ລົງກວດກາຮ້ານກິນດື່ມ ແລະ ຮ້ານບັນເທີງ ທີ່ສ້າງສຽງເນືອງນັນໃນນະຄອນຫລວງວຽງຈັນ

ອີງຕາມໂທລະພາບນະຄອນຫລວງວຽງຈັນ ລາຍງານວ່າ: ວັນທີ 12 ກຸມພາ 2023 ຜ່ານມາ, ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ຮ່ວມກັບນະຄອນຫລວງວຽງຈັນ, ນຳໂດຍທ່ານ ອຸ່ນທວງ ຂາວພັນ ຮອງລັດຖະມົນຕີ ຖວທ, ທ່ານ ພູວົງ ວົງຄຳຊາວ ຮອງເຈົ້າຄອງ ນະຄອນຫລວງວຽງຈັນ ຜູ້ຊີ້ນຳ ວັດທະນະທຳສັງຄົມ ພ້ອມດ້ວຍຄະນະ ລົງກວດກາເບິ່ງສະພາບການຕົວຈິງຂອງຮ້ານກິນດື່ມ ແລະ ຮ້ານບັນເທີງແຫ່ງຕ່າງໆ ໃນນະຄອນຫລວງວຽງຈັນ.
ການລົງກວດເບິ່ງຄັ້ງນີ້ແມ່ນໄດ້ໄປຮ້ານເປົ້າໝາຍທີ່ສ້າງສຽງເນືອງນັນ ເປັນຕົ້ນ: ຮ້ານແຄັດມູນ, ຮ້ານປີ້ງເປັດເອວັນ, ດົງຫອຍ, ເຟສທູເຟສ, ອອສກ້າ, ວອດຄລັບ, ເຍົາວະລາດ1, ດາວຄຳ, ຟີນິກ ແລະ ອື່ນໆ. ເຊິ່ງບັນດາຮ້ານດັ່ງກ່າວແມ່ນມີຄວາມສ່ຽງ ແລະ ກໍ່ໃຫ້ເກີດປາກົດການຫຍໍ້ທໍ້ໃນສັງຄົມ ໂດຍສະເພາະສຽງເນືອງນັນ, ເປີດກາຍໂມງເວລາທີ່ກຳນົດ, ບັນຫາຢາເສບຕິດ ແລະ ການຄ້າມະນຸດ.
ຕໍ່ກັບບັນຫາດັ່ງກ່າວທາງຄະນະຮັບຜິດຊອບຈະໄດ້ມີການວາງແຜນປຶກສາຫາລືເພື່ອຊອກຫາວິທີທາງແກ້ໄຂ ແລະ ຮ້ານໃດຫາກຝ່າຝືນ ແມ່ນຈະໃຫ້ເຈົ້າໜ້າທີ່ກ່າວຕັກເຕືອນ ແລະ ເຮັດບົດບັນທຶກກັບເຈົ້າຂອງຮ້ານ ພ້ອມທັງໃຫ້ຄະນະລົງຕິດຕາມກວດກາເຂັ້ມງວດຂຶ້ນກວ່າເກົ່າ, ທັງນີ້ກໍຮຽກຮ້ອງໃຫ້ຜູ້ປະກອບການຮ້ານບັນເທີງ, ຮ້ານກິນດື່ມ ໃຫ້ເອົາໃຈໃສ່ປະຕິບັດຕາມມາດຕະການທີ່ຂັ້ນເທິງວາງອອກຢ່າງເຂັ້ມງວດ.