ອິນໂດເນເຊຍຮຽກຮ້ອງມຽນມາ ເລັ່ງຢຸດຕິເຫດຮຸນແຮງຢູ່ລັດຍະໄຂ່
ປະທານາທິບໍດີອິນໂດເນເຊຍ ສົ່ງລັດຖະມົນຕີຕ່າງປະເທດຢ້ຽມຢາມມຽນມາ ເພື່ອຫາລືກ່ຽວກັບການຢຸດຕິສະຖານະການສູ້ຮົບນອງເລືອດຢູ່ລັດຍະໄຂ່, ຂະນະທີ່ເກີດເຫດມືດີດຶກລະເບີດໄຟໃສ່ສະຖານເອກອັກຄະລັດຖະທູດມຽນມາຢູ່ນະຄອນຫລວງຈາກາຕາ.
ສຳນັກຂ່າວຕ່າງປະເທດລາຍງານຈາກນະຄອນຫລວງຈາກາຕາ ປະເທດອິນໂດເນເຊຍ ໃນວັນທີ 4 ກັນຍາວ່າ: ປະທານາທິບໍດີ ໂຈໂກ ວິໂດໂດ ກ່າວໃນວັນທີ 3 ກັນຍາວ່າ: ໄດ້ມອບໝາຍໃຫ້ທ່ານນາງ ເຣດໂນ ມາຣຊູດີ ລັດຖະມົນຕີຕ່າງປະເທດ ເດີນທາງຢ້ຽມຢາມນະຄອນຫລວງເນປີດໍ ເພື່ອຫາລືກັບເຈົ້າໜ້າທີ່ລະດັບສູງຂອງມຽນມາ ໃນການຢຸດສະຖານະການຮຸນແຮງຢູ່ລັດຍະໄຂ່, ຫາທາງປົກປ້ອງປະຊາຊົນທຸກຄົນໃນພື້ນທີ່ ລວມທັງຊາວມຸດສະລິມ ແລະ ເພື່ອເປັນການປູທາງສູ່ການສົ່ງມອບການຊ່ວຍເຫລືອດ້ານມະນຸດສະທຳເພີ່ມຕື່ມເຂົ້າສູ່ລັດຍະໄຂ່ ໂດຍຫລັງຈາກນີ້ທ່ານ ມາຣຊູດີ ຈະເດີນທາງຢ້ຽມຢາມບັງກະລາເທດ ເພື່ອຫາລືກັບລັດຖະບານທາກາໃນບັນຫາດຽວກັນນີ້.
ເຖິງຢ່າງໃດກໍຕາມ, ໃນວັນດຽວກັນ ເກີດເຫດຄົນຮ້າຍດຶກລະເບີດໄຟເຂົ້າໃສ່ສະຖານເອກອັກຄະລັດຖະທູດມຽນມາປະຈຳນະຄອນຫລວງຈາກາຕາ ໃນວັນທີ 3 ກັນຍາ ເປັນເຫດໃຫ້ເກີດໄຟໄໝ້ບໍລິເວນຊັ້ນສູງຂອງອາຄານ ໂຊກດີເຈົ້າໜ້າທີ່ສາມາດຄວບຄຸມສະຖານະການໄດ້ທັນເວລາ ໂດຍບໍ່ມີຜູ້ໄດ້ຮັບບາດເຈັບ ຫລື ເສຍຊີວິດ ແລະ ຢູ່ລະຫວ່າງກວດສອບກ້ອງວີດີໂອວົງຈອນປິດ ເພື່ອຕິດຕາມຈັບກຸມຜູ້ກະທຳຜິດໃຫ້ມາຮັບໂທດຕາມກົດໝາຍຕໍ່ໄປ.
