ປັບປຸງແກ້ໄຂເສັ້ນທາງແຕ່ຕານມີໄຊ-ອຸດົມຜົນ ຈະໃຫ້ສຳເລັດພາຍໃນເດືອນກຸມພານີ້

ວັນທີ 6 ກຸມພາ 2023 ນີ້, ຜູ້ຮັບເໝົາ ສ້ອມແປງ-ປັບປຸງແກ້ໄຂເສັ້ນທາງ ແຕ່ຕານມີໄຊ-ອຸດົມຜົນ ລາຍງານຜ່ານທາງວິທະຍຸກະຈາຍສຽງແຫ່ງຊາດ ວ່າ: ຕາມການມອບໝາຍຂອງຫ້ອງການພະແນກໂຍທາທິການ ແລະ ຂົນສົ່ງນະຄອນຫລວງ ເພື່ອເຮັດໃຫ້ການສັນຈອນຂອງປະຊາຊົນມີຄວາມສະດວກສະບາຍ ປັດຈຸບັນການກໍ່ສ້າງເສັ້ນທາງດັ່ງກ່າວປະຕິບັດໄດ້ປະມານ 40% ຈະໃຫ້ສຳເລັດຕາມແຜນທີ່ວາງໄວ້ພາຍໃນເດືອນກຸມພານີ້. ສ່ວນໜ້າວຽກຕົ້ນຕໍແມ່ນການຕາບຂຸມ, ຂູດຮື້ ບ່ອນທີ່ເປ່ເພໜັກ ແລ້ວເຮັດໃໝ່ເປັນບາງຈຸດ.
ອີກປະການໜຶ່ງ ເພື່ອເຮັດໃຫ້ການສ້ອມແປງສຳເລັດຕາມແຜນທີ່ວາງໄວ້ ຮຽກຮ້ອງເຖິງຜູ້ສັນຈອນທີ່ບໍ່ຈຳເປັນແທ້ຄວນຫລີກເວັ້ນໄປໃຊ້ເສັ້ນທາງອື່ນແທນ ເພື່ອຄວາມສະດວກຕໍ່ຜູ້ຂັບຂີ່ລົດ ແລະ ບໍລິສັດກໍ່ສ້າງ.