ປກສ ນະຄອນຫລວງວຽງຈັນ ທຳລາຍຢາສູບໄຟຟ້າ 1 ພັນກວ່າອັນ ໝາກກະໂພກ ແລະ ບັ້ງໄຟພຸ ລວມນ້ຳໜັກ 250 ກິໂລກຣາມ
ວັນທີ 8 ກຸມພາ 2023 ຜ່ານມາ, ພະແນກຕໍາຫລວດສິ່ງແວດລ້ອມ ຫ້ອງຕໍາຫລວດ ປກສ ນະຄອນຫລວງວຽງຈັນ ສົມທົບກັບພະແນກອຸດສາຫະກໍາ ແລະ ການຄ້າ, ພະແນກສາທາລະນະສຸກ ນະຄອນຫລວງວຽງຈັນ ທຳລາຍສິນຄ້າປະເພດເກືອດຫ້າມ ມີຢາສູບໄຟຟ້າ 1.275 ອັນ, ໝາກກະໂພກ ແລະ ບັ້ງໄຟພຸ ລວມມີ 250 ກິໂລກຣາມ.
ທ່ານ ພັຕ ອານຸສອນ ວົງພະຈັນ ຮອງຫົວໜ້າພະແນກຕຳຫລວດສິ່ງແວດລ້ອມ ປກສ ນະຄອນຫລວງວຽງຈັນ ໃຫ້ຮູ້ວ່າ: ໂດຍປະຕິບັດຕາມກົດໝາຍວ່າດ້ວຍ ການຄວບຄຸມຢາສູບ ເລກທີ 09/ສພຊ, ລົງວັນທີ 16 ພະຈິກ 2021; ດໍາລັດ ເລກທີ 52/ລບ, ລົງວັນທີ 21 ກຸມພາ 2019 ຂອງນາຍົກລັດຖະມົນຕີ; ແຈ້ງການເລກທີ 01/ຈນວ, ລົງວັນທີ 16 ມັງກອນ 2023 ຂອງເຈົ້າຄອງນະຄອນຫຼວງວຽງຈັນ ກ່ຽວກັບຫ້າມຜະລິດ, ນໍາເຂົ້າ, ຊື້-ຂາຍ, ມີໄວ້ຄອບຄອງ, ໝາກກະໂພກ, ບັ້ງໄຟພຸ.
ດັ່ງນັ້ນ ວັນທີ 20 ມັງກອນ 2023 ເຈົ້າໜ້າທີ່ພະແນກຕຳຫລວດສິ່ງແວດລ້ອມ ປກສ ນະຄອນຫລວງວຽງຈັນ ໄດ້ລົງກວດກາຮ້ານຂາຍເຄື່ອງທົ່ວໄປຢູ່ຕະຫລາດຄໍາສະຫວາດພົບເຫັນໝາກກະໂພກ, ບັ້ງໄຟພຸ ລວມນໍ້າໜັກ 233 ກິໂລກຣາມ ແລະ ລົງກວດກາຮ້ານຂາຍເຄື່ອງຢູ່ເຂດບ້ານນາຄໍາ ເມືອງສີໂຄດຕະບອງ ພົບເຫັນໝາກກະໂພກ, ບັ້ງໄຟພຸ ລວມນໍ້າໜັກ 27 ກິໂລກຣາມ ແລະ ມາຮອດວັນທີ 24 ມັງກອນ 2023, ເຈົ້າໜ້າທີ່ພະແນກຕຳຫລວດສິ່ງແວດລ້ອມ ປກສ ນະຄອນຫລວງວຽງຈັນ ລົງຕິດຕາມກວດກາ ຢູ່ສູນການຄ້າແຫ່ງໜຶ່ງ ເມືອງສີສັດຕະນາກ ພົບເຫັນຈໍານວນໜຶ່ງຮ້ານທີ່ລັກລອບຂາຍຢາສູບໄຟຟ້າ ຜ່ານການກວດກາພົບເຫັນຢາສູບໄຟຟ້າຈໍານວນ 1.275 ອັນ ສິນຄ້າເກືອດຫ້າມຈໍານວນດັ່ງກ່າວ ທາງເຈົ້າໜ້າທີ່ໄດ້ຢຶດເພື່ອມາທໍາລາຍຖິ້ມ. ຕໍ່ກັບເຈົ້າຂອງຮ້ານ ແມ່ນໄດ້ສຶກສາອົບຮົມກ່າວເຕືອນ ແລະ ປັບໄໝຕາມລະບຽບການ.
