ນາຍົກເນັ້ນໃຫ້ຂະແໜງກະສິກໍາ-ປ່າໄມ້ ແລະ ພັດທະນາຊົນນະບົດ ສຸມໃສ່ຊຸກຍູ້ແຮງການຜະລິດພາຍໃນ ແລະ ເລັ່ງໃສ່ປະຕິບັດ 4 ທິດທາງສໍາຄັນ

ໃນໂອກາດເຂົ້າຮ່ວມກອງປະຊຸມສະຫລຸບວຽກງານກະສິກໍາ-ປ່າໄມ້ (ກປ) ແລະ ພັດທະນາຊົນນະບົດປະຈໍາປີ 2022 ແລະ ແຜນທິດທາງ ປີ 2023 ໃນວັນທີ 8 ກຸມພານີ້, ທ່ານ ສອນໄຊ ສີພັນດອນ ນາຍົກລັດຖະມົນຕີ ໄດ້ມີຄຳເຫັນໂອ້ລົມຊົມເຊີຍຕໍ່ຜົນງານພົ້ນເດັ່ນຫລາຍດ້ານທີ່ຂະແໜງກະສິກໍາ-ປ່າໄມ້ສາມາດຍາດມາໄດ້ ເຊິ່ງໄປຄຽງຄູ່ກັນນັ້ນກໍຍັງມີບາງວຽກງານທີ່ຕ້ອງເອົາໃຈໃສ່ໂດຍສະເພາະສຸມໃສ່ຊຸກຍູ້ແຮງການຜະລິດພາຍໃນ ເພື່ອທົດແທນການນຳເຂົ້າ ຫັນເປັນສິນຄ້າສົ່ງອອກ ພ້ອມທັງເອົາໃຈໃສ່ພັດທະນາຊົນນະບົດ ເພື່ອແກ້ໄຂຄວາມທຸກຍາກ.

ນອກນີ້, ເພື່ອເຮັດໃຫ້ມີການຫັນປ່ຽນໃໝ່ໃນຂະແໜງກະສິກໍາ-ປ່າໄມ້ ແລະການພັດທະນາຊົນນະບົດໃນປີ 2023 ບັນລຸຄາດໝາຍຕ້ອງເລັ່ງໃສ່ປະຕິບັດ 4 ທິດທາງສໍາຄັນຄື:

1. ການຄໍ້າປະກັນຄວາມໝັ້ນຄົງດ້ານສະບຽງອາຫານ ແລະໂພຊະນາການ ຕ້ອງປະເມີນຕາມຜົນຕົວຈິງທີ່ລົງມືຈັດຕັ້ງປະຕິບັດ ແລະ ຮັບປະກັນໃຫ້ໄດ້ຕາມທິດເພິ່ງຕົນເອງ, ກຸ້ມຕົນເອງ ນັບແຕ່ແນວພັນພືດ-ແນວພັນສັດ, ປັດໄຈການຜະລິດ ແລະ ເຕັກນິກຕ່າງໆ;
2. ການຜະລິດກະສິກໍາເປັນສິນຄ້າຕ້ອງເຂົ້າໃຈໃຫ້ຖືກຕ້ອງວ່າເປັນການຜະລິດສິນຄ້າເພື່ອບໍລິໂພກພາຍໃນ ແລະ ສົ່ງອອກ ເພື່ອໃຫ້ຊາວກະສິກອນມີລາຍຮັບ, ມີຊີວິດການເປັນຢູ່ທີ່ດີຂຶ້ນ; ສາມ,
3. ວຽກງານຟື້ນຟູ ແລະ ຂະຫຍາຍປ່າໄມ້ ຕ້ອງໄດ້ເພີ່ມຄວາມເອົາໃຈໃສ່ຢ່າງເຂັ້ມງວດໃນການຄຸ້ມຄອງປ່າໄມ້, ກວດກາຄືນເນື້ອທີ່ປ່າໄມ້ຕ່າງໆ ແລະຈັດຕັ້ງປະຕິບັດແຜນການພັດທະນາໃຫ້ໄປຕາມທິດຍືນຍົງ ແລະ ສີຂຽວ;
4. ການພັດທະນາຊົນນະບົດຕ້ອງຕິດພັນກັບການລຶບລ້າງຄວາມທຸກຍາກ ຕ້ອງຖືເອົາການຜະລິດກະສິກໍາເປັນໃຈກາງຂອງການພັດທະນາ ແລະຮັບປະກັນຄວາມຍືນຍົງທາງດ້ານເສດຖະກິດ-ສັງຄົມ ແລະສິ່ງແວດລ້ອມ.