ພະແນກອຸດສະຫະກໍາ ແລະ ການຄ້າ ແຂວງອັດຕະປື ຖືເອົາການຄຸ້ມຄອງລາຄາສິນຄ້າ ເປັນວຽກສຳຄັນແຖວໜ້າ.

ໃນວາລະການດໍາເນີນກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງ ຊຸດທີ II ທ່ານ ສຸດໃຈ ກົມມະເມືອງ ຫົວໜ້າພະແນກອຸດສະຫະກໍາ ແລະ ການຄ້າ ແຂວງອັດຕະປື ໄດ້ລາຍງານ ໃນວັນທີ 8 ກຸມພາ 2023 ຕໍ່ກອງປະຊຸມວ່າ: ໃນໄລຍະ 1 ປີ ຜ່ານມາ ທາງພະແນກອຸດສະຫະກໍາ ແລະ ການຄ້າແຂວງ ໄດ້ຖືເອົາວຽກງານຄຸ້ມຄອງລາຄາ ເປັນວຽກງານສຳຄັນແຖວໜ້າ ໃນການຄຸ້ມຄອງລາຄາສີນຄ້າໃນທ້ອງຕະຫລາດ ເພື່ອເຮັດໃຫ້ສັງຄົມມີຄວາມສະຫງົບ ເພື່ອໃຫ້ຜູ້ຊົມໃຊ້ສາມາດເລືອກຊື້ສິນຄ້າ ແລະ ບໍລິການ ໃນລາຄາທີ່ເປັນທຳ, ເຊິ່ງເຈົ້າໜ້າທີ່ກວດກາການຄ້າ ໄດ້ລົງຕິດຕາມ, ກວດກາ ແລະ ຄຸ້ມຄອງລາຄາສິນຄ້າ ທີ່ກະທົບໄວຕໍ່ຊີວິດການເປັນຢູ່ ຂອງພໍ່ແມ່ປະຊາຊົນ ຕາມທ້ອງຕະຫລາດເປັນປົກກະຕິ ໂດຍສະເພາະແມ່ນສິນຄ້າ ທີ່ນອນໃນບັນຊີຄວບຄຸມຂອງຂະແໝງການອຸດສາຫະກຳ ແລະ ການຄ້າ ບັນຊີ ກໍ, ມີ 8 ປະເພດ,ມີ 23 ລາຍການ ຄື: ນໍ້າມັນເຊື້ອໄຟ, ເຂົ້າ, ຊີ້ນ, ປາ, ໄກ່, ເຫລັກເສັ້ນ, ຊິມັງ, ອາຍແກັສຫຸງຕົ້ມ ແລະ ລາຍການສິນຄ້າ ທີ່ຕ້ອງຕິດຕາມການເໜັງຕິງ ບັນຊີ ຂໍໍ, ລວມມີ 199 ລາຍການ, ການລົງຕິດຕາມກວດກາ ແມ່ນໄດ້ມີການຈັດຕັ້ງປະຕິບັດເປັນປົກກະຕິ ອາທິດລະ 1-2 ຄັ້ງ.

ນອກນັ້ນ, ທ່ານຍັງລາຍງານໃຫ້ຮູ້ຕື່ມວ່າ:  ນັບແຕ່ທ້າຍເດືອນ 2 ກຸມພາ ປີ 2022 ມາ ຮອດປັດຈຸບັນນີ້ ເຫັນວ່າການຄຸ້ມຄອງລາຄາສິນຄ້າປະເພດ ເຂົ້າ, ຊີ້ນ, ປາ, ພືດຜັກ ແລະ ສິນຄ້າອຸປະໂພກ-ບໍລິໂພກ ແລະ ອື່ນໆ ໃນທ້ອງຕະຫລາດຂອງແຂວງ ແມ່ນມີການເໜັງຕີງ ແລະ ມີທ່າອ່ຽງເພີ່ມຂື້ນ, ເນື່ອງຈາກວ່າການຜະລິດຢູ່ພາຍໃນບໍ່ສາມາດຕອບສະໜອງກັບຄວາມຕ້ອງການ ໂດຍສະເພາະສິນຄ້າປະເພດ ບໍລິໂພກ, ບາງສິນຄ້າ ສ່ວນໃຫຍ່ແມ່ນນຳເຂົ້າມາຈາກຕ່າງແຂວງ ແລະ ຕ່າງປະເທດ, ລາຄານໍ້າມັນມີການປັບຕົວເພີ່ມສູງຂື້ນ, ເງີນກີບອ່ອນຄ່າ, ປະກອບກັບສະພາບໄພເງີນເຟີ້ ປັບຕົວສູງຂື້ນ ກໍເປັນສາເຫດອັນດັບຕົ້ນໆ ທີ່ເຮັດໃຫ້ລາຄາສີນຄ້າມີການປັບຕົວສູງຂຶ້ນ .