ສິງກະໂປຍົກເລີກໃສ່ຜ້າປິດປາກໃນລະບົບຂົນສົ່ງ ຍົກເລີກສະແດງຜົນກວດໂຄວິດກ່ອນເຂົ້າປະເທດ

ກະຊວງສາທາລະນະສຸກສິງກະໂປເປີດເຜີຍວ່າ: ສິງກະໂປກຽມອະນຸຍາດໃຫ້ນັກທ່ອງທ່ຽວທີ່ໄດ້ຮັບວັກຊີນຍັງບໍ່ຄົບສາມາດເດີນທາງເຂົ້າປະເທດໄດ້ໂດຍບໍ່ຕ້ອງມີຜົນກວດເຊື້ອໂຄວິດ-19 ເປັນລົບກ່ອນອອກເດີນທາງນັບແຕ່ອາທິດໜ້າເປັນຕົ້ນໄປ.

ຖະແຫລງການຈາກກະຊວງສາທາລະນະສຸກສິງກະໂປ ລະບຸວ່າ: ລັດຖະບານກຽມຍົກເລີກກົດໃສ່ຜ້າປິດປາກລະຫວ່າງການໃຊ້ລະບົບຂົນສົ່ງສາທາລະນະ ເລີ່ມແຕ່ວັນທີ 13 ກຸມພາ ແລະ ຈະຍົກເລີກໜ່ວຍປະຕິບັດການສະເພາະກິດໂຄວິດ-19 ທີ່ຈັດຕັ້ງຂຶ້ນໃນເດືອນມັງກອນ 2019.

ທ່ານ ລໍເຣນ ຫວ່ອງ ຮອງນາຍົກລັດຖະມົນຕີສິງກະໂປ ເຊິ່ງເປັນປະທານຮ່ວມໜ່ວຍປະຕິບັດການສະເພາະກິດໂຄວິດ-19 ລະບຸວ່າ: “ສະຖານະການໂຄວິດຂອງເຮົາຍັງຊົງຕົວໃນໄລຍະຫລາຍເດືອນຜ່ານມາ ເຖິງວ່າຈະມີການເດີນທາງເພີ່ມຂຶ້ນ”.

ທ່ານ ຫວ່ອງ ກ່າວວ່າ: “ປະຊາກອນຂອງເຮົາມີພູມຕ້ານທານແບບໄຮບຣິດໃນລະດັບສູງ ຄວາມສ່ຽງຂອງການຕິດເຊື້ອທີ່ນໍາໄປສູ່ການເຈັບເປັນຮຸນແຮງ ຫລື ເສຍຊີວິດນັ້ນຕໍ່າ ເມື່ອທຽບໃສ່ພະຍາດທາງເດີນຫາຍໃຈປະຈໍາຖິ່ນອື່ນໆເຊັ່ນ: ໄຂ້ຫວັດໃຫຍ່”.

ທັງນີ້, ການຫລຸດຜ່ອນຂໍ້ກໍານົດກ່ອນການອອກເດີນທາງ ແລະ ການບໍ່ບັງຄັບໃສ່ຜ້າປິດປາກຖືເປັນບາດກ້າວສໍາຄັນທີ່ເນັ້ນວ່າ: ພະຍາດໂຄວິດເປັນພະຍາດປະຈໍາຖິ່ນ ແລະ ເປັນບັນທັດຖານໃໝ່ສໍາລັບສິງກະໂປ.

ເຖິງຢ່າງໃດກໍດີ, ກະຊວງສາທາລະນະສຸກສິງກະໂປ ລະບຸວ່າ: ນັກທ່ອງທ່ຽວທຸກຄົນທີ່ເດີນທາງມາສິງກະໂປທາງອາກາດ ຫລື ທາງທະເລຍັງຕ້ອງສົ່ງແບບຟອມແຈ້ງຂໍ້ມູນສຸຂະພາບກ່ອນ ຫລື ເມື່ອເດີນທາງມາເຖິງ.

ກ່ອນໜ້ານີ້, ຜູ້ເດີນທາງເຂົ້າສິງກະໂປທີ່ໄດ້ຮັບວັກຊີນຍັງບໍ່ຄົບຈະຕ້ອງສະແດງຜົນກວດຫາເຊື້ອໂຄວິດເປັນລົບພາຍໃນ 2 ວັນກ່ອນອອກເດີນທາງ.