ທາງການໄທມີມະຕິເຫັນດີ ຈະເກັບຄ່າທຳນຽມ ຈາກນັກທ່ອງທ່ຽວຕ່າງປະເທດ 150-300 ບາດ ເລີ່ມ 1 ມິຖຸນາ 2023
ສຳນັກຂ່າວ thairath ລາຍງານ ວັນທີ 15 ກຸມພາ 2023 ວ່າ: ກອງປະຊຸມຄະນະລັດຖະມົນຕີຂອງໄທ ຕົກລົງເຫັນດີໃຫ້ເກັບຄ່າທຳນຽມຈາກນັກທ່ອງທ່ຽວຕ່າງປະເທດ ທີ່ເດີນທາງເຂົ້າປະເທດໄທ ຄື
- ຜ່ານທາງອາກາດ 300 ບາດ ຫລື ປະມານ 150.000 ກີບ
- ຊ່ອງທາງບົກ, ຊ່ອງທາງນ້ຳ 150 ບາດ/ຄົນ/ຄັ້ງ ຫລື ປະມານ 75.000 ກີບ
- ສ່ວນຜູ້ທີ່ເດີນທາງເຂົ້າມາແບບໄປເຊົ້າ-ແລງກັບ ຈະໄດ້ຮັບການຍົກເວັ້ນເກັບຄ່າທຳນຽມ.
ທັງນີ້ກໍເພື່ອໃຊ້ເງິນດັ່ງກ່າວເປັນທຶນໃນການໝູນວຽນໃນການພັດທະນາການທ່ອງທ່ຽວ, ສ້າງຂີດຄວາມສາມາດໃນການແຂ່ງຂັນໃຫ້ອຸດສາຫະກຳທ່ອງທ່ຽວ ແລະ ການມີປະກັນໄພໃຫ້ແກ່ນັກທ່ອງທ່ຽວຕ່າງປະເທດ ໃນລະຫວ່າງທ່ອງທ່ຽວພາຍໃນປະເທດ.ໃນມະຕິຕົກລົງດັ່ງກ່າວນີ້ຈະຖືກເລີ່ມຈະປະຕິບັດ ວັນທີ 1 ມິຖຸນາ 2023 ທີ່ຈະມາເຖິງ.
ທ່ານ ອະດິດສະ ໄຊຣັດຕະນານົນ ເລຂາທິການສະມາຄົມໄທບໍລິການທ່ອງທ່ຽວ ກ່າວວ່າ: ລັດຖະບານຕ້ອງວາງຮູບແບບການບໍລິຫານຄ່າທຳນຽມຢຽບແຜ່ນດິນຕັ້ງແຕ່ຕອນນີ້ ເພາະຕໍ່ໄປຈະເປັນເງິນກ້ອນໃຫຍ່, ຈຶ່ງຕ້ອງວາງລະບົບ ແລະ ຫາຄົນບໍລິຫານຈັດການໃຫ້ດີ ບໍ່ແມ່ນນຳອອກມາໃຊ້ເທື່ອລະໜ້ອຍ ແລະ ຂໍສະເໜີວ່າ ຄະນະກົມການທີ່ຈະມາດູແລການໃຊ້ຈ່າຍເງິນ ຄວນມີຕົວແທນຂອງພາກເອກະຊົນມີສ່ວນຮ່ວມ, ນອກຈາກນັ້ນ ຕ້ອງກຳນົດສັດສ່ວນທີ່ຈະແບ່ງວົງເງິນ ມາຈັດຕັ້ງກອງທຶນເພື່ອສົ່ງເສີມຜູ້ປະກອບການທ່ອງທ່ຽວໃຫ້ຊັດເຈນ.
