວຽງຈັນ ຍົກໄດ້ຄະແນນອັນດັບທີ 2 ແລະ ຄະແນນລວມ ອັນດັບທີ 2 ແລະ 2 ຫຼຽນທອງຮ່ວມ ເປັນຂອງທ້າວ ແກ້ວສີ ວັນນີສອນ ຈາກແຂວງເຊກອງ ແລະ ທ້າວ ລອນ ຈາກແຂວງຫົວພັນ ຍົກໄດ້ຄະແນນອັນດັບທີ 3 ແລະ ຄະແນນລວມ ອັນດັບທີ 3; ຮຸ່ນນໍ້າໜັກ 49 ກິໂລ 2 ຫຼຽນຄຳ ເປັນຂອງທ້າວ ເປ້ຍ ລາວພັກດີ ຈາກແຂວງວຽງຈັນ ຍົກໄດ້ຄະແນນສູງສຸດ ແລະ ຄະນະລວມສູງສຸດ, 2 ຫຼຽນເງິນ ເປັນຂອງທ້າວ ບຸນໜາ ສີດາບຸດ ຈາກແຂວງຄຳມ່ວນ ຍົກໄດ້ຄະແນນອັນດັບທີ 2 ແລະ ຄະແນນລວມ ອັນດັບທີ 2 ແລະ 2 ຫຼຽນທອງ ຮ່ວມ ເປັນຂອງທ້າວ ສົມແພງ ມະນີໝື່ນ ຈາກແຂວງຫຼວງນໍ້າທາ ແລະ ທ້າວ ແສງ ກົມມະດຳ ຈາກແຂວງຈຳປາສັກ ຍົກໄດ້ຄະແນນອັນດັບທີ 3 ແລະ ຄະແນນລວມ ອັນດັບທີ 3.