ການຄວບຄຸມລາຄາສິນຄ້າຢູ່ຕະຫລາດສາມັກຄີໄຊ ແຂວງສະຫວັນນະເຂດ ຍັງຢູ່ໃນເກນກຳນົດໄວ້

ວັນທີ 9 ກຸມພາ 2023, ທ່ານ ໄຊຍະເດດ ຜຸຍຍະວົງ ຮອງຫົວໜ້າພະແນກອຸດສາຫະກຳ-ການຄ້າ ແຂວງສະຫວັນນະເຂດ ພ້ອມດ້ວຍທ່ານ ແກ້ວອຸດອນ ສິດທິຊົນ ຫົວໜ້າຂະແໜງການຄ້າພາຍໃນ ແລະ ພະນັກງານວິຊາການ ຈາກຂະແໜງ, ໄດ້ລົງຕິດຕາມສິນຄ້າລາຄາໃນບັນຊີຄວບຄຸມ, ສິນຄ້າທີ່ມີຜົນກະທົບຕໍ່ຊີວິດການເປັນຢູ່ຂອງປະຊາຊົນຢູ່ທີ່ຕະຫລາດສາມັກຄີໄຊ, ນະຄອນໄກສອນ ພົມວິຫານ ແຂວງສະຫວັນນະເຂດ.

ຜ່ານການລົງຕິດຕາມຄັ້ງນີ້ ໂດຍເນັ້ນໃສ່ປະເພດສິນຄ້າບໍລິໂພກປະເພດ: ຊີ້ນງົວ, ໝູ, ປາ, ໄກ່, ໄຂ່ ແລະ ພືດຜັກອື່ນໆ, ເຫັນວ່າສິນຄ້າມີການເໜັງຕີງຕາມກົນໄກຂອງຕະຫລາດເມື່ອທຽບໃສ່ກັບການຄິດໄລ່ໂຄງສ້າງຕົ້ນທຶນຍັງຢູ່ ໃນລາຄາໃກ້ຄຽງກັນ, ນອກນັ້ນຍັງສັງເກດເຫັນຕື່ມອີກວ່າໄດ້ມີສິນຄ້າຕາມລະດູການເຂົ້າມາຈຳໜ່າຍເປັນຈຳນວນຫລາຍ ແລະ ສິນຄ້າປະເພດພືດຜັກທີ່ປະຊາຊົນ ປູກເອງເຂົ້າມາວາງຈຳໜ່າຍອັນໄດ້ສ້າງຄວາມເຂັ້ມແຂງໃຫ້ແກ່ເສດຖະກິດບ້ານເຮົາ.

ໂອກາດນີ້, ທ່ານ ຮອງຫົວໜ້າພະແນກອຸດສາຫະກຳ-ການຄ້າ ແຂວງ ໄດ້ຮຽກຮ້ອງໃຫ້ແມ່ຄ້າ-ຊາວຂາຍທີ່ເຮັດໜ້າທີ່ໃນການບໍລິການຂາຍສິນຄ້າບໍລິໂພກ, ຈົ່ງຄ້າຂາຍດ້ວຍຄວາມບໍລິສຸດ, ຊື່ສັດ, ບໍ່ເອົາລັດ-ເອົາປຽບຕໍ່ຜູ້ບໍລິໂພກ, ຖືກຫລັກອະນາໄມ, ຂາຍສິນຄ້າທີ່ມີຄຸນະພາບໃຫ້ແກ່ກັນ ແລະ ກັນ.