ປະທານປະເທດ ແຫ່ງ ສປປ ລາວ ສົ່ງສານສະແດງຄວາມເຫັນໃຈ-ເສົ້າສະຫລົດໃຈ ຕໍ່ເຫດການແຜ່ນດິນໄຫວຢູ່ຕວັກກີ
ພະນະທ່ານ ທອງລຸນ ສີສຸລິດ ປະທານປະເທດແຫ່ງ ສປປ ລາວ ໄດ້ສົ່ງສານ ເຖິງ ພະນະທ່ານ ເຣີເຊັບ ໄຕຢິບ ແອໂດກັນ ປະທານາທິບໍດີ ແຫ່ງ ສາທາລະນະລັດ ຕວັກກີ ຕໍ່ເຫດການແຜ່ນດິນໄຫວຢູ່ຕວັກກີໂດຍມີເນື້ອໃນດັ່ງນີ້:
ຂ້າພະເຈົ້າໄດ້ຮັບຊາບຂ່າວດ້ວຍຄວາມໂສກເສົ້າເສຍໃຈຕໍ່ເຫດການແຜ່ນດິນໄຫວທີ່ຮຸນແຮງ ທີ່ເກີດຂຶ້ນຢູ່ພາກຕາເວັນອອກສ່ຽງໃຕ້ ຂອງຕວັກກີ ໃນວັນທີ 6 ກຸມພາ 2023, ອັນໄດ້ເຮັດໃຫ້ມີປະຊາຊົນເສຍຊີວິດ ແລະ ໄດ້ຮັບບາດເຈັບເປັນຈຳນວນຫລວງຫລາຍ ລວມທັງໄດ້ສ້າງຄວາມເສຍຫາຍຢ່າງຫລວງຫລາຍຕໍ່ຊັບສິນຂອງປະຊາຊົນທີ່ອາໄສຢູ່ໃນພື້ນທີ່ດັ່ງກ່າວ.
ໃນນາມລັດຖະບານ ແລະ ປະຊາຊົນລາວ ກໍຄື ໃນນາມສ່ວນຕົວ, ຂ້າພະເຈົ້າ ຂໍສະແດງຄວາມເສົ້າສະຫລົດໃຈຢ່າງສຸດຊຶ້ງ ແລະ ສະແດງຄວາມເຫັນໃຈຢ່າງເລິກເຊິ່ງ ມາຍັງ ພະນະທ່ານ ແລະ ຜ່ານພະນະທ່ານ ໄປຍັງລັດຖະບານ ແຫ່ງ ສາທາລະນະລັດ ຕວັກກີ, ໂດຍສະເພາະແມ່ນຄອບຄົວຂອງຜູ້ທີ່ໄດ້ຮັບເຄາະຮ້າຍຈາກເຫດການແຜ່ນດິນໄຫວ ໃນຄັ້ງນີ້ດ້ວຍ.
ຂ້າພະເຈົ້າເຊື່ອໝັ້ນວ່າພາຍໃຕ້ການນໍາພາຂອງພະນະທ່ານ, ຄວາມສາມັກຄີເປັນນ້ຳໜຶ່ງໃຈດຽວຂອງປະຊາຊົນ ຕວັກກີ ແລະ ການຊວ່ຍເຫລືອຂອງວົງສາຄະນະຍາດສາກົນ, ຕວັກກີ ຈະສາມາດຜ່ານຜ່າໄພພິບັດຄັ້ງນີ້ ແລະ ຟື້ນຟູ ຊີວິດການເປັນຢູ່ຂອງປະຊາຊົນໃຫ້ກັບຄືນສູ່ສະພາບປົກກະຕິໂດຍໄວ.
ໃນໂອກາດດຽວກັນນີ້ ພະນະທ່ານ ສະເຫລີມໄຊ ກົມມະສິດ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ກໍໄດ້ສົ່ງສານສະແດງຄວາມເຫັນໃຈເຖິງຄູ່ຮ່ວມຕຳແໜ່ງເຊັ່ນດຽວກັນ.
