ເຊັນສັນຍາສໍາຫລວດ ຫີນປາໂກດິດ ແລະ ຫີນປະດັບ ເຂດບ້ານຄຳວົງສາ ເມືອງພູວົງ ແຂວງອັດຕະປື

ແຫລ່ງຂ່າວຈາກ ແຂວງອັດຕະປື ໃຫ້ຮູ້ວ່າ: ພິທີເຊັນສັນຍາວ່າດ້ວຍການສໍາຫລວດຫີນປາໂກດິດ ແລະ ຫີນປະດັບ ຢູ່ເຂດບ້ານຄຳວົງສາ ເມືອງພູວົງ ແຂວງອັດຕະປື ລະຫວ່າງ ອົງການປົກຄອງແຂວງອັດຕະປື ກັບ ບໍລິສັດ ໂຊກດີມີໄຊ ກໍ່ສ້າງ ຈໍາກັດຜູ້ດຽວ ຈັດຂຶ້ນໃນວັນທີ 8 ກຸມພາ 2023, ລະຫວ່າງທ່ານ ສູນນະຄອນ ແກ້ວວຽງຄຳ ຫົວໜ້າພະແນກແຜນການ ແລະ ການລົງທຶນແຂວງແລະ ທ່ານ ວິທະຍາ ພົມມະຈັນ ຫົວໜ້າພະແນກພະລັງງານ ແລະ ບໍ່ແຮ່ ແຂວງຮ່ວມກັບ ທ່ານ ສຸລິຈັນ ໂຊກຄໍາຈັນ ເຈົ້າເມືອງພູວົງ ຝ່າຍບໍລິສັດ ແມ່ນ ທ່ານ ວິໄລສັກ ເພັດອາສາ ອຳນວຍການບໍລິສັດ ໂຊກດີມີໄຊ ກໍ່ສ້າງຈຳກັດ ຜູ້ດຽວ ໂດຍມີພາກສ່ວນກ່ຽວຂ້ອງສອງຝ່າຍເຂົ້າຮ່ວມເປັນສັກຂີພິຍານ.

ເພື່ອພັດທະນາແແຫລ່ງແຮ່ທາດ ແລະ ສະໜັບສະໜູນການພັດທະນາທ້ອງຖິ່ນ, ການສ້າງວຽກເຮັດງານທໍາໃຫ້ແກ່ປະຊາຊົນ ແລະ ສົ່ງເສີມທຸລະກິດພາຍໃນແຂວງ. ສ່ວນຝ່າຍບໍລິສັດມີແມ່ນມີຖານະທາງດ້ານການເງິນທີ່ໜັ້ນຄົງ ມີແຫລ່ງທຶນພຽງພໍ ແລະ ມີຫລັກຊັບຄໍ້າປະກັນຕາມລະບຽນການ, ມີປະຫັວດຄວາມເປັນມາກ່ຽວກັບການດຳເນີນທຸລະກິດທີ່ດີ ແລະ ໜ້າເຊື່ອຖື, ມີວິຊາການທາງດ້ານເຕັກນິກ ແລະ ປະສົບການກ່ຽວກັບສໍາຫລວດແຮ່ທາດ ເພື່ອດຳເນີນກິດຈະການແຮ່ທາດ ໂດຍສອດຄ່ອງກັບເງືຶ່ອນໄຂ ແລະ ພັນທະທີ່ໄດ້ກຳນົດໄວ້ ໂດຍຈະສຳຫລວດໃນເນື້ອທີ່ 7 ກວ່າກິໂລຕາແມັດ, ເຊິ່ງກິດຈະການດັ່ງກ່າວຈະເປັນການສ້າງວຽກເຮັດງານທໍາໃຫ້ປະຊາຊົນຢູ່ເຂດບ້ານຄໍາວົງສາ ກໍຄື ປະຊາຊົນຂອງເມືອງພູວົງ ແລະ ທັງສາມາດສ້າງລາຍຮັບໃຫ້ແກ່ພາກລັດ ໄດ້ອີກທາງໜຶ່ງ.