ເງິນກີບລາວຍິ່ງຈະດ້ອຍຄ່າ ຫລື ຈະຫວນກັບມາແຂງຄ່າຢູ່ກັບຊາດລາວຄົນລາວ
ໂດຍ: ທິດກໍ່າ
ສະພາບການອ່ອນຄ່າຂອງເງິນກີບລາວໃນປັດຈຸບັນໄດ້ເຮັດໃຫ້ຫລາຍສິ່ງຫລາຍຢ່າງມີການປ່ຽນແປງ. ອັນທີ່ໂດດເດັ່ນເຫັນປະຈັກຕາ ທັງມີຜົນກະທົບຢ່າງໜັກໜ່ວງພໍສົມຄວນກໍແມ່ນລາຄາສິນຄ້ານັບມື້ີຖີບຕົວສູງຂຶ້ນຢ່າງບໍ່ຢຸດຢັ້ງ. ຕົ້ນເຫດທີ່ເຮັດໃຫ້ເງິນກີບລາວອ່ອນຄ່ານັ້ນ ມັນກໍບໍ່ອື່ນໄກ ອັນເນື່ອງມາຈາກສາມປັດໄຈໃຫຍ່ຫລັກໆຄື: ອັນທີໜຶ່ງ ແມ່ນມາຈາກບັນດາມາດຕະການໃນການຄຸ້ມຄອງເສດຖະກິດ-ການເງິນ-ເງິນຕາບໍ່ໄປຕາມລະບົບ ທັງບໍ່ເຂັ້ມງວດເດັດຂາດ. ເວົ້າແຈ້ງມີກົດໝາຍ ແຕ່ກົດໝາຍບໍ່ສັກສິດຍ້ອນຄົນສ່ວນໃຫຍ່ບໍ່ພາກັນປະຕິບັດ. ອັນສອງມາປັດໄຈໃນການຜະລິດສິນຄ້າຢູ່ບ້ານເຮົາບໍ່ທັນເຂັ້ມແຂງ, ຫລາກຫລາຍ, ບໍ່ທັນສາມາດຢຶດບົດບາດຄໍ້າຈູນ ເສດຖະກິດມະຫາພາກຂອງປະເທດໃຫ້ກຸ້ມຕົນເອງ, ເພິ່ງຕົນເອງໄດ້ຢ່າງພຽງພໍ ດັ່ງໃນສະພາບປັດຈຸບັນຍັງອາໄສການນໍາເຂົ້າສິນຄ້າຈາກຕ່າງປະເທດເປັນສ່ວນຫລາຍ, ຈາກສາເຫດດັ່ງກ່າວຈຶ່ງເຮັດໃຫ້ການສົ່ງອອກໜ້ອຍກວ່າການນໍາເຂົ້າເຮັດໃຫ້ມີການຂາດດູນຕະຫລອດມາ. ສ່ວນອັນທີສາມທີ່ຍັງເປັນບັນຫາໃຫຍ່ຄາໃຈກໍແມ່ນການຂາດສະຕິເປັນເຈົ້າຂອງປະເທດຊາດຂອງຄົນລາວເຮົາເອງທີ່ພາກັນຫັນໄປນິຍົມໃຊ້ແຕ່ວັດຖຸ, ເງິນຕາຂອງຕ່າງປະເທດ ຈຸດໜັກແມ່ນເງິນບາດກັບເງິນໂດລາ ສົມທົບກັບມາດຕະການຄຸ້ມຄອງທາງດ້ານກົດໝາຍບໍ່ເຂັ້ມແຂງ, ເຂັ້ມງວດເດັດຂາດ, ປະປ່ອຍຕາມຄວາມນິຍົມຂອງຄົນໃນຊາດກໍເລີຍເຮັດໃຫ້ເງິນກີບນັບມື້ດ້ອຍຄຸນຄ່າ ນັບມື້ເຫີນຫ່າງຈາກຊາດລາວ ຄົນລາວໄປເທື່ອລະໜ້ອຍ.
ຫາກຕັ້ງໂຈດກັນວ່າ, ຈາກສາເຫດທີ່ກ່າວມາຂ້າງເທິງນີ້ ໃນອະນາຄົດເງິນກີບລາວຍິ່ງຈະດ້ອຍຄ່າຕໍ່ໄປ ຫລື ຈະຍັງມີໂອກາດຫວນກັບມາແຂງຄ່າຢ່າງໝັ້ນຄົງຍືນຍົງກັບຊາດລາວ, ຄໍາຕອບກໍຄືແນ່ນອນເງິນກີບລາວຕ້ອງມີໂອກາດກັບມາແຂງຄ່າຢູ່ຄຽງຄູ່ກັບຊາດລາວ, ຄົນລາວເຮົາ ຖ້າທຸກຄົນເປັນເຈົ້າຂອງປະເທດຊາດຢ່າງແທ້ຈິງ ເປັນຕົ້ນເປັນເຈົ້າບຸກທະລຸໃນການຜະລິດ, ເປັນເຈົ້າໃນການຄຸ້ມຄອງເສດຖະກິດ-ການເງິນ-ເງິນຕາ. ອັນສໍາຄັນທີ່ສຸດແມ່ນເປັນເຈົ້າໃນການປະຕິບັດຕົວບົດກົດໝາຍ, ບໍ່ພາກັນສໍ້ລາດບັງຫລວງ, ບໍ່ເຫັນແກ່ຜົນປະໂຫຍດສ່ວນຕົວຈົນລືມຜົນປະໂຫຍດຂອງຊາດ, ມີສະຕິຮັກຊາດດ້ວຍການຫັນມາຊົມໃຊ້ຜະລິດຕະພັນທີ່ຄົນລາວເຮົາເອງໃຫ້ຫລາຍຂຶ້ນ ແລະ ໄປຄຽງຄູ່ກັນນັ້ນ, ການຄຸ້ມຄອງລັດ-ຄຸ້ມຄອງສັງຄົມ ແລະ ຕົວບົດກົດໝາຍຕ້ອງເຂັ້ມງວດເດັດຂາດ, ບໍ່ພາກັນລວາດແຂ້ວເຕົ່າ ເພາະທຸກຢ່າງຊາດຈະຮັ່ງມີເຂັ້ມແຂງແມ່ນຂຶ້ນກັບທຸກຄົນໃນຊາດ.
ໃນຍຸກປັດຈຸບັນນີ້, ເປັນຍຸກໂລກາພິວັດ, ເປັນຍຸກເຊື່ອມໂຍງ, ທຸກສິ່ງຢ່າວຍ່ອມເປັນໄປຕາມກະແສການປ່ຽນແປງຂອງໂລກຢ່າງອັດຕະໂນມັດ. ເພາະສະນັ້ນ ຖ້າພວກເຮົາບໍ່ເກັ່ງ, ບໍ່ມີວິໄສທັດອັນກວ້າງໄກແມ່ນຈະຕົກຢູ່ໃນທ່າປະລາໄຊ ຖືກສົງຄາມຈິດຕະສາດການຫັນປ່ຽນໂດຍສັນຕິດ້ານເສດຖະກິດຄອບງໍາ ສຸດທ້າຍກໍກາຍເປັນເຫຍື່ອຂອງຜູ້ຊະນະຢ່າງບໍ່ຮູ້ສຶກຕົວ. ຈາກບົດຮຽນອັນນີ້ ຜູ້ນໍາປະຕິວັດໃນຍຸກກ່ອນໆເພິ່ນໄດ້ເຄີຍຕັກເຕືອນ, ແນະນໍາ ແລະ ສັ່ງສອນຫລາຍຫລົບຫລາຍຕ່າວມາແລ້ວ.
ເຖິງຢ່າງໃດກໍດີ, ພວກເຮົາຍັງມີຄວາມຫວັງໃນອະນາຄົດອັນບໍ່ໄກຄື: ຄົນລາວເຮົາຕ້ອງເປັນເຈົ້າຂອງປະເທດຊາດດ້ວຍການນໍາພາຢ່າງເຂັ້ມແຂງຂອງພັກ ແລະ ລັດຖະບານ, ເສດຖະກິດຂອງປະເທດຈະເຂັ້ມແຂງ ຍ້ອນມີທ່າແຮງຫລາຍດ້ານ ອັນຕົ້ນຕໍກໍແມ່ນພວກເຮົາມີຊັບໃນດິນສິນໃນນໍ້າທີ່ອຸດົມສົມບູນ, ມີຮີດຄອງປະເພນີ ວັດທະນະທໍາອັນດີງາມ ສິ່ງນີ້ລະຈະເຮັດໃຫ້ຄົນລາວ, ປະເທດລາວເປັນເສດຖີເໝືອນໃນຫລາຍໆປະເທດທີ່ມີບໍ່ນໍ້າມັນຈົນກິນບໍ່ບົກຈົກບໍ່ລົງ, ແຕ່ຖ້າການບໍລິຫານຈັດການບໍ່ເກັ່ງ ຊັບສິນເຫລົ່ານັ້ນກໍຈະຈິບຫາຍຍ້ອນພວກສໍ້ໂກງຊາດຢ່າງຊິ້ນເນື້ອປະດາຕົວ ສຸດທ້າຍມາປະເທດຊາດກໍຍັງທຸກຍາກ ແລະ ດ້ອຍພັດທະນາຄືເກົ່າ.
