ໂຄມັນ ແຈ້ງສາເຫດທີ່ບໍ່ດີໃຈ ຫລັງຍິງປະຕູໃສ່ ເປແອສເຊ

ຄິງສະລີ ໂຄມັນ ປີກຈອມພີ້ວຂອງ ບາເຢິນ ມິວນິກ ເປີດເຜີຍສາເຫດທີ່ເລືອກເກັບອາການດີໃຈ ພາຍຫລັງທີ່ຍິງປະຕູໄຊໃຫ້ທີມເອົາຊະນະ ປາຣີ ແຊັງ-ແຊກແມັງ 1-0 ພ້ອມລະບຸການຍິງປະຕູທີ່ ປຣາກ ເດີ ແພຣັງ ເປັນສິ່ງທີ່ໄຝ່ຝັນຕັ້ງແຕ່ຍັງນ້ອຍ.

ຄິງສະລີ ໂຄມັນ ປີກຄວາມໄວສູງຂອງ ບາເຢິນ ມິວນິກ ເປີດເຜີຍວ່າ ລາວຕ້ອງການສະແດງຄວາມເຄົາລົບຕໍ່ແຟນບານ ປາຣີ ແຊັງ-ແຊກແມັງ. ເຊິ່ງເປັນສະໂມສອນຕົ້ນສັງກັດເກົ່າ ພາຍຫລັງທີ່ປະຕິເສດການສະຫລອງປະຕູໄຊທີ່ຊ່ວຍໃຫ້ “ເສືອໃຕ້” ເອົາຊະນະ ເປແອສເຊ 1-0 ທີ່ສະໜາມ ປຣາກ ເດີ ແພຣັງ ໃນການແຂ່ງຂັນ ຢູຟາ ແຊ້ມປຽນລີກ ຮອບ 16 ທີມ ນັດທຳອິດ ເມື່ອວັນອັງຄານທີ 14 ກຸມພາ ທີ່ຜ່ານມາ.

ໂຄມັນ ຍິງປະຕູໄຊໃຫ້ ບາເຢີນ ໃນນາທີ 53, ເຊິ່ງລາວເລືອກທີ່ຈະຍົກມືສອງຂ້າງຂຶ້ນ. ແທນທີ່ຈະອອກອາການດີໃຈກັບເພື່ອນຮ່ວມທີມ, ໂດຍໃນນັດທີ 2 “ເສືອໃຕ້” ຈະກັບມາລົງສະໜາມ Allianz Arena ພົບກັບ PSG ໃນວັນພຸດທີ 8 ມີນານີ້.