ກົມກົງສຸນ ຊີ້ແຈງ ປາກົດການມີນາຍໜ້າຮັບເຮັດໜັງສືຜ່ນນແດນ ຖ້າພົບເຫັນພະນັກງານມີສ່ວນພົວພັນແທ້ຈະດຳເນີນມາດຕະການ ແລະ ວິໄນເດັດຂາດ
February 14, 2023 - 3:59 PM
ພາຍຫລັງທີ່ເພຈຂ່າວໜັງສືພິມລາວພັດທະນາ ແລະ ໂທລະພາບລາວສະຕາ ໄດ້ສ່ອງແສງ ປາກົດການມີນາຍໜ້າຮັບແລ່ນເຮັດໜັງສືຜ່ານແດນ ໃນວັນທີ 10 ແລະ 12 ກຸມພາ 2023ຜ່ານມາ ກາຍເປັນປະເດັນໃນສັງຄົມ ມີຄົນມາປະກອບຄຳຄິດເຫັນຈຳນວນຫລາຍ ທີ່ໄດ້ພົບພໍ້ດ້ວຍຕົນເອງ.
ຫລ້າສຸດ.ວັນທີ 13 ກຸມພາ 2023 ນີ້ ທ່ານ ອຳໄພວັນ ຈັນທະວົງ ຫົວໜ້າພະແນກ, ກົມກົງສຸນ ກະຊວງການຕ່າງປະເທດ ໄດ້ຖະແຫລງຂ່າວ ເພື່ອຊີ້ແຈງ, ອະທິບາຍເຖິງສະພາບການຕົວຈິງວ່າ:
ຕໍ່ກັບຂ່າວທີ່ສື່ສັງຄົມອອນລາຍ ອອກຂ່າວດັ່ງກ່າວນັ້ນ, ກົມກົງສຸນ ຂໍຢືນຢັນວ່າ ຂໍ້ມູນຕາມຂ່າວດັ່ງກ່າວແມ່ນຂັດກັບນະໂຍບາຍ ແລະ ລະບຽບຫລັກການຂອງກົມກົງສຸນ ໃນການ ດຳເນີນການອອກໜັງສືຜ່ານແດນໃຫ້ແກ່ປະຊາຊົນ. ເຖິງຢ່າງໃດກໍຕາມ, ພວກເຮົາໃຫ້ຄວາມສຳຄັນຕໍ່ກັບຂໍ້ມູນດັ່ງກ່າວ ແລະ ຈະມີການກວດກາຢ່າງລະອຽດຮອບດ້ານ, ຖ້າພົບເຫັນວ່າ ພະນັກງານກົມກົງສຸນ ມີສ່ວນພົວພັນກັບນາຍໜ້າໃນການຮຽກເກັບເງິນນຳ ປະຊາຊົນທີ່ເຂົ້າມາໃຊ້ບໍລິການຂໍນຳໃຊ້ໜັງສືຜ່ານແດນ ເກີນອັດຕາທີ່ລັດຖະບານກຳນົດ ແມ່ນຈະດຳເນີນມາດຕະການຢ່າງເດັດຂາດ ແລະ ປະຕິບັດວິໄນຕໍ່ພະນັກງານຜູ້ທີ່ກະທຳຜິດ ຕາມລະບຽບກົດໝາຍ.
ດັ່ງນັ້ນ, ຈຶ່ງຂໍຮຽກຮ້ອງມາຍັງພໍ່ແມ່ປະຊາຊົນຫາກພົບເຫັນການເຄື່ອນໄຫວ ຫລື ມີຂໍ້ມູນທີ່ພົວພັນກັບການກະທຳທີ່ຜິດລະບຽບກົດໝາຍ ຄືດັ່ງທີ່ສື່ຕ່າງໆໄດ້ເຜີຍແຜ່ອອກໄປນັ້ນ ຂໍໃຫ້ສະໜອງຂໍ້ມູນລະອຽດໃຫ້ແກ່ກົມກົງສຸນ ກະຊວງການຕ່າງປະເທດ ດ້ວຍ ເພື່ອຈະໄດ້ດຳເນີນມາດຕະການປ້ອງກັນ ແລະ ແກ້ໄຂຕາມລະບຽບກົດໝາຍໂດຍດ່ວນ.
ປັດຈຸບັນ, ຄວາມຕ້ອງການຂໍນຳໃຊ້ໜັງສືຜ່ານແດນຂອງປະຊາຊົນລາວເຮົາ ຍັງສືບຕໍ່ມີຈໍານວນຫລວງຫລາຍ ຊຶ່ງມີປະລິມານເກີນຂີດຄວາມສາມາດໃນການຮອງຮັບຕົວຈິງ ຂອງ ລະບົບການອອກໜັງສືຜ່ານແດນຂອງກົມກົງສຸນ. ສະນັ້ນ, ຈຶ່ງເຮັດໃຫ້ການອອກໜັງສືຜ່ານແດນ ຕ້ອງໄດ້ໃຊ້ເວລາດົນ, ບໍ່ຕອບສະໜອງໄດ້ຕາມຄວາມຮຽກຮ້ອງຕ້ອງການຂອງບັນດາທ່ານ, ການສຳພາດເກັບກຳຂໍ້ມູນກໍບໍ່ສາມາດເຮັດໄດ້ກັບມື້ ຈຶ່ງໄດ້ເລື່ອນມື້ນັດເຂົ້າມາສຳພາດອອກໄປ ເຊິ່ງການນັດເຂົ້າມາສຳພາດແມ່ນ ຮອດວັນທີ 28 ກຸມພາ 2023 ແລ້ວ.
ໃນສະພາບປົກກະຕິ ຢູ່ກົມກົງສຸນສາມາດພິຈາລະນາຮັບໄດ້ 300 ຄົນ/ມື້, ແຕ່ເພື່ອຕອບສະໜອງຄວາມຕ້ອງການຂອງປະຊາຊົນ ປັດຈຸບັນ ຢູ່ກົມກົງສຸນກໍໄດ້ລະດົມພະນັກງານ ສືບຕໍ່ປະຕິ ບັດໜ້າທີ່ເກີນໂມງລັດຖະການ ແຕ່ລະມື້ຮອດ 18:00 ໂມງ ແລະ ຮັບສຳພາດເກັບກຳຂໍ້ມູນ ໃຫ້ໄດ້ຫລາຍກວ່າ 500 ຄົນ/ມື້ (ຖ້າລວມ 6 ສູນຮັບຄຳຮ້ອງທົ່ວປະເທດ ຈະມີ 1.700-1.800 ຄົນ/ມື້).
ເຖິງແມ່ນວ່າຈະຮັບສຳພາດໄດ້ເປັນ ຈຳນວນຫລວງຫລາຍ ແຕ່ການດຳເນີນການອອກໜັງສືຜ່ານແດນຂອງພວກເຮົາປົກກະຕິ ແມ່ນໄດ້ພຽງແຕ່ 800-900 ເຫລັ້ມຕໍ່ມື້. ດ້ານໜ່ວຍຈັດພິມໜັງສືຜ່ານແດນ ໄດ້ ເຮັດວຽກນອກໂມງຈົນຮອດ 21:00 ໂມງ ໃນແຕ່ລະມື້, ລວມທັງ ວັນເສົາ ແລະ ວັນອາທິດ. ແຕ່ກໍສາມາດແກ້ໄຂໄດ້ພຽງແຕ່ 1.200-1.300 ເຫລັ້ມຕໍ່ມື້ ເທົ່ານັ້ນ.
ນອກນີ້, ເຄື່ອງຈັກ ແລະ ອຸປະກອນຮັບໃຊ້ການຜະລິດໜັງສືຜ່ານແດນທີ່ມີຢູ່ຈຳນວນໜຶ່ງ ກໍເປ່ເພ, ປັດຈຸ ບັນ, ກຳລັງສ້ອມແປງ ແລະ ຕິດຕັ້ງໃໝ່ ເພື່ອໃຫ້ຕອບສະໜອງໄດ້ຄວາມຮຽກຮ້ອງຕ້ອງການ ໃນການອອກໜັງສື ຜ່ານແດນໃຫ້ແກ່ປະຊາຊົນ. ສາເຫດທີ່ມີຈຳນວນຫລາຍ ແມ່ນຍ້ອນແຮງງານທີ່ຕ້ອງການກັບໄປອອກແຮງງານຢູ່ຕ່າງປະເທດ ທີ່ກັບມາໃນໄລຍະການແພ່ລະບາດຂອງພະຍາດ ໂຄວິດ-19 ນັ້ນ ຍັງມີຈຳນວນຫລາຍທີ່ມາຂໍເຮັດໜັງສືຜ່ານແດນໃນແຕ່ລະມື້, ຊຶ່ງຄາດວ່າຍັງຈະໃຊ້ເວລາອີກໄລຍະໜຶ່ງ ສະພາບການຂໍນຳໃຊ້ໜັງສືຜ່ານແດນຈຶ່ງຈະກັບສູ່ສະພາບປົກກະຕິ.
ໂອກາດນີ້, ທ່ານ ອຳໄພວັນ ຈັນທະວົງ ໄດ້ແຈ້ງໃຫ້ຊາບອີກວ່າ: ກົມກົງສຸນ ຈະເລີ່ມທົດລອງນຳໃຊ້ລະບົບຄິວຈອງມື້ນັດສຳພາດອອນລາຍ ໃນວັນຈັນ ທີ 20 ກຸມພາ 2023 ນີ້ເປັນຕົ້ນໄປ.
