ເຈົ້າແຂວງບໍລິຄຳໄຊ ລົງຊຸກຍູ້ສົ່ງເສີມກຸ່ມປູກຜັກອິນຊີຢູ່ບ້ານນາຫາດ ເພື່ອສ້າງລາຍຮັບໃຫ້ແກ່ປະຊາຊົນ

ວັນທີ 8 ກຸມພາ 2023, ທ່ານ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ ພ້ອມຄະນະໄດ້ລົງຊຸກຍູ້ຊາວກະສິກອນປູກຜັກອິນຊີເຮືອນຮົ່ມ ບ້ານ ນາຫາດ ເມືອງຄຳເກີດ.

ທ່ານ ສົມພົນເພັງ ລາດສະສົມບັດ ຫົວໜ້າຫ້ອງການກະສິກຳ ແລະ ປ່າໄມ້ເມືອງຄຳເກີດ ໄດ້ລາຍງານຄວາມເປັນມາຂອງການສ້າງຕັ້ງກຸ່ມປູກຜັກອິນຊີຢູ່ບ້ານນາຫາດ ໂດຍອີງໃສ່ແຜນພັດທະນາເສດຖະກິດ-ສັງຄົມຂອງເມືອງ, ແກ້ໄຂຄວາມທຸກຍາກຂອງປະຊາຊົນໂດຍຕິດພັນກັບແຜນພັດທະນາໂຄງການຫ້ອງການກະສິກຳ ແລະ ປ່າໄມ້ເມືອງ ແລະ ມູນເຊື້ອຄວາມດຸໝັ່ນຂອງປະຊາຊົນໃນທ້ອງຖິ່ນ, ຫ້ອງການກະສິກຳ ແລະ ປ່າໄມ້ເມືອງ ຈຶ່ງໄດ້ປຸກລະດົມປະຊາຊົນບ້ານນາຫາດ ເຂົ້າຮ່ວມຖອດຖອນບົດຮຽນການປູກຜັກອິນຊີເປັນສິນຄ້າຢູ່ແຂວງຊຽງຂວາງ ແລະ ນະຄອນຫລວງ. ຈາກນັ້ນຈຶ່ງໄດ້ມາສ້າງຕັ້ງກຸ່ມປູກຜັກອິນຊີໃນເຮືອນຮົ່ມຂຶ້ນໃນປີ 2004 ເປັນຕົ້ນມາ, ເຊິ່ງທາງຫ້ອງການກະສິກຳເມືອງແມ່ນໄດ້ສະໜອງຜ້າຢາງ, ເຕັກນິກການຜະລິດຝຸ່ນ, ປຸ່ຍອິນຊີ, ຊະນິດຝຸ່ນ ແລະ ຊະນິດນໍ້າ ເບື້ອງຕົ້ນມີ 15 ຄອບຄົວ, ປະຈຸບັນມີ 40 ຄອບຄົວ, ເຊິ່ງຕົ້ນທຶນການຜະລິດທີ່ເປັນທຶນໜູນວຽນ ແລະ ທຶນຄົງທີ່ 1,392 ຕື້ກີບ, ຜົນກໍາໄລສຸດທິ 1 ຕື້ກວ່າກີບ, ສາມາດປູກຜັກອິນຊີໄດ້ 2 ລະດູ, ໃນນັ້ນມີຜັກຫົວຫອມ, ຜັກກາດ, ຜັກສະລັດ, ຜັກບົ້ງ, ກະລໍ່າປີ ແລະ ສາມາດຕອບສະໜອງໃຫ້ແກ່ຕະຫລາດພາຍໃນເມືອງ ແລະ ສົ່ງອອກຕ່າງແຂວງ ແລະໄດ້ຮັບການຢັ້ງຢືນມາດຖານກະສິກໍາອິນຊີລາວຈາກກົມປູກຝັງ.

ໂອກາດດັ່ງກ່າວ, ທ່ານເຈົ້າແຂວງ ໄດ້ເນັ້ນໃຫ້ຄະນະບໍລິຫານງານພັກເມືອງ, ຫ້ອງການກະສິກຳ ແລະ ປ່າໄມ້ເມືອງ ໃຫ້ເອົາໃຈໃສ່ສືບຕໍ່ຊຸກຍູ້, ຕິດຕາມດ້ານເຕັກນິກວິຊາການ, ປຸກລະດົມໃຫ້ປະຊາຊົນຫັນມາປູກຜັກອິນຊີໃຫ້ຫລາຍຂຶ້ນ, ສືບຕໍ່ສ້າງກອງທຶນກຸ່ມປູກຜັກອິນຊີໃຫ້ເຕີບໃຫຍ່ເປັນແບບຢ່າງທີ່ດີໃຫ້ແກ່ບ້ານອື່ນ ແລະ ມີຄວາມຍືນຍົງ.