ຕຳນານແມນຢູ ອະທິບາຍວ່າເປັນຫຍັງ ມາຕີເນສ ຈຶ່ງເປັນກອງຫລັງທີ່ດີທີ່ສຸດໃນພຣີເມຍລີກໃນເວລານີ້

ຣີໂອ ເຟີດີນານ ຕຳນານນັກເຕະສະໂມສອນ ແມນເຊສເຕີ ຢູໄນເຕັດ ເຊື່ອວ່າ ລີຊານໂດ ມາຕີເນສ ຄືກອງຫລັງທີ່ເກ່ັງທີ່ສຸດໃນເວທີ ພຣີເມຍລີກ ໃນເວລານີ້ ຖ້າເບິ່ງຈາກຜົນງານຂອງນັກເຕະ.

ນັກເຕະທີມດີກຣີແຊ໊ມທີມຊາດອາເຈນຕີນາ ອາຍຸ 25 ປີ ຍ້າຍຈາກ ອາແຈັກ ອຳເຕີດຳ ມາຍັງ ແມນເຊສເຕີ ຢູໄນເຕັດ ດ້ວຍຄ່າຕົວ 57 ລ້ານປອນ ເມື່ອຕະຫລາດນັກເຕະປີຜ່ານມາ.

ໄລຍະທຳອິດ ມາຕີເນສ ຖືກນັກເວເຄາະບານ ແລະ ອະດີດນັກເຕະບາງຄົນວິຈານຢ່າງຫນັກ ຍ້ອນເຫດຜົນບັນຫາເລື່ອງຄວາມສູງ ແຕ່ຫລັງຈາກໄດ້ ປັບສະພາບບານພຣີເມຍລີກແລ້ວ ລາວກໍຄ່ອຍໆປັບຕົວ ແລະ ສ້າງຜົນງານໄດ້ດີຂຶ້ນເລື້ອຍໆ ຈົນຕອນນີ້ກາຍເປັນນັກເຕະຄົນສຳຄັນຂອງ ແມນເຊສເຕີ ຢູໄນເຕັດ ໄປແລ້ວ.

ເມື່ອຖືກຖາມວ່າ ມາຕີເນສ ຄືກອງຫລັງທີ່ດີທີ່ສຸດໃນພຣີເມຍລີກ ຫລືບໍ່ ເຟີດີນານ ກ່າວຜ່ານ Five ຊ່ອງຢູທູບຂອງລາວວ່າ : ໃນແງ່ຂອງຜົນງານຕອນນີ້ ຂ້ອຍບໍ່ຄິດວ່າຈະມີຂໍ້ໂຕ້ແຍ່ງຈາກໃສ.

“  ຂ້ອຍຄິດວ່າລາວນັ້ນມີຄວາມໂດດເດ່ັນ, ດຸດັນ, ມີການສື່ສານທີ່ດີ, ລາວສະແດງໃຫ້ເຫັນເຖິງຕົວຕົນ, ລາວມັກຊ່ວຍທີມໄດ້ສະເຫມີໃນເວລາສຳຄັນ ”.

ສຳລັບ ມາຕີເນສ ລົງຫລິ້ນໃນ ພຣີເມຍລີກ ໄປແລ້ວ 19 ນັດ, ລົງຕົວຈິງ 17 ນັດ, ປະທະສຳເລັດ 33 ຄັ້ງ, ບັງລູກຍິງ 18 ຄັ້ງ, ສະສົມຄລີນຊີສ 5 ເກມ ແລະ ຍິງໄປແລ້ວ 1 ປະຕູ.