ອົງການອະນາໄມໂລກກ່າວວ່າ ພະຍາດໝາກສຸກລີງຍັງເປັນ ສະຖານະການສຸກເສີນດ້ານສາທາລະນະສຸກສາກົນ
ອົງການອະນາໄມໂລກ (WHO) ເປີດເຜີຍໃນວັນທີ 15 ກຸມພາວ່າ: ການແພ່ລະບາດຂອງພະຍາດເອັມພອກ (mpox) ຫລື ພະຍາດໝາກສຸກລີງ ຍັງເປັນສະຖານະການສຸກເສີນດ້ານສາທາລະນະສຸກສາກົນ (Public Health Emergency of International Conern – PHEIC).
WHO ປະກາດຢ່າງເປັນທາງການໃນເດືອນກໍລະກົດປີຜ່ານມາວ່າ: ການແພ່ລະບາດຂອງພະຍາດ mpox ອອກນອກອາຟຣິກາ ເຊິ່ງ mpox ຖືເປັນພະຍາດປະຈໍາຖິ່ນນັ້ນ ໄດ້ກາຍເປັນສະຖານະການສຸກເສີນດ້ານສາທາລະນະສຸກສາກົນ ເຊິ່ງເປັນລະດັບການແຈ້ງເຕືອນສູງສຸດຂອງ WHO.
WHO ລະບຸໃນຖະແຫລງການໃນວັນທີ 15 ກຸມພາວ່າ: ຜູ້ຊ່ຽວຊານຂອງ WHO ໄດ້ຮັບຮູ້ເຖິງຄວາມຄືບໜ້າໃນການຮັບມືທົ່ວໂລກຕໍ່ການລະບາດຂອງພະຍາດ mpox ແລະ ມີລາຍງານວ່າ: ຈໍານວນຜູ້ຕິດເຊື້ອຫລຸດລົງໃນໄລຍະ 2-3 ເດືອນຜ່ານມາ.
ສໍານັກຂ່າວຊິນຮົວລາຍງານວ່າ: ຄະນະກໍາມະການຜູ້ຊ່ຽວຊານ ແລະ ທ່ານ ເທດຣອສ ອາດານອມ ເກເບເຢຊຸສ ຜູ້ອໍານວຍການຂອງ WHO ຢືນຢັນວ່າ: ພະຍາດ mpox ຍັງເປັນສະຖານະການສຸກເສີນດ້ານສາທາລະນະສຸກສາກົນ.
ຂໍ້ມູນສະຖິຕິຫລ້າສຸດຈາກ WHO ປະເມີນວ່າ: ຄວາມສ່ຽງທົ່ວໂລກຈາກການລະບາດຂອງພະຍາດ mpox ໃນປັດຈຸບັນບໍ່ຮຸນແຮງ. ຂະນະທີ່ການລະບາດໃນພາກພື້ນອາຊີຕາເວັນອອກສຽງໃຕ້ຫລຸດລົງຈາກລະດັບປານກາງເປັນລະດັບຕໍ່າ, ສ່ວນການລະບາດໃນພາກພື້ນປາຊີຟິກຕາເວັນຕົກຍັງຢູ່ໃນລະດັບຕໍ່າ.
