ປະກາດການຍົກຂັ້ນເງິນເດືອນ ໃຫ້ນາຍທະຫານຫລາຍສະຫາຍ ຢູ່ກົມໃຫຍ່ເສນາທິການກອງທັບ
ກົມໃຫຍ່ເສນາທິການກອງທັບ ໄດ້ປະກາດການຍົກຂັ້ນເງິນເດືອນ ແລະ ປະກາດການເລື່ອນຊັ້ນໃຫ້ນາຍທະຫານ ໃນວັນທີ 9 ກຸມພາ 2023, ໂດຍການເປັນປະທານຂອງ ສະຫາຍ ພົນຈັດຕະວາ ກອງແກ້ວ ວໍລະຈິດ ຫົວໜ້າຫ້ອງການເມືອງ ກົມໃຫຍ່ເສນາທິການກອງທັບ, ມີຄະນະພັກ-ຄະນະບັນຊາກົມກອງຮາກຖານທີ່ຂຶ້ນກັບກົມໃຫຍ່ເສນາທິການກອງທັບເຂົ້າຮ່ວມ.
ສະຫາຍ ພັນໂທ ສະໄຫວທອງ ບຸດດາວົງ ຮອງຫົວໜ້າພະແນກພະນັກງານຫ້ອງການເມືອງກົມໃຫຍ່ເສນາທິການກອງທັບ ໄດ້ຜ່ານຂໍ້ຕົກລົງຂອງກະຊວງປ້ອງກັນປະເທດ ວ່າດ້ວຍການຍົກຂັ້ນເງິນເດືອນໃຫ້ນາຍທະຫານ ຢູ່ກົມໃຫຍ່ເສນາທິການກອງທັບ. ໃນນັ້ນ, ຍົກຂັ້ນເງິນເດືອນຈາກຊັ້ນ ພັນໂທ ຂຶ້ນຮັບເງິນ ຊັ້ນພັນເອກ ຈຳນວນ 5 ສະຫາຍ ຄື: ສະຫາຍ ພັນໂທ ຄຳພັນ ໄຊຍະສິດ ຫົວໜ້າການທະຫານສູນຄົ້ນຄວ້າວິໄຈເຄມີກອງທັບ, ສະຫາຍ ພັນໂທ ຄຳຫວັນ ວົງວິສັກ ຫົວໜ້າພະແນກເຕັກນິກກົມປ້ອງກັນອາກາດ, ສະຫາຍ ພັນໂທ ສະໝຽນ ເມກປະເສີດ ຫົວໜ້າພະແນກອົບຮົມກົມ 49, ສະຫາຍ ພັນໂທ ສົມປອງ ຈັນທະລັງສີ ຫົວໜ້າພະແນກອົບຮົມໂຮງຮຽນເຫລົ່າຮົບຕີພິເສດ 303, ສະຫາຍ ພັນໂທ ທອງພັນ ສິລີສຸກ ຊ່ວຍວຽກພະແນກກິດຈະການປ້ອງກັນຊາດ ກົມຊ່າງແສງ, ພ້ອມທັງໄດ້ຜ່ານຂໍ້ຕົກລົງຂອງກົມໃຫຍ່ການເມືອງກອງທັບ ວ່າດ້ວຍ ການເລື່ອນຊັ້ນໃຫ້ນາຍທະຫານຢູ່ກົມໃຫຍ່ເສນາທິການຈຳນວນ 93 ສະຫາຍ, ໃນນັ້ນ, ເລື່ອນຊັ້ນວາທີຂຶ້ນຮ້ອຍຕີ ຈຳນວນ 14 ສະຫາຍ, ເລື່ອນທຽບ ຊັ້ນວາທີຂຶ້ນ ຮ້ອຍຕີ 8 ສະຫາຍ, ເລື່ອນຊັ້ນ ຮ້ອຍຕີຂຶ້ນຮ້ອຍໂທ 41 ສະຫາຍ ແລະ ເລື່ອນທຽບຊັ້ນ ຮ້ອຍຕີຂຶ້ນຮ້ອຍໂທ 23 ສະຫາຍ.
ໂອກາດນີ້, ຫົວໜ້າຫ້ອງການເມືອງ ກົມໃຫຍ່ເສນາທິການກອງທັບ ໄດ້ໂອ້ລົມ ແລະ ສະແດງຄວາມຍ້ອງຍໍຊົມເຊີຍຕໍ່ນາຍທະຫານທີ່ໄດ້ຮັບການຍົກຂັ້ນເງິນເດືອນ ແລະ ໄດ້ຮັບການເລື່ອນຊັ້ນໃໝ່ໃນຄັ້ງນີ້, ພ້ອມທັງເນັ້ນໃຫ້ແຕ່ລະສະຫາຍສືບຕໍ່ເຝິກຝົນຫລໍ່ຫລອມຕົນເອງໃນທຸກດ້ານ, ດຸໝັ່ນຊອກຮູ້ຄົ້ນຄວ້າຮ່ຳຮຽນ, ຍົກສູງສະຕິຄວາມຮັບຜິດຊອບຕໍ່ໜ້າທີ່ການເມືອງທີ່ໄດ້ຮັບມອບໝາຍ, ມີແບບແຜນໃນການດຳລົງຊີວິດທີ່ປອດໃສຂາວສະອາດ, ເສີມຂະຫຍາຍຫົວຄິດປະດິດສ້າງແບບວິທະຍາສາດ, ໝູນໃຊ້ຄວາມຮູ້ຄວາມສາມາດ ແລະ ວິຊາສະເພາະທີ່ຮຽນມາ ປະກອບສ່ວນເຂົ້າໃນການພັດທະນາກົມກອງ, ປັບປຸງລະບຽບແບບແຜນວິທີເຮັດວຽກຢ່າງມີຫລັກການ, ພ້ອມກັນເຮັດສຳເລັດໜ້າທີ່ການເມືອງຂອງຕົນໃຫ້ໄດ້ຮັບຜົນດີ ແລະ ມີຄວາມກ້າວໜ້າຂຶ້ນຢ່າງບໍ່ຢຸດຢັ້ງ.
