ເຮືອໃບສີຟ້າ ຍັງເຮັດຜົນງານດີ ເປີດບ້ານ ເອົາຊະນະ ແອສຕັນ ວິນລາ 3-1

ການແຂ່ງຂັນບານເຕະ ພຣີເມຍລີກ ອັງກິດ ເມື່ອວັນອາທິດທີ 12 ກຸມພາ ທີ່ຜ່ານມາ ແມນເຊັສເຕີ ຊິຕີ້ ທີ່ກຳລັງປະເຊີນກັບພາຍຸມໍລະສຸມ ຫລັງຈາກທີ່ຖືກຕັ້ງຂໍ້ຫາລະເມີດກົດລະບຽບການເງິນຫລາຍກວ່າ 100 ຂໍ້, ເປີດບ້ານ ເອຕິຮັດ ສະເຕດ້ຽມ ຮັບການມາຢາມຂອງ ແອສຕັນ ວິນລາ ໂດຍເຄິ່ງເວລາທໍາອິດ “ເຮືອໃບສີຟ້າ” ເຈົ້າຖິ່ນເປີດເກມບຸກເຕັມຮູບແບບ ແລະ ຍິງຂຶ້ນນຳຫ່າງເຖິງ 3-0 ຈາກ ໂຣດຣີ ໃນນາທີ 4, ອີຄາຍ ກຸນໂດກັນ ໃນນາທີ 39 ແລະ ລູກໂທດຂອງ ຣີຢາສ ມາເຣສ ໃນນາທີ 45.

ເຂົ້າສູ່ເຄິ່ງເວລາທີສອງ ທີມຢາມພະຍາຍາມເປີດເກມບຸກເຂົ້າສູ້ ກ່ອນທີ່ຈະມາໄດ້ປະຕູໄລ່ເປັນ 1-3 ຈາກ ໂອລິ ວັດກິນສ໌ ໃນນາທີ 61, ຊ່ວງເວລາທີ່ເຫລືອບໍ່ມີປະຕູເພີ່ມ, ຈົບເກມ ແມນເຊັສເຕີ ຊິຕີ້ ຊະນະ 3-1 ແລະ ເກັບເພີ່ມເປັນ 48 ຄະແນນຈາກ 22 ນັດ ແຊງ ແມນເຊັສເຕີ ຢູໄນເຕັດ ກັບມາຄອງອັນດັບ 2 ແລະ ຕາມຫລັງອາເຊນອລຢູ່ 3 ຄະແນນ ແຕ່ລົງຫລິ້ນຫລາຍກວ່າ 1 ນັດ, ສ່ວນ ແອສຕັນ ວິນລາ ລົງສະໜາມ 22 ນັດ ມີ 28 ຄະແນນ, ຢູ່ອັນດັບ 11 ຂອງຕາຕະລາງ.