ຊີດານ ເປີດທາງຫວນຄຸມ ຣຽວ ມາດຣິດ ຮອບ 3 ພາຍໃຕ້ຫນຶ່ງເງື່ອນໄຂ

ສື່ເປີດເຜີຍ ຊີເນີດິນ ຊີດານ ເປີດໂອກາດໃນການຫວນຄຸມ ຣຽວ ມາດຣິດ ເປັນຮອບທີ 3 ຖ້າຫາກ ຟລໍເຣນຕີໂນ ເປເຣສ ປະທານສະໂມສອນຮັບປະ ກັນວ່າຈະເຊັນສັນຍາກັບ ຣາຢັນ ເຊີກີ ກອງໜ້າໂອລິມປິກ ລີຢົງ.

ໂດຍ ຣຽວ ມາດຣິດ ຕົກເປັນຂ່າວວ່າພວມພິຈາລະນາອະນາຄົດຂອງ ຄາໂລ ອັນເຊລັອດຕິ ຜູ້ຈັດການທີມ ຫລັງຈາກທີ່ລາວພາ ຣຽວ ມາດຣິດ ສ້າງຜົນງານໄດ້ບໍ່ຄ່ອຍດີໃນລະດູການນີ້ ດ້ວຍການຕາມຫລັງ ບາເຊໂລນາ ຄູ່ປັບຕະຫລອດການໄປແລ້ວ 8 ຄະແນນ ໃນ ລາ ລີກາ ສະເປນ.

ຈາກເລື່ອງທີ່ເກີດຂຶ້ນເຮັດໃຫ້ມີຂ່າວເຊື່ອມໂຍງວ່າ ຣຽວ ມາດຣິດ ຊອກຫາຜູ້ຈັດການທີມຄົນໃຫມ່ໄວ້ເປັນຕົວເລືອກ ໂດຍມີຊື່ຂອງ ຊີດານ ອະດີດນັກເຕະ ແລະ ຜູ້ຈັດການທີມຂອງພວກເຂົາ ເຊິ່ງເຄີຍຄຸມທີມມາແລ້ວ 2 ຄັ້ງ ກ່ອນໜ້ານີ້ຢູ່ໃນລາຍຊື່.

ຫລ້າສຸດ Diario Sport  ສື່ໃນສະເປນເປີດເຜີຍວ່າ ຜູ້ຈັດການທີມຊາວຝຣ່ັງທີ່ພວມຫວ່າງງານຢູ່ຂະນະນີ້ພ້ອມເປີດທາງໃນການກັບມານັ່ງຕຳ ແໜ່ງຜູ້ ຈັດການທີມ ຣຽວ ມາດຣິດ ເປັນຮອບທີສາມ ແຕ່ມີຂໍ້ແມ້ວ່າ ຟລໍເຣນຕີໂນ ເປເຣສ ປະທານສະໂມສອນຕ້ອງຮັບປະກັນວ່າຈະດຶງຕົວ ຣາຢັນ ເຊີກີ ກອງໜ້າອາຍຸ 19 ປີ ຂອງ ໂອລິມປິກ ລີຢົງ ມາເສີມທີມ.

ທັງນີ້ ເຊີກີ ສະແດງຜົນງານໄດ້ຢ່າງໂດດເດ່ັນກັບ ລີຢົງ ນັບຕັ້ງແຕ່ຂຶ້ນທີມຊຸດໃຫຍ່ໃນປີ 2020 ໂດຍລົງສະໜາມທັງຫມົດ 85 ນັດ ຍິງໄປໄດ້ 12 ປະຕູກັບ 13 ແອສຊິສ.