ປີ 2022 ກຳລັງຕໍາຫຼວດ ນະຄອນຫລວງວຽງຈັນ ແກ້ໄຂເຫດການລັກພາໂຕຮຽກຄ່າໄຖ່ໄດ້ 10 ເລື່ອງ
ວັນທີ 9 ກຸມພາ 2023 ນີ້, ທ່ານ ພັອ ອຸບົນ ຈຸນລະມະນີ ຮອງຫົວໜ້າກອງບັນຊາການ ປກສ ນະຄອນຫຼວງວຽງຈັນ ລາຍງານ ກ່ຽວກັບການຈັບໂຕຮຽກຄ່າໄຖ່ ຕໍ່ກອງປະຊຸມສະຫຼຸບວຽກງານຕໍາຫຼວດປະຈໍາປີ 2022 ແລະ ວາງທິດທາງແຜນການປີ 2023 ຂອງກົມໃຫຍ່ຕໍາຫຼວດວ່າ: ໃນປີ 2022 ຜ່ານມາ ຢູ່ນະຄອນຫຼວງວຽງຈັນ ຍັງມີເຫດການຈັບຕົວຮຽກຄ່າໄຖ່ເກີດຂຶ້ນຢ່າງຕໍ່ເນື່ອງ ເຊິ່ງສ່ວນຫຼາຍແມ່ນຄົນຕ່າງຊາດທີ່ກໍ່ເຫດລັກພາໂຕຮຽກຄ່າໄຖ່ ຈົນກ້າວໄປເຖິງການຄາດຕະກໍາເນື່ອງມາຈາກບັນຫາໜີ້ສິນ, ການພະນັນເຖື່ອນ; ສະເພາະປີຜ່ານມາມີເຫດການລັກພາໂຕເກີດຂຶ້ນ 11 ເລື່ອງ, ເຈົ້າໜ້າທີ່ສາມາດແກ້ໄຂໄດ້ 10 ເລື່ອງ, ກັກຕົວຕ້ອງຫາໄດ້ 20 ຄົນ ຍິງ 1 ຄົນ.
ຄະດີທີ່ພົ້ນເດັ່ນໃນປີຜ່ານມາທີ່ເຈົ້າໜ້າທີ່ວິຊາສະເພາະ ນະຄອນຫຼວງວຽງຈັນ ສົມທົບກັບພາກສ່ວນກ່ຽວຂ້ອງແກ້ໄຂໄດ້ ປະກອບມີ: ເຫດການຄາຕະກໍາ 2 ສົບ ແລ້ວຝັງໄວ້ຢູ່ປ່າແຄມທາງ ເຂດບ້ານໃໝ່ ເມືອງສີໂຄດຕະບອງ ນະຄອນຫຼວງວຽງຈັນ; ເຊິ່ງເຫດການດັ່ງກ່າວ ແມ່ນເຫດການລັກພາຕົວຮຽກຄ່າໄຖ່, ຖືກລັກພາຕົວໄປແຕ່ຄັ້ງວັນທີ 18 ມີນາ 2022 ຈົນຮອດວັນທີ 26 ມີນາ 2022 ຈຶ່ງພົບຜູ້ກ່ຽວທັງສອງຖືກຄາດໍຕະກຳຝັງດິນ; ມາຮອດປັດຈຸບັນ, ສາມາດຕິດຕາມຈັບເປົ້າໝາຍທີ່ມີສ່ວນຮ່ວມໃນການລັກພາຕົວ ແລະ ຄາຕະກຳໄດ້ທັງໜົດ 13 ຄົນ ຍິງ 1 ຄົນ; ໃນນີ້, ເປັນຄົນລາວ 8 ຄົນ ຍິງ 1 ຄົນ, ຄົນສັນຊາດຈີນ 4 ຄົນ.
ອີກເຫດການໜຶ່ງເກີດຂຶ້ນໃນວັນທີ 10 ກັນຍາ 2022 ມີເຫດການລັກພາຕົວ ແລະ ຄາຕະກຳຄົນຈີນ ຢູ່ໂຮງງານຫຼອມເຫຼັກ ຕັ້ງຢູ່ບ້ານຫ້ວຍນໍ້າເຢັນ, ເມືອງນາຊາຍທອງ, ນະຄອນຫຼວງວຽງຈັນ, ຜູ້ເຄາະຮ້າຍ ເປັນນັກທຸລະກິດ, ພາຍໃຕ້ການຊີ້ນໍາຢ່າງໃກ້ຊິດ ຂອງກົມໃຫຍ່ຕໍາຫຼວດ ມາຮອດວັນທີ 24 ກັນຍາ 2022 ສາມາດກັກຕົວຜູ້ກະທຳຜິດໄດ້ 2 ຄົນ ຍິງ 1 ຄົນ, ຊື່ ທ້າວ ເລີນຢູເວີນ ອາຍຸ 30 ປີ, ນັກທຸລະກິດ ສັນຊາດຈີນ ແລະ ນາງ ມາລີ ອາຍຸ 27 ປີ ສັນຊາດລາວ ທັງສອງເປັນຜົວເມຍ, ພັກເຊົາຢູ່ ບ້ານໜອງບົວທອງເໜືອ, ເມືອງສີໂຄດຕະບອງ, ນະຄອນຫຼວງວຽງຈັນ.
